1 Attu onkhaye Yamalheke ulhapuwa mwoolhoko wo Uyorodani, Apwiiya Nlhuku nkayeerelha Nayoshua wiira, 2 "Mwaathanlhe attu khumi ni eelhi munlhokoni mwa attu o Uisraeli ayo, yaani ntu mmoka kila nikosho, 3 mwaalhehereke cho; ‘Nkusheke malhuku khumi ni meelhi ukhuma variyari yo mwoolhoko wo Uyorodani, ukhuma vaa varii mieto cha opochera ishaani, nkusheke yayo malhuku ayo, mwookelheke vakittu vanohalha inyu urupelha uhiyu wo lhelho ulha vawo’ "

4 Nayoshua nkayeehana attu khumi ni eelhi yaathanlhe aya munlhokoni mwa attu o Uisraeli, kila nikosho ntu mmoka, 5 nkayeerelha, "Nhoolheke Nsanduku no Malhehano na Apwiiya Nlhuku, Nlhuku inyu, mpaka iriyari yo mwoolhoko wo Uyorodani. Kila mmoka inyu akusheke nlhuku nimoka wo nlhatu no kila nikosho no attu o Uisraeli. 6 Yoyo mwaha uyo unookhalha ittu yo wooniya uwaninyu. Ni achishana inyu vanohalha aya ukohani mahuku anowa, chani alha mahuku alha aarina maana ni uwaninyu? 7 Mwaattiva mweerelheke, ‘Nsanduku no Malhehano na Apwiiya Nlhuku vaavirihiye aya umwoolhokoni uwo, maashi aheemesha ahikhoolhe.’ Wo chiichammo etu, alha malhuku alha anookhalha moopusho wa attu o Uisraeli iyaakha cho uhimalha."

8 Manyaalhopwana alhe nkayaapanga thoko chaalheheriye aya ni Nayoshua, nkayaakusha malhuku khumi ni meelhi ukhuma variyari yo mwoolhoko wo Uyorodani, nlhuku nimoka wo nlhatu no kila nikosho no attu o Uisraeli, thoko Apwiiya Nlhuku cheerenlhe aya Nayoshua, nkayaarwaana mpaka valhe vakittu varupenlhe aya nkayeesha wowo. 9 Nayoshua chiicho aheemesha malhuku khumi ni meelhi iriyari yo mwoolhoko wo Uyorodani, vakittu veemenlhe aya inyaa cha opochera ishaani yaakhushilhe Nsanduku no malhehano alhe. Yayo malhuku ayo ahaawo mpaka lhelho nna.

10 Opochera ishaani yaakushilhe Nsanduku no Malhehano alhe, aheemelha iriyari yo mwoolhoko wo Uyorodani mpaka attu vaamalhihilhe aya uphanga kila ittu Apwiiya Nlhuku yaalhehenre aya Nayoshua aahimerie attu. Nayoshua ahopanga chonkhaye chaalheheriye aya ni ashinna Musa. Attu nkayaakuvia ulhapuwa mwoolhoko. 11 Attu onkhaye Yamalheke ulhapuwa, opochera ishaani alhe nkayahoolhelha uhoolho ni Nsanduku no malhehano na Apwiiya Nlhuku nne. 12 Manyaalhopwana o makosho a Narobeni ni Nagadi ni inusu yo nikosho ni Namanase anari ni ikerero chaya cho waatakanelha ikhoto, ahaaholhelha attu o Uisraeli, thoko chaalheheriye aya ni ashinna Musa. 13 Wo uholhelhiya ni Apwiiya Nlhuku, attu o malhaku alufu arubaini anavanre ikerero chaya cho waatakanelha ikhoto, ahovira akelhelhaka uhito wo iwani yo Uyeriko.

14 Nenno nihuku nno Apwiiya Nlhuku nkayaapanga attu o Uisraeli onkhaye achuwelhe wiira Nayoshua phi nholhelhi aya, ni ayo nkayeewelhelha Nayoshua mahuku aya onkhaye thoko cheewelhenlhe aya ashinna Musa mahuku aya onkhaye.

15 Yamalheke Apwiiya Nlhuku nkayeerelha Nayoshua wiira, 16 aalhehereke opochera ishaani anookusha Nsanduku no Malhehano, athameke mmwoolhokoni Uyorodani. 17 Paahi, Nayoshua nkayaalhehera opochera ishaani alhe, "Nthamache mmwolhokoni Uyorodani." 18 Ni opochera ishaani aakushilhe Nsanduku no Malhehano na Apwiiya Nlhuku ahothama iriyari yo mwoolhoko wo Uyorodani, ni unyikhalha mwiinano wo mwoolhoko. Ni vavawo maashi o mwoolhoko wo Uyorodani ahochokholha ukhoolha tho, ni uchara thoko varachi.

19 Attu o Uisraeli aholhapuwa mwoolhoko wo Uyorodani nihuku no khumi no mweeri wo uchokholha, nkayeesha nipuro uwo iwani yo Ugilgali, unoshelha nchuwa iwani yo Uyeriko. 20 Nayoshua nkayeemesha malhuku khumi ni meelhi Ugilgali akushilhe aya ukhuma umwoolhokoni Uyorodani. 21 Nayoshua nkayeerelha attu o Uisraeli wiira, "Achishana inyu vanohalha aya ukohani mahuku anowa o uhoolho, ‘chani, alha malhuku alha ari ni marumbo ni?’ 22 Mmweeke Mweerelha wiira, attu o Uisraeli aholhapuwa ulha mwoolhoko wo Uyorodani ulha vakittu vo wuuma. 23 Mweerelheke wiira Apwiiya Nlhuku, Nlhuku inyu, yoomihilhe maashi o mwoolhoko wo Uyorodani wo nlhatu winyu mpaka nkamwaalhapuwa, thoko choomihilhe aya ibahari yo Ushamu wo nlhatu ihu mpaka nkanaalhapuwa. 24 Wiira attu onkhaye o ilhapo achuwelhe wiira moono wa Apwiiya Nlhuku urina machiri, ni inyu mwaathimicheke Apwiiya Nlhuku inyu mahuku onkhaye o uhimalha."