1 Nansho attu o Uisraeli khayoonrie wiichinanelha wo chittu chaakumihiye wiira chirimeelhihiye, ukhalhawaya Naakani anaaya Nakarmi, anaaya Naazabudi, anaaya Nazera o nikosho ni Nayuda, ahokusha chittu chikina chikumihiye chaalheheriye wiira chipahiye. Paahi etu Apwiiya Nlhuku ahorushiya chinene vachulhu wa attu o Uisraeli.

2 Nayoshua nkaaruma attu ukhuma Uyeriko arwee iwani yo Uai, vakhiviru ni Ubeth Aveni, unoosha nchuwa iwani yo Ubetheli, yeerelhaka "Nrweeke mwahotelhe ilhapo, ni ayo nkayaarwaa ni uhotelha iwani yo Uai." 3 Yahokolhieke nkayeerelha Nayoshua wiira, "Khuuwo nlhatu wo wathemwiha attu onkhaye waatakana ni attu o iwani yo Uai, ukhalhawaya anenchi aya ari vakani. Attu maelufu meelhi ama mararu anoothosha urweehiya." 4 Paahi attu maelufu mararu ahorwaa waatakana ni attu o iwani yo Uai, nansho nkayoomolhachiya ni attu o Israeli ahowomolhiya iwani iyo. 5 Attu o Uai nkayeeva attu o Uisraeli makhumi mararu ni sita ni woomolha akina ukhuma nlhako mulhupalhe wo ukelha vawani mpaka Ushebarimu nkayeerelha unokhuruwa mwaako. Aisraeli nkayaakhwacha nrima ni uthulhuwacha mmakhuvani.

6 Nayoshua nkayaahulha ikuwo chaya, yayo vamoka ni ashulhupalhe o attu o Uisraeli. Nkayeewulhusha makukhu vathi umihoolho wo Nsanduku na Apwiiya Nlhuku mpaka uchechilho, nkayeehelha ntukurukhu mmuruni mwaya, wooniha wiira ahochukulha. 7 Nayoshua nkeera, "Nihothapana hii, inyu Thithi Nlhuku! Nlhatu wani no unilhapusha mwoolhoko wo Uyorodani wiira nikottolhiye ni attu o Uamoni wiira niivakachiye? Paahi ikaari nambaya nikaahanlhe ukhopelhelhe mwoolhoko wo Uyorodani. 8 Inyu Thithi, kiirekeni, yakhalhaka attu o Uisraeli ahaattawa amalhaponi aya? 9 Paahi Akaanaani vamoka ni anenchi onkhaye o ilha ilhapo ilha vanohalha aya wiiwa yoyo mwaha uyo, anonirukureria ni uniivakacha hii onkhaye va, nihoonie tho velhaponi va. Vano etu nnaapangekeni wooniha ikuru yo nchina ninyu?"

10 Apwiiya Nlhuku nkayeerelha Nayoshua wiira, mweemelheke! Chani woonaka nheewulhusha makukhu vathi thoko chiicho? 11 Attu o Uisraeli ahowonya, ukhalhawaya ahohiya malhehano aka alhehenre aka wiira avarecheshe, ahokusha chittu chikina chikumihiye wiira chirimeelhihiye, aheiya ni uthephiacha, nkayaathakaniha ni chittu chaya. 12 Wo chiichammo etu, Aisraeli khannoria weemelha uhoolho wa amalhaponi aya, anowaattawa amalhaponi aya ukhalhawaya aheepanga ashinene ukhalha ittu yo urimeelhihiya, kinokhalha vamoka ni inyu tho mwaahitanganyeke chittu cheerelhiye inyu wiira nhikushe.

13 Paahi mweemelheke vano mwattukurieke attu, eechesheke tayari wo nihuku no meelho. Mwaahimerieke, ukhalhawaya miyaano Apwiiya Nlhuku, Nlhuku o Uisraeli kineera cho, Munlhokoni mwinyu chihaawo chittu chikumihiye wiira chirimeelhihiye, khannoria waata amalhaponi inyu mpaka chechiyo chittu chiyo vanohalha aya uthamihiya iriyari inyu! 14 Paahi etu meelho wichishu attu o Uisraeli onkhaye nrwaacheke umihoolho waka, nikosho kaayuma yo nikosho nikina. Nikosho ninohalha aka uthanlha ninoochushera uhoolho. Nihimo kaanyuma yo nihimo nikina. Nihimo ninohalha aka uthalha nno ninoochushera uhoolho, mmuchi kaanyuma ya mmuchi. Ni mmuchi anohalha aka waathanlha anoochushera uhoolho, ntu mmoka mmoka. 15 Ntu riyoothe nohalha uthanlhiya nkaaphwanyiya nari ni chittu chikumihiye wiira chirimeelhihiye, norimeelhihiya wo mooro, yoyo vamoka ni kila ittu awe, ukhalhawaya khathiminche malhehano aka miyaano Apwiiya Nlhuku, nkaapanga ittu yo wuulhiha muru Israeli.

16 Paahi Nayoshua nkayonkwa wichishuru nkaawiiha attu o Uisraeli onkhaye vakhiviru, nikosho wo nikosho, ni nikosho ni Nayuda nkanaathanlhiya. 17 Nkayaawiiha vakhiviru mahimo o nikosho ni Nayuda nihimo kaanyuma yo nihimo, ni nihimo ni Nazerahi nkanaathanlhiya. Nkaawiiha vakhiviru attu o nihimo ni Nazerahi, mmuchi kaanyuma ya mmuchi ni mmuchi a Nazabdi nkaathanlhiya. 18 Nayoshua ahaawiiha mmuchi a Nazabdi vakhiviru, ntu kaanyuma yo ntu, Naakani anaaya Nakarmi, anaaya Nazabdi, anaaya Nazera o nikosho ni Nayuda ahothanlhiya.

19 Nayoshua nkayeerelha Naakani, "Anaaka mwaathimicheke Apwiiya Nlhuku, Nlhuku o Uisraeli, mwaatotopelheke, yamalhaka nkihimerieke chilhe chipangilhe inyu chilhe, wala nhikivithe."

20 Naakani nkayaakhulha, "We ikekheene! Kihowonya umihoolho wa Apwiiya Nlhuku, Nlhuku o Uisraeli. Ni chiichammo phi pangilhe aka; 21 Voonilhe aka ikuwo imoka yorera ukhuma Ushinari yo chittu chikushiye, ikilo imia piilhi cho nchurukhu ni mwiithi wo idhahabu yo ulhemelha wo ikilo makhumi nthanu, kahothanana nkakaakusha, kihoothipelha vathi nnihemani mwaka, ni nchurukhu uri wuuthi wo chechiyo chittu chiyo."

22 Paahi Nayoshua nkaaruma attu ni ayo nkayattimakelha unihemani wa Naakani. Ikekhiaye, chittu chiyo chaari chinavithiye unihemani ni nchurukhu waari wuuthi waya. 23 Nkayaakusha ukhuma unihemani ni urweeha wa Nayoshua ni attu onkhaye o Uisraeli, ni ayo nkayeesha vathi umihoolho wa Apwiiya Nlhuku. 24 Nayoshua vamoka ni attu o Uisraeli onkhaye nkayaakusha Naakani, anaaya Nazera vamoka ni nchurukhu, ikuwo ilhe, idhahabu, achishana aya ashilhopwana ni ashithiyana, ing'ope, iphuta, ikhondoro chaya, nihema naya ni kila ittu yaarina aya ni waarweha nikoote no Uakori. 25 Nayoshua nkayaakoha Naakani "Wo nlhatu waani nhoooniwihera wu uhuva? Apwiiya Nlhuku anouwiiherani uhuva inyuva mwaanene lhelho nna." Attu o Uisraeli onkhaye nkayaata Naakani wo malhuku mpaka nkayaakhwa. phi, nkayaata manyaalhoko aya onkhaye wo malhuku mpaka nkayaakhwacha, nkayarimeelhihiya onkhaye wo mooro. 26 Chiicho Nkayookelha malhuku menchi vachulhu waya, ariwo mpaka lhelho. Vavawo urushiya wa Apwiiya Nlhuku nkawaawolha, ni vavawo vakittu vavawo nkaveehaniya nikoote no Uakori, mpaka lhelho nna.

Urushiya wa Apwiiya Nlhuku nkawaatondova.