1 Yamalheke, ashinna Musa ahothepa uhimia eeraka wiira, "Kihouvahani wiira nthanlheke, iriyari yo ibarakha ni ulhaviya. Chechiyo chittu chonkhaye chiyo choupattakani mwaattiva mmilhokoni mwinyu, nkamwoopuwelha uriwoothe, unohalha inyu umwarushelhiya ni Apwiiya Nlhuku inyu, 2 nkamwaahokolhelha Apwiiya Nlhuku inyu, mwaattiva vamoka ni achishaana inyu, nkamwaarumelhelha nlhove naya wo nrima winyu wonkhaye ni wo nnepa winyu wonkhaye, nlhove kinoulheheraakani lhelho nna, 3 vavawo Apwiiya Nlhuku inyu anouhokholhosherani moombone inyu, ni uwonelhani ikiriri ni uthothokanihani tho ukhuma wiilhaponi umwarushelhiye inyu. 4 Ni ata yakhalhaka mmwarushelhiye utayi chinene velhaponi va, Apwiiya Nlhuku inyu anouthothokonihani ni uhokolhoshani, 5 wiira nkhalhelhe tho ilhapo yaakhanlhe aya manyaapwiiya inyu. Ni ayo anouvaherani chinene, ni ukhalha attu enchi waapwaha manyaapwiiya inyu. 6 Apwiiya Nlhuku inyu anoupangani mwaattiva vamoka ni achishaana inyu, nkalhe ni nrima wo urumelhelha wiira mwaattune yayo wo nrima winyu wonkhaye ni wo nnepa winyu wonkhaye, wiira mpatte ukhalha akumi. 7 Apwiiya Nlhuku inyu, anowaahelha ulha ulhaviya ulha, amalhaponi inyu ohuvihilheni. 8 Ni inyu nnoorumelhelha nlhove na Apwiiya Nlhuku ni uvarechesha malhehero aya onkhaye kinouvahaakani lhelho alha. 9 Apwiiya Nlhuku inyu anouvaherani wo kila ittu inohalha inyu upanga, nnookhlha ni achishaana enchi, ni ing'ope chinchi, ni imata chinyu chinooruweria choolhia. Ukhalhawaya anoothanana tho uvaherani, thoko chaattunne aya waavahera manyaapwiiya inyu, 10 yakhalhaka nnoorumelhelha nlhove naya ni uvarechesha iamuri ni malheheriyo aya alhepiye nkitabuni mwo malhehero mmo, ni waahokolhelha Apwiiya Nlhuku inyu wo nnepa winyu wonkhaye ni wo nrima inyu wonkhaye.

11 "Malhehero anouvahaakani lhelho kahiwe o urika chinene uwannyu, mena khari utayi ni inyu mwaatti. 12 Khariwo wiirimu ata mwiire wiira, ‘Mpani nohalha uwelha nchulhu wiirimu uniwiihera wiira niiwelhelhe ni urumelhelha?’ 13 Mena khaarii ukhopelhelhe ibahari, ata mwiire, ‘Mpani nohalha ulhapuwa ibahari aniwiihere wiira niweelhelhe ni urumelhelha?’ 14 Kuhiwe mena, ari vakhiviru ni inyu mwaatti, ari mmalhakuni mwinyu ni mmaminepani mwinyu, wiira mpangache.

15 "Lhelho nna kinouvahani wiira nthanlheke arii oombone, ama o uhilhoka, ukumi ama nookhwa. 16 Mwarumelhelhaka malhehero a Apwiiya Nlhuku inyu anouvahaakani lhelho aalha, nkamwaattuna Apwiiya Nlhuku inyu ni upanga iphiro chaya ni uvarechesha malhehero aya, ni ihukumu chaya paahi nnookhalha akumi ni wunchereria, ni Apwiiya Nlhuku inyu anouvahani ibarakha wiilhaponi unorwaa inyu ukhalhelhani. 17 Nansho mwathephiyaka ni ukhota wiira nhiiwelhelhe, nkamwaapurulhiya wiira nlhapelhe milhuku chikina ni ukavihera, 18 mii kinouhimeriani lhelho va wiira, nnoorimeelhacha. Khannokhalha akumi wo mahuku menchi wiilhaponi unorwaa inyu ukusha ikhalhe yawinyu, ukhopelhelhe mwoolhoko wo Uyorodani. 19 Kinowiihana irimu ni ilhapo choonecheshe vachulhu winyu lhelho nna, wiira kihouvahani nthanlhe iriyari yo ukumi ama nookhwa, iriyari yo ibarakha ni ulhaviya. Paahi nthanlheke ukumi inyuva ni iyari inyu wiira nkhalhe akumi, 20 mwaattunaka Apwiiya Nlhuku inyu, mwarumelhelhaka nlhove naya ni uvaraana. Ukhalhawaya upanga chiicho, phi upatta ukumi wo mahuku o uhimalha, ni ukhalha wiilhaponi Apwiiya Nlhuku waalhehilhe aya manyaapwiiya inyu, Aburahimu, Naisaka ni Nayakhobo wiira anouvahani."