1 "Mwoonaka ing'ope ama ikhondoro ya ntu o Israeli naninyu inapotenre, nhihiye ikukuriachaka, nansho nhakhelheke wa mwanene. 2 Nansho yakhalhaka mwanene uyo nokhalha utayi, ni ama khamunchuwenlhe, nhakhelheke uwannyu mpaka mwanene uyo vanohalha awe uwa ukohererani, vavawo munhokolhoshereke. 3 Mmweeke mweera chiicho vanoona inyu iphuta ya amwaatamana inyu, ama mwiinjiro awe, ama ittu iriyoothe yaapotenre. Nhihiye wo uhilhoha.

4 "Mwoonakaru iphuta ya nlhoko inyu ama ing'ope awe inawulhuwilhe vaphironi, nhihiye wo uhilhoha. Munkaviheke utheesha uhokolhosha uwannyawe.

5 "Manyaathiyana ahiware ikuwo cha manyaalhopwana, ni wala nlhopwana hiware ikuwo cha manyaathiyana, ukhalhawaya mwapangaka chiicho, Apwiiya Nlhuku inyu anoorushiya.

6 "Mwoonaka iphuuru mphironi, mwirini ama vathi iri ni makhandi ama mooche, ni naangoro narupenlhe makhandi ama mooche ayo, nhinkushe naangoro uyo ni makhandi awe ayo. 7 Nkusheke makhandi ayo, ni anaangoro ayo mwaahiyeke avaveke, vavawo nnoopatta nipesha no ukhalha ni ukumi mwinchi.

8 "Vanotheka inyu inupa yo naanano, nthekeke nreko wo ishiri ikani yo urukureria itatari, nhiwe mwaakuphulhachiya yakhalhaka ntu noowulhuwa ukhuma vatatarini vawo, nkaakhwa.

9 "Nhaalhe miri cho izabibu vamoka ni imbeyu cho miri chikina mmatani mwinyu, mwapangakaru chiicho, choolhia chonkhaye khachinorumelhelhiya umihoolho wa Apwiiya Nlhuku. Kuhii mwanlhe inyu chiyo vekha, nansho ata izabibu ni chittu chikina chonkhaye.

10 "Nhilhime imata ni ing'ope ni iphuta chittukelhiye nikongwa nimoka.

11 "Nhiware ikuwo chittaviye wo nttoche no mapururu o ikhondoro, ni yo ikuwo yorera yooteelha vamoka.

12 "Ntottelheke manjenje o nttoche macheshe umminikoni mwo miinjiro chinowara inyu.

13 "Yakhalhaka nlhopwana nonveka nthiyana ni kaanyuma aya nkaathanana unhiya, 14 ni umwootheria wiira hopanga chittu cho wuulhiha muru, ni unnanariha wo wiira khayonne wiira ahothupha mooro ikatema yaavenke awe. 15 Paahi etu yakhumelhelhaka chiicho, athumwanawe yoyo mwalhi uyo ahimiechesheke wo wooniha ishuka yaarupelhiye yoyo uhiyu iyo, wiira mwalhi aya uyo aari hinathupa mooro, ni uhimiacha wa ashulhupalhe unlhakoni wo vawani, 16 ni weerelha wiira, ‘Nanthelhinhe mwalhi ihu ulha wo ulha ntu ulha, nansho vano khanonttuna tho, 17 inthikineeha iri wiira, horomolha chittu cho wuulhiha muru, oolhumachaka etu wiira amphwanye nathumpe mooro. Nansho hii uhimiechesha wihu wiira aari ahinathupha mooro phi ulha wo ishuka yaarupelhiye uhiyu wo nihuku no nthelhi nno ilha.’ 18 Vavawo ashulhupalhe o vawani ayo ankusheke nlhopwana uyo ni umwaata ikopo. 19 Tho, anlhiviheke yoyo ntu uyo ifaini yo makhobilhi imia o malhuku o isiliva, ni uvahiya anaangoro o yoyo mwalhi uyo, ukhalhawaya yoyo nlhopwana uyo honnanariha yoyo mwalhi a attu o Israeli uyo. Ni yoyo mwalhi uyo phi nohalha ukhalha ahanu awe mahuku onkhaye ni wala khanooria ummaha italaka.

20 "Nansho yakhalhaka nlhatu uyo uri wo ikekhiaye, ni wala khaawo malhove o uhimiechesha wo nlhatu no uhithupha wawe mooro, 21 arweehiyeke vankhorani wa athumwanawe ni manyaalhopwana o yeyo iwani iyo amwaateke malhuku akhweeke, ukhalhawaya hopanga chittu cho uhilhoka wa attu o Uisraeli, wo ulhavalhava nari wa athumwanawe. Vavawo etu, phi nohalha inyu umalhiha mwaha wo uwonya thoko yolha munlhokoni mwinyu.

22 "Yakhalhaka nlhopwana noovariya ugooni ni nthiyana a ntu, onkhaye eelhi ayo, nlhopwana ni nthiyana eeviyeke. Vavawo etu, phi nohalha inyu umalhiha mwaha wo uwonya thoko yolha munlhokoni mwinyu. 23 Nlhopwana amphwanyaka vawani mwalhi vekiye, nkanrupana, 24 onkhaye eelhi ayo mwaarweeheke vachereshere iwani, aatiyeke malhuku mpaka ukhwa. Mwalhi uyo eeviyeke ukhalhawaya khaakhuwenlhe wiira awe aakihiya inakhalhaka aari vawani. Ni nlhopwana uyo eeviyeke, ukhalhawaya honnanariha mwalhi vekiye ni amwaatamana awe, nkanrupana. Vavawo etu, phi nohalha inyu umalhiha mwaha wo uwonya thoko yolha munlhokoni mwinyu.

25 "Nansho yakhalhaka nlhopwana nonkumaana umatani mwalhi vekiye, nkammara wo tuuteni, paahi nlhopwana uyo eeviyeke vekha awe. 26 Mwalhi uyo hipangiye ittu iriyoothe, kattenke nlhatu unophwanelha wiiviya. Yoyo mwaha uyo uri thoko wa ntu mwiithelhe nkhunanawe nkaamwiiva ukhalhawaya, 27 nlhopwana uyo ammanre mwalhi uyo uchereshere iwani, ni uyo inakhalhaka ahokhuwelha wiira aakihiye, khaawo ntu arweelhe umwaakihani.

28 "Yakhalhaka nlhopwana nonkumaana mwalhi hinavekiya, nkammara wo tuuteni, nkaaphwanyeriya, 29 nlhopwana uyo aalhiveke athumwanawe mwalhi uyo makhobilhi makhumi nthanu o malhuku o isiliva, ukhalhawaya honnanariha mwalhi uyo. Ni yoyo mwalhi uyo phi nohalha ukhalha ahanu awe ni wala khanooria unhiya ukumi awe wonkhaye.

30 "Hikhalhe mena nlhopwana riyoothe nohalha waarupana manyaahanu a athumwanawe."