1 Paahi, ashinna Musa nkaathama vaari nikoote no Umoabu, nkaarwa umwaakoni Unebo, nkaawelha vachulhu mwaako, Upisga vakhiviru ni Uyeriko. Vavawo Apwiiya Nlhuku nkayooniha ilhapo yonkhaye: Ukhuma Ugileadi mpaka Unadani, 2 ilhapo yonkhaye i Nanaftali, ilhapo i Naefraimu ni i Namanase, ilhapo yonkhaye yo Uyuda mpaka ibahari yo Umediteraniya, 3 ithuphi yo Unegebu ni ithuphi yo nikoote no Uyeriko, ilhapo yo mitende mpaka Usoari. 4 Yamalheke, Apwiiya Nlhuku nkayeerelha ashinna Musa wiira, "Ilha phi ilhapo kilhupenlhe aka wa Aburahimu, Naisaka ni Nayakhobo wiira kinowaavaha iyari aya ilhe. Kihowoonihani mwoone wo miitho inyu mwaashinene, nansho khannophiya wowo."

5 Paahi ashinna Musa anamitheko a Apwiiya Nlhuku nkaarimeelha wowo wiilhaponi Umoabu uwo, wo ulhikaana ni nlhove na Apwiiya Nlhuku naahimilhe aya. 6 Apwiiya Nlhuku nkaavitha ashinna Musa unikote no Umoabu, vakhiviru ni iwani yo Ubeth Peori, nansho mpaka lhelho nna, khaawo ntu nochuwelha vakittu vari nihiye naya. 7 Ashinna Musa aarimelhe anari ni malhipa o iyaakha imia imoka ni makhumi meelhi, miitho aya aari ahinakelhiya ipiphi, ni aari ntu o wiikayakaya ni ari o machiri. 8 Attu o Israeli ahonlhacha wonlhelha ashinna Musa wo mahuku makhumi mararu, unikoteni Umoabu. Yamalheke vavawo, mahuku o ukhalhiya mattanga ayo ahomalha.

9 Paahi, Nayoshua anaaya Nanuni ahochara iphumu yo ukhalha ni irusho, ukhalhawaya aari anamanlhe uvahiya ibarakha ni ashinna Musa. Paahi etu, attu o Israeli ahaarumelhelha Nayoshua ni uttwara malhove a Apwiiya Nlhuku, aavanhe aya ashinna Musa.

10 Toka vavawo, khanakhumelhelha tho namilhohi o ulhikaana thoko ashinna Musa u Israeli, oolhumanne ni Apwiiya Nlhuku wo woonana wo miitho aya. 11 Khaawo namilhohi nkina aarumiye ni Apwiiya Nlhuku aapannge ithikineeha ni cho ushangiha wa amwene o Umisri, ni wa akavihi aya ni wo ilhapo aya yonkhaye yo Umisri. 12 Khaawo namilhohi nkina pannge ittu yuulhupalhe ni yo woopiha thoko yaapannge aya ashinna Musa umihoolho wa attu o Israeli onkhaye.