1 Wichishuru washeekeru, Nayoshua vamoka ni attu onkhaye o Uisraeli ahochokholha nkwaha wo ukhuma Ushitimu. Yaphiyeke mwoolhoko wo Uyorodani, aheesha nipuro vavawo wo ikatema, ahinaaya ulhapuwa. 2 Kaanyuma yo mahuku mararu, ahoolhelhi ahovira variyari wo nipuro nno, 3 nkayeerelha attu wiira, "Vanohalha inyu woona Nsanduku no Malhehano na Apwiiya Nlhuku, Nlhuku inyu, ninakushiye ni opochera ishaani Alawi nthameke ni utwara. 4 Nansho nhaatamerie chinene Nsanduku no Malhehano nno, nkhalheke utayi wo ikilometa imoka cho, wiira nchuwelheke iphiro yo ukelhelha, ukhalhawaya khannavira ilha iphiro ilha."

5 Nayoshua nkayeerelha attu, "Mwiitturieke, ukhalhawaya meelho Apwiiya Nlhuku anopanga ittu yo ushangiha variyari inyu." 6 Yamalheke Nayoshua nkayeerelha opochera ishaani, "Nkusheke Nsanduku no Malhehano nhoolhelheke uhoolho wa attu." Ni ayo nkayaakusha nkayaahoohelha uhoolho wa attu.

7 Apwiiya Nlhuku nkayeerelha Nayoshua, "Lhelho nna, kinoochokolha wooniha attu onkhaye o Uisraeli wiira inyuva phi nholhelhi aya, thoko chaari aka ni ashinna Musa, phi chiichammo chinohalha aka ukhalha vamoka ni inyuva. 8 Mwaalhehereke opochera ishaani anookusha Nsanduku no Malhehano mweerelheke emelhache vakiviru mmaashini, mwiinano wo mwoolhoko wo Uyorodani vanohalha aya uphiya wowo vawo."

9 Yamalheke, Nayoshua nkayeerelha attu o Uisraeli, "Mmweeke vakhiviru, mwiiwe malhove a Apwiiya Nlhuku inyu." 10 Nayoshua nkayaathepa waahimeria wiira, "Nlhuku ri nkumi ri variyari inyu neera wiira, nowoomolhacha uhoolho winyu attu o Ukanaani, attu o Uhiti, attu o Hivi, attu o Uperizi, attu o Ugirgashi ni attu o Uamoni wayebusi. 11 Mmweheke, Nsanduku no Malhehano na Athithi o ilhapo yonkhaye, nihaatameria uvira uhoolho winyu ulhapuwa mwoolhoko wo Uyorodani. 12 Vano, mwanthanlheke attu khumi ni eelhi ukhuma makosho o Uisraeli, kila nikosho akhumeke ntu mmoka. 13 Ikatema inyaa cha opochera ishaani anookusha Nsanduku no Malhehano na Apwiiya Nlhuku, Athithi o ilhapo yonkhaye vanohalha aya ukelha mmaashini, umwoolhokoni uwo, maashi anokhoolha ukhuma mpata wo uchulhu anoothothokana vamoka thoko ni ukhalha thoko nipuhe."

14 Paahi attu nkayaathama vamapuroni waya ni urwaa ulhapuwani mwoolhoko wo Uyorodani, ni opochera ishaani anookusha Nsanduku no Malhehano alhe yahaaholhelha attu uholho. 15 Ni nkwaha etu yayo aankushe Nsanduku no Malhehano inyaa chaya chanyikalheke mwiinano wo mwoolhoko wo Uyorodani,

Mwolhoko o Uyorodani wahochara ikatema wo nlhaalha, 16 maashi aakholha ukhuma uchulhu aheemelha ni ucharaana naawanelha mpaka Uadamu uwo, iwani yaatamanne ni iwani yo Usarathani. Maashi aakhoolha ya holhutana urwaa ibahari yo Maakha, ahowelhelha attu nkayaalhapuwa uhoolho wo Uyeriko. 17 Ikatema attu o Uisraeli vaalhapuwa aya, opochera ishaani aakusha Nsanduku aheemelha vakittu vo wuuma iriyari yo mwoolhoko Yorodani mpaka attu onkhaye nkayaalhapuwa.