1 Baada yo urimeelha wa ashinna Musa karumiya a Apwiiya Nlhuku, Apwiiya Nlhuku ahoolhumana Nayoshua anaaya Nanuni, akaaviha a ashinna Musa, yeeraka 2 Karumiya aka Musa hokhwa, vanova nlhapuwacheke mwoolhoko wo Uyorodani, inyuva vamoka ni attu o Uisraeli onkhaye mpaka ilhapo inoovahakani ilhe. 3 Kila vakittu vanohalha inyu unyikalha kihoovahani thoko chaalhehilhe aka ashinna Musa. 4 Miinano cho ilhapo inyu inaakhalheke cho, uchawa ithakhwa, uchulhu miako cho Lebanoni, unoosha nchuwa ulhe mwoolhoko muulhupalhe wo Uyufrati ulhe, uvirelha ilhapo yonkhaye ya attu o Uhiti mpaka ibahari yo Umediteraniya mpata uneelha nchuwa. 5 Khaawo ntu nohalha ukottolhani mahuku onkhaye o ukumi inyu. Kinookhalha vamoka ni inyu thoko chaari aka ni ashinna Musa, mahuku onkhaye, wala akiinoohiyani mena. 6 Mwiilhipiheke ni uminda, ukhalhawaya inyuva nnowaholhelhiha alha attu alha akushe ikhalhe yawaya, ilhapo yaalhehilhe aka ashulhupalhe aya wiira kinowaavaha. 7 Nansho mwiilhipiheke ni uminda, nkhalheke rata ni owiinanelha ikekhiaye yonkhaye yoolhehenre aya ni akarumiya aka ashinna Musa. Nttwareke yeyo kila vakittu nhina wo yeyo ikekhiaye iyo, ni inyu nnooshichira variyoothe vanokelhelha inyu. 8 Mmweheke wiira khannolhiyalha mena ilha ikitabu yo Malhehero ilha, nansho mwiittucheke yeyo kila nihuku, uthana ni uhiyu wiira mwoorie uphanga onkhaye alhepiye mu, ni inyu nnooshichira ni ukonda variwoothe vahokelhelha inyu. 9 Muupuwelheke wiira, miyaano kihoolheherani mwiilhipiheke ni ukonda. Nhoove wala nhithulhuwe mmakhuvani ukhalhawaya miyaano Apwiiya Nlhuku, Nlhuku inyu, kirii vamoka ni inyu variwoothe vanokelhelha inyu.

10 Yamalheke Nayoshua nkayaalhehera ahoolhelhi a attu wiira, 11 avireke nipuro ni waalhehera attu wiira, "Nterekhacheke yoolhia, ukhalhawaya baada yo mahuku mararu nnoolhapuwa mwoolhoko wo Uyorodani, urwaa ukhalhelhani ilhapo anivahilhe aya Apwiiya Nlhuku, Nlhuku inyu anouvahani ikhalheke nhakhu inyu."

12 Nayoshua nkayeerelha attu o nikosho ni Narobeni ni Nagadi ni attu akina o nikosho ni Namanase wiira, 13 "Muupuwelheke malhehero a ashinna Musa karumiya a Apwiiya Nlhuku chenre aya wo wiira, 14 Manyaahanu inyu, achishana inyu ni mihuwo chinyu ni ashinama inyu o uhuwiya ahalheke mwiilhaponi mu, yaavahiye inyu ni ashinna Musa, ukhopelhelhe wo mwoolhoko wo Uyorodani. Nansho manyaalhopwana onkhaye o machiri ni ikerero chaya alhapuweke mwoolhoko ni waahoolhelha ashilhoko inyu. 15 Mwaakaviheke mpaka Apwiiya Nlhuku vanohalha aya waavaha ashilhoko inyu ayo vakittu wo ukhalha, thoko chovanhe aya ni mwaatti, wiira akhalheke ilhapo anovahiya aya ni Apwiiya Nlhuku, Nlhuku inyu. Mwamalhihaka nhokolhieke mwiilhaponi mwinyu, mwakhalhe, mwaavahiye inyu ni ashinna Musa, karumiya a Apwiiya Nlhuku, ukhopelhelhe mwoolhoko wo Uyorodani uwo."

16 Nkayaakhulha Nayoshua, "Chittu chonkhaye chinilhehenre inyu ninoopanga, ni variwoothe vanohalha inyu uniruma ninoorwaa. 17 Thoko chaarumelhenlhe ihu ashinna Musa, phi chiichammo chinohalha ihu urumelhelhani inyuva, Apwiiya Nlhuku, Nlhuku ihu akhalheke vamoka ni inyu vamoka thoko chaari aya wa ashinna Musa. 18 Ntu riyoothe hinorumelhelha malhehero inyu ama ukhota urumelhelha malhove inyu ama ittu iriyoothe nnolhehera inyu, eeviyeke. Inyuva nansho nkhalheke ni machiri ni wiilhipiha."