1 Attu o nikosho ni Namanase ari nttara ni Nayusufu, ni ayo ahovahachiya ilhapo yo ukhalha wo woopelhiya ikhura. Namakiri o nttara ni Namanase ari athumwanaya Nagileadi, ahomalha uvahiya iwani yo Ugileadi ni Ubashani, ukhalhawaya ari ntu o wiilhipa ukhotoni. 2 Attu akina o nikosho ni Namanase aahanlhe, ahovahiya ilhapo aya wo woopelhiya ikhura, wo ulhikaana ni mahimo aya. Yayo mahimo ayo ari a Naabiezeri, Naheleki, Nasrieli, Nashekemu, Naheferi ni Nashemida ari onkhaye ari mattara ashilhopwana a Namanase anaya Nayusufu.

3 Nansho Naselofehadi anaya Naheferi, anaaya Nagileadi, anaaya Namakiri, anaaya Namanase, khayaari ni achishana ashilhopwana, nansho arii ni achishana ashithiyanaru, ni ayo ari Mahla, Noa, Hogla, Milka ni Tirza. 4 Yayo achishana ashithiyana ayo ahowa wa opochera ishaani Naeleazari ni Nayoshua, anaya Nanuni, ni wa aholhelhi akina ni weerelha, "Apwiiya Nlhuku ahaalhehera ashinna Musa wiira animeelhe ni hii onkhaye ilhapo thoko chinomeelhiya aya manyaalhopwana o nikosho ihu." Paahi wo ulhikaana ni malhehero a Apwiiya Nlhuku, Nayoshua ahaavahacha ilhapo thoko chaavahiye aya manyaalhopwana o nikosho naya. 5 Nkutiro u Namanase naari mipatta khumi ni mika yo ilhapo yaani ilhapo yo Ugileadi ni yo Ubashani irii ukhopelhelhe wo mwoolhoko wo Uyorodani, 6 ukhalhawaya achishana ashithiyana a Namanase ahomeelhachiya vakittu waya thoko chaameelhiye aya manyaalhopwana o nikosho naya. Ilhapo yo Ugileadi ahovahiya achishana akina a Namanase.

7 Ilhapo yo nikosho ni Namanase naachokhonlhe Uasheri ni urwaa mpaka Umikmethathi unosha nchuwa Ushekemu, tho mwiinano aya mwahorwaa uchawa mpaka ilhapo yaakhalha ya attu o Uentapua. 8 Ilhapo yo Utapua yaari i Namanase, nansho iwani yo Tapua, yo umwiinanoni, yaari ya achishana a Naefraimu. 9 Mwiinano wa Manase uyo ahothepa urwaa mpaka nshepa no Ukana. Iwani chaari mpata wo uchawa wo Ukana chaari cha Aefraimu inakhalhaka chaari mwiilhaponi mwa attu o nikosho ni Namanase. Tho, mwiinano wahovira uchulhu wo nshepa no Ukana ni umalhelha ibahari yo Umediteraniya. 10 Ilhapo yo mpata wo uchawa yaari ya attu o nikosho ni Naefraimu, ni ilhapo no uchulhu nari na attu o nikosho ni Namanase, mwiinano aya ukhalhaka ibahari yo Umediteraniya, wo mpata uneelha nchuwa. Attu o nikosho ni Naasheri naakhalha uneelha nchuwa wo nikosho ni Namanase, ari attu o nikosho ni Naisakari mpata unosha nchuwa naari nikosho ni Naisakari. 11 Thothoni tho, mwiilhaponi mwa attu o nikosho ni Naisakari ni nikosho ni Naasheri, attu o nikosho ni Namanase ahovahiya iwani cho Ubetisheani ni Uibleamu vamoka ni ittoko chaya, ni iwani cho Udori, Ugedori, Naanaki ni Umegido vamoka ni anenchi ni ittoko chaya, tho, mpata mmoka wo mipatta miraru cho Unafathi. 12 Nansho achishana a Namanase khayoonrie woomolhacha anenchi aakhalhacha chechiyo iwani chiyo, attu o Ukanaani nkayaathepa ukhalha mwommo, 13 inakhalhaka ata baada yo attu o Uisraeli ukhalha ni machiri chinene, khayoonrie woomolha Akaanani kila nansho waavariha ntheko wo waakhanyereriha.

14 Paahi attu o nikosho ni Nayusufu ahorwaa wa Nayoshua ni weerelha, "Chani woonaka nnimenlhe mpata mmoka etu wo ilhapo hii nivahiye ibarakha ni Apwiiya Nlhuku va, ata nkaanipanga ukhalha attu enchi?"

15 Nayoshua nkaakhulha wo wiira, "Yakhalhaka nhenchiva thoko chiicho, ata ilhapo yo miako cho Efraimu khinoothoshani tho, paahi nrweeke etu mwiithuphini ilhapo ya attu o Uperizi ni ya Arefai, mwawuheke yeyo ithuphi iyo, mweesheke mapuro inyu wowo."

16 Ni ayo nkayaakhulhacha wo wiira, "Eiyo, wo ikekhiaye ilhapo yo miako ilha khinonithosha, ata inakhalhaka chiicho etu, attu o Ukanaani onkhaye anokhalhacha ilhapo yo uhikhalhe miako ahanaa nkukuta cho yuuma, tho, onkhaye anokhalhacha Ubethsheani vamoka ni iwani chaya, ni alhe anokhalhacha nikoote no Nayezreeli."

17 Paahi, Nayoshua aheerelha achishana a Nayusufu, yaani attu o nikosho ni Naefraimu ni Namanase wiira, "Wo ikekhiaye mwaatti nhenchiva ni o ikuru yulhupalhe. khavanlhoka wiira mpatte vakittu vamoka etu. 18 Nansho tho, ilhapo yo umiakoni inokhalha yawinyu. Inakhalhaka vano iri ithuphiru, mwooheke ni uvarelha ukhalha yawinyu, toka ulha mpata ulha mpaka mpata nkina. Mwoomolhacheke attu o Ukanaani, ata anakhalhaka ihaana nkukuta cho yuuma ni attu o machiri."