1 Ikhura yo nayelhi yaapante attu o nikosho ni Nasimeoni ni mpata wo ilhapo aya waarukurerie ni ilhapo ya attu o nikosho ni Nayuda. 2 Attu o nikosho ni Nasimeoni aapante iwani cho Ubeersheba, Usheba, Umolada 3 Uhasarshuali, Ubala, Uesemu, 4 Ueltoladi, Ubethuli, Uhorima, 5 Usiklagi, Ubethmarkabothi, Uhasarsusa, 6 Ubeth lebaothi ni Usharuheni. Iwani chonkhaye chaavahiye aya chaari khumi ni ttaru vamoka ni ittoko chaya. 7 Tho wahokhalha iwani cho enrimoni, Uaini Uetheri, ni Uashani. Iwani chonkhaye chaavahiye aya chaari ncheshe vamoka ni ittoko chaya. 8 Vamoka ni iwani chonkhaye ni ittoko chonkhaye chinorukureria iwani mpaka Ubaalathbeeri, ama Uraama, yo Unegebu. Chonkhaye chiyo phi chaari ilhapo chaavahiye aya attu o nikosho ni Nasimeoni. 9 Ukhalhawaya vakittu velhapo yaavahiye aya attu o nikosho ni Nayuda yaari yulhupalhe upwaha nikosho nno chaathanana aya, ilhapo aya aavahiye nikosho ni Nasimeoni.

10 Ikhura yo neraru yaapante attu o nikosho ni Nazabuloni. Ilhapo aya yahowanelha mpaka Usaridi. 11 Ukhuma wowo mwiinano aya mwahorwaa uneelha chuwa mpaka Umareali, nkawaavira vachereshere mwo Udabeshethi ni urwaa nshepa niri unosha nchuwa Uyokneamu. 12 Ukhuma Usaridi, mwiinano uyo waakenlhe unosha nchuwa mpaka mwiinano wo Ukisloth tabori, ni uthama vavawo waavinre Udaberathi mpaka Uyafia. 13 Ukhuma Uyafia mwiinano mwahorwaa unosha nchuwa mpaka Ugath heferi, Ueth kasini, ni uthepa mpaka Urimoni waawenlhe aya mpaka Unea. 14 Mpata wo uchulhu mwiinano wahorukunuwa ukelha Uhanathoni ni umalhelha nikoote no Uyiftaheli. 15 Nkawaathakaniha iwani cho Ukatathi, Unahalali, Ushimroni, Uyidala ni Ubeth lehemu. Iwani chonkhaye chaavahiye aya chaari khumi ni piilhi vamoka ni ittoko chaya. 16 Chechiyo phi mipatta chaavahiye aya attu o nikosho ni Nazabuloni, iwani vamoka ni ittoko chaya.

17 Ikhura yo necheshe yaapante attu o nikosho ni Naisakari. 18 Ilhapo inene iyo yaari iwani cho Nayezreeli, Ukesulothi, Ushunemu, 19 Uhafaraimu, Ushioni, Unaharathi, 20 Urabithi, Ukishioni, Uebesi, 21 Uremethi, ganimu, Uen hada ni Ubethpasesi. 22 Thothoni tho, mwiinano aya wahophiya Utabori, Ushahasuma, Ubeth shemeshi ni umalhelha mwoolhoko wo Uyorodani. Iwani chonkhaye chaavahiye aya chaari khumi ni sita vamoka ni ittoko chaya. 23 Chechiyo phi ilhapo chaavahiye aya attu o nikosho ni Naisakari, iwani vamoka ni ittoko chaya.

24 Ikhura yo nethanu yaapante attu o nikosho ni Naasheri. 25 Ilhapo aya yaari iwani cho Uhelkathi, Uhali, Ubeteni, Uakshafi, 26 Ualameleki, Uamadi ni Umishali. Mpata uneelha nchuwa mwiinano wahophiya mwaako o Ukarmeli ni Ushihorlibnathi. 27 Yamalheke wahorukunuwa ukelha unosha nchuwa urwaa Ubeth dagoni waavaranne ni Uzebuloni ni nikoote no Uiftaheli. Tho, nkawaarwaa mpata wo uchulhu mpaha Ubeth emeki, Uneieli ni uthepa urwaa mpata wo uchulhu mpaka Ukabuli, 28 Uhebroni, Urehobu, Uhamoni, Ukana mpaka Usidoni Wulhupalhe. 29 Vavawo, mwiinano wahorukunuwa ukelha Uraama ni ulhiya iwani yo Utiro yaarukureriye ni ingome. Nkawaarukunuwa ukelhelha Uhosa ni umalhelha ibahari yo Umediteraniya. Iwani chikina chaari Umaharabu, Uakizibu, 30 Uuma, Uafeka ni Urehobu. Iwani chonkhaye chaavahiye aya chaari makhumi meelhi ni piilhi vamoka ni ittoko chaya. 31 Chechiyo ilhapo chiyo phi chiyo chaavahiye aya attu o nikosho ni Naasheri, iwani chiyo vamoka ni ittoko chaya.

32 Ikhura yo sita yaapante attu o nikosho ni Nanaftali. 33 Mwiinano aya waachokholhenlhe Uhelefu ni mwiri muulhupalhe u Nazananimu, nkawaavira Uadami nekebu ni Uyabneeli mpaka Ulakumu ni umalhelha mwoolhoko wo Uyorodani. 34 Uthama vavawo mwiinano mwahorwaa uneelha nchuwa ulhukama Uaznoth tabori, ni toka wowo nkawaarwaa Uhakoki ni uvaraana ni mpata wo uchawa wo ilhapo ya attu o nikosho ni Nazabuloni, nkawavaraana ni ilhapo yo attu o nikosho ni Naasheri wo mpata uneelha nchuwa, ni uvaraana ni ilhapo ya attu o Uyuda. Mpata unosha nchuwa mwiinano wahokelha mwoolhoko wo Uyorodani. 35 Iwani chaya chaarukureriye ni ingome chaari, Uzidimu, Uzeri, Uhamathi, Urakathi, Ukinerethi, 36 Uadama, Uraama, Uhazori, 37 Ukedeshi, Uedrei, Uen Uhazori, 38 Uyironi, Umigdaleli, Uhoremu, Ubeth anathi ni Ubeth shemeshi. Iwani chonkhaye chaavahiye aya chaari tisa vamoka ni ittoko chaya. 39 Chechiyo phi iwani chaavahiye aya attu o nikosho ni Nanaftali iwani vamoka ni ittoko chaya.

40 Ikhura yo saba yaapante attu o nikosho ni Unadani. 41 Ilhapo aya yaari ni iwani cho Usora, Ueshtaoli, Uirshemeshi 42 Ushaalabini, Uaiyaloni, Uyithla, 43 Ueloni, Utimna, Uekroni 44 Uelteke, Ugibethoni, Ubaalathi, 45 Uyehudi, Ubene beraki, Ugathrimoni, 46 Umeyarkoni ni Urakoni ni ilhapo yaari vakhiviru ni Uyopa. 47 Attu o nikosho ni Unadani koriyaalhe ukusha ilhapo yaavahiye, ahorwaa ni ukelhelha iwani yo Uleshemu. Nkayaakottolha ni uvara mateeka, ni baada yo weevakacha attu aakhalha mwommo ayo onkhaye, ahokusha iwani iyo ni unvaha nchina no naanano ukhalha iwani yo Urdani; nchina naari na apwiiya aya. 48 Chechiyo phi ilhapo chaavahiye aya attu o nikosho ni Unadani, iwani vamoka ni ittoko chaya.

49 Vaamalhinhe aya umeelhana ilhapo yonkhaye, attu o Uisraeli ahaavara Nayoshua, anaaya Nanuni, mpata aya variyari aya. 50 Wo ulhikaana ni malhehero a Apwiiya Nlhuku ahovahiya ilhapo yaathanlhilhe aya Nayoshua, yaani iwani yo Utimnath sera, yaari wi ilhapo yo umiakoni yo Efraimu. Ni Nayoshua ahotheka tho yeyo iwani iyo ni ukhalha mwommo.

51 Paahi, opochera ishaani Naeleazari ni Nayoshua, anaaya Nanuni, vamoka ni manyaaholhelhi o makosho a attu o Uisraeli ahomianiha mipatta cho ilhapo chiyo wo woopelhiya ikhura umihoolho wa Apwiiya Nlhuku, vanlhakoni wo Nihema Nitakatifu Ushilo uwo. Paahi nkayaamalhiha ukawaniha ilhapo.