1 "Chilha phi iamuri, ikano ni malhehero a Apwiiya Nlhuku inyu chaalhehenre aya wiira kuwiittuchiheni, wiira nrumelhelhe ni upangacha wowo wiilhaponi unorwaa inyu uukhalhani uwo. 2 Ikatema yonkhaye varii inyu akumi va, nnothananiya wiira mwooveke Apwiiya Nlhuku inyu ni urumelhelha iamuri chaya chonkhaye ni malhehero anouvahaakani mwaattiva, ni iyari chinyu wiira nkhalhe ni ukumi wo makhuku menchi. 3 Mwiiwelhelheke, mwaatti attu o Uisraeli ni uvarechesha. Phi vavawo chittu chonkhaye chinootimira, nnoovaheriya ni ukhalha nikosho no machiri chinene wowo wiilhaponi uwo, ilhapo inolhoka ulhima ni uhuwa mihuwo, thoko chenre aya Apwiiya Nlhuku wo waalheha manyaapwiiya inyu.

4 "Paahi nkeewani inyu mwaatti attu o Israeli! Apwiiya Nlhuku inyu phi Apwiiya Nlhuku ari o vekha. 5 Mwaattuneke Apwiiya Nlhuku inyu, wo nrima inyu wonkhaye, ni wo nnepa winyu wonkhaye, ni wo irusho chinyu chonkhaye, ni wo machiri inyu onkhaye. 6 Nshungeeheke mmamirimani mwinyu alha malhove anoulheheraakani lhelho alha. 7 Mweettuchiheke rata achishaana inyu, ni waahimiachera ikatema vanohalha inyu ukhalha mmanupani, vanorwaa inyu munkwahani, ama vanorupa inyu ama vanonkwa inyu. 8 Mmwareke mmiononi mwinyu ni vayuchi winyu, wo uwupushani. 9 Nlhepacheke alha malhehero alha vachulhu milhako cho inupa chinyu, ni vachulhu milhako cho ukelha mmawani mwinyu.

10 "Thoko Apwiiya Nlhuku inyu chenre aya wo weerelha manyaapwiiya inyu Aburahimu ni Naisaka ni Nayakhobo, wiira anowa waavaha ilhapo yo iwani chulhupalhe ni chorera, cho manupa o ushichira, chihithekilhe inyu mwaattiva mwaashinene. 11 Apwiiya Nlhuku anokouvahani manupa aya ayo, anachanre chittu chorera chiheeshilhe inyu mwaashinene, nnokoophwanya ilhushi chihithipilhe inyu mwaatti, ni imata cho mizabibu ni mizeituni chihilhimme inyu mwaatti. Ni Apwiiya Nlhuku vanohalha aya urwehani wowo wiilhaponi uwo, nnokoopatta choolhia chonkhaye chinothanana inyu. 12 Ni vavawo nansho nhiwe mwaalhiyalha Apwiiya Nlhuku ookumihulheni Umisri waari inyu ipotta. 13 Mwaathimicheke Apwiiya Nlhuku inyu, mwaakavihereke yayo vekha aya, ni ulhupelha wo uromolha nchina naya vekha aya. 14 Nhithimiche milhuku chikina, milhuku cha attu anaatamana inyu, 15 urushiya wa Apwiiya Nlhuku uhiwe waapharelha vachulhu winyu nkayofutani velhaponi va. Ukhalhawaya Apwiiya Nlhuku inyu arii variyari inyu, phi Nlhuku o ihache.

16 "Nhaalhikache Apwiiya Nlhuku inyu, thoko chenre inyu wo waalhikacha vaari inyu Umaasa. 17 Mwavarechesheke iamuri cha Apwiiya Nlhuku inyu, chonkhaye chilhehenre aya. 18 Mpangeke chittu chinaateelhiha nrima Apwiiya Nlhuku wiira nvaheriye. Vavawo nnoowa mwaapatta ilhapo yorera yaalhehilhe aya Apwiiya Nlhuku wiira anowaavaha manyaapwiiya inyu ilhe, 19 ni woomolhacha amalhaponi inyu thoko chenre aya wo ulheha.

20 "Mahuku anowa achishaana inyu ookohakani, ‘Maana aya phi ishiyani nhina chi ikano chinilhehenre aya Apwiiya Nlhuku, Nlhuku ihu wiira nipangache chi?’ 21 Mmweke mwaakhulha wiira, ‘Hii naari ipotta chi Nafarao amwene o Umisri, ni Apwiiya Nlhuku ahonookholha ukhuma wowo wo moono aya wo machiri. 22 Nahoona wo miitho ihu naashinene apangaka ithikineeha ni chittu cho woopiha, wa attu o Umisri ni amwene aya ni wa attu aya o ikuru. 23 Ahonikumiha ukhuma Umisri nkayaaniwiiha va, ni univaha ilha ilhapo ilha, thoko chaalhupenlhe aya manyaapwiiya ihu wiira anowaavaha. 24 Paahi, Apwiiya Nlhuku ahonilhehera wiira nivarecheshe iamuri chonkhaye chi, ni waathimicha wo mahalha ihu naashinene, wiira athepeke uniinanelha mahuku onkhaye thoko chiri ihu lhelho va. 25 Navarecheshaka kila ittu inilhehenre aya Apwiiya Nlhuku, Nlhuku ihu, ninowateelhiha nrima, ni mitheko chihu chinoopangia rata, wowo wiilhaponi unokelha ihu ukhalha uwo.’