1 Yamalheke, Nayoshua ahaakumaaniha attu o makosho onkhaye a attu o Uisraeli Ushekemu uwo. Nkayeehanacha ashulhupalhe, aholhelhi, attu o waamulha, ni manyaaholhelhi a attu o Uisraeli, ni ayo ahowaacha umihoolho wa Apwiiya Nlhuku. 2 Nayoshua nkayeerelha attu ayo wiira, "Apwiiya Nlhuku, Nlhuku a attu o Uisraeli, aneera wiira: Khalhai vawo, manyaapwiiya inyu aakhalha ukhopelhelhe mwoolhoko wo Uyufrati, nkayaakavihera milhuku chikina. Ashulhupalhe amoka ari Natera, athumwanaya Aburahimu ni Nanahori. 3 Mii Nlhuku kahaathamiha athumwaninyu Aburahimu ukhuma wowo ukhopelhelhe mwoolhoko wo Uyufrati ni waawiiha Vakanaani va, waavanhe aka achishana enchi. Kahaavaha Isaka, 4 ni Naisaka kahaavaha Yakobo ni Esau. Kaavanhe Esau miako cho Useiri wiira ikhalhe yawaya. Nansho Nayakhobo ni achishana aya ahorwaa Umisri. 5 Kaanyuma kahaaruma ashinna Musa ni Naharuni, nkakaakurusha mariro, ni kaanyuma nkakookumihani mwaatti wowo. 6 Kahaakumiha ashulhupalhe inyu ukhuma Umisri ni waawiiha mpaka ibahari yo Ushamu. Attu o Umisri ahaatwarelhelha ni nkukuta chaya ni manyaasikari o waawelha a farasi. 7 Attu o Uisraeli vaakulhenlhe aya mii Apwiiya Nlhuku, kahoripelhiha variyari aya, attu o Umisri ni ibahari nkayaakhunelha attu o Umisri. Mwaatti mwaashinene mwahoona kaapangenlhe aka attu o Umisri. Nkamwaakhalha uthakoni iyaakha chinchi. 8 Yamalheke kahaaholhelha mpaka wi ilhapo ya Aamori aakhalha mpata nkina wo mwoolhoko wo Uyorodani. Nkaatakana ni inyu mwaatti, nansho mii kahouvahani machiri o waakottolha nkamwaalhakalhiha ni uvara mateeka ilhapo aya. 9 Ni Nabalaki anaaya Nasipori, amwene o Umoabu ni ayo ahowa ukelhelha attu o Uisraeli. Nkayaalhatulha Nabalaamu anaaya Nabeori wiira awe oolhavani mwaatti. 10 Nansho mii akeewelhenlhe Nabalaamu, ni ayo nkayoovahani ibarakha, ni mii nkakowookholhani mwaatti ukhuma u Nabalaki. 11 Yamalheke nkamwaalhapuwa mwoolhoko wo Uyorodani, nkamwaaphiya Uyeriko. Attu o Uyeriko nkaatakana ni inyu mwaatti, tho attu o Uamori, o Uperizi, o Ukanaani, o Uhiti, o Ugirgashi, o Hivi ni no Uyebusi. Yayo mii kahookottolhelhani. 12 Kahoruma matendehu umihoolho winyu oomolhanche mamwene eelhi o Uamori. Khamwaapannge yayo wo ukusha uphanga mena miupa chinyu.

13 "Kahoovahani imata chahaalhimilhe inyu, ni iwani a chahaathekilhe inyu nnokhalhacha inyu vano, ni ulhia maphepu o mizabibu ni o mizeituni chihaalhilhe inyu.

14 "Vano, paahi etu mwaathimicheke Apwiiya Nlhuku ni uvara mitheko chaya wo nrima wo wookwaa ni wo ukhulhuvelhiya. Nhiyeke kabisa milhuku chaathiminche aya manyaapwiiya inyu ukhopelhelhe mwoolhoko wo Uyufrati ni wiilhaponi Umisri. Mwaakavihereke Apwiiya Nlhuku. 15 Yakhalhaka khannottuna waakavihera Apwiiya Nlhuku, paahi etu nthanlheke lhelho vava phi mpani nnohalha inyu unkavihera: Wiira milhuku chaathiminche aya manyaapwiiya inyu chilhe ukhopelhelhe mwoolhoko wo Uyufrati, ama milhuku cha Aamori nnokhalha inyu mwiilhaponi mwaya. Nansho mii ni inupa aka ninohalha waakavihera Apwiiya Nlhuku."

16 Vavawo attu nkayaakhulha yeeraka, "Khaninooria mena waahiya Apwiiya Nlhuku ni ukavihera milhuku chikina. 17 Ukhalhawaya Apwiiya Nlhuku, Nlhuku ihu, phi nikumihilhe hii vamoka ni ashulhupalhe ihu ukhuma ilhapo yo Umisri waari ihu ipotta, nahoona wo miitho ihu mitheko cho ushangiha chaanipangenlhe aya. Nkayaaninkelha munkwahani mwihu mwonkhaye ni mmilhokoni mwa attu onkhaye o ilhapo chaavinre ihu. 18 Apwiiya Nlhuku ahaathamihacha attu onkhaye yaani Aamori onkhaye aakhalha mwiilhaponi. Paahi, ni hii ninowaakavihera Apwiiya Nlhuku, ukhalhawaya phi Nlhuku ihu."

19 Nansho Nayoshua nkayeerelha, "Mwaatti khanooria waakavihera Apwiiya Nlhuku, ukhalhawaya yayo Atakatifu. Yayo phi Nlhuku i ihache, ni ayo nkhanouhiyererani uwonya winyu. 20 Mwaahiyaka Apwiiya Nlhuku ni ukavihera milhuku chilheto, anoutwarushani ni ulhakalhihani kabisa, inakhalhaka ahoopangelhani moombone onkhaye alha."

21 Ni attu ayo nkayeerelha Nayoshua wiira, "Atha mena! Hii ninowaakavihera Apwiiya Nlhuku etu."

22 Vavawo Nayoshua nkayeerelha wiira, "Mwaattiva mwaanene phi o uhimiechesha minepa chinyu wiira nhothanlha waakavihera Apwiiya Nlhuku."

Ni ayo nkayaakhulhacha, "Hii phi o uhimiechesha."

23 Ni ayo nkeera, "Paahi etu nthamihacheke milhuku chinyu chilheto chirina inyu chiyo, mwaattwareke Apwiiya Nlhuku, Nlhuku a attu o Uisraeli, wo nrima winyu wonkhaye."

24 Ni ayo, nkayeeracha, "Ninowakavihera ni waarumelhelha Apwiiya Nlhuku, Nlhuku ihu."

25 Paahi, Nayoshua nkaapanga malhehano ni attu o Uisraeli Ushekemu uwo, nkaavaha ikano ni malheheriyo o utwara. 26 Nayoshua nkaalhepa alha onkhaye alha nhina ikitabu yo malhehero a Nlhuku; amalhiheke, ahokusha nlhuku nuulhupalhe ni weemesha wuuthi mwiri mulhupalhe u nihema na Apwiiya Nlhuku. 27 Yamalheke aheerelha attu onkhaye wiira, "Nna nlhuku nna phi nohalha uhimiechesha uwaninyu, ukhalhawaya niheewa malhove onkhaye anihimenrie aya Apwiiya Nlhuku. Paahi etu, ninouhimiecheshani, wiira nhiwe mwaaruna Apwiiya Nlhuku inyu." 28 Kaanyuma aya Nayoshua nkaalhelha attu wiira arwaacheke, kila mmoka nkaarwaa uwannyawe.

29 Baada wo yoyo mwaha uyo, Nayoshua, anaya Nanuni ni namitheko a Apwiiya Nlhuku, ahorimeelha, anari ni iyaakha imia imoka ni khumi. 30 Ni attu ayo ahavitha unihiyeni vakittu vaamenlhe aya ukhalha vawaya, Utimnath sera, umiakoni Efraimu, mpata wo uchulhu wo mwaako wo Ugaashi.

31 Attu o Uisraeli ahovara mitheko cha Apwiiya Nlhuku mahuku onkhaye o ukumi u Nayoshua, ni baada yo ukhwa waya, ahothepa waakavihera mahuku onkhaye aalhokenlhe aya manyaapwiiya aya oonne wo miitho aya mitheko chaapangiye ni Apwiiya Nlhuku waapangelha attu o Uisraeli.

32 Makhuva a Nayusufu aawihiye ni attu o Uisraeli ukhuma Umisri ahovithiya Ushekemu, vakittu vaathumme aya Nayakhobo ukhuma wa achishana a Nahamori, athumwanaya Nashekemu, wo ikipande imia imoka cho isiliva. Yeyo ilhapo iyo ni iyo nkayaakhalha ya ayari a Nayusufu.

33 Ni ayo Naeliazari, anaaya Naharuni, nkayaarihia ni uvithiya Ugibea, iwani yaavahye aya anaaya, Nafiniasi ilhapo yo umiakoni yo Efraimu.