1 Amwene Naadonisedeki o Uyerusalemu aheewa Nayoshua chenre aya wo uvara mateeka iwani yo Uai ni amwene aya ni ulhakalhiha yeyo iwani iyo thoko chaapangenlhe iwani yo Uyeriko ni amwene aya. Tho aheewa wiira anenchi o Ugibeoni ahaavia iphiro yo waathana wo mpuha ni Aisraeli ni wiira vano anokhalha munlhokoni mwaya. 2 Yoyo mwaha uyo wahohelha nipampa chinene iwani yo Uyerusalemu, ukhalhawaya iwani yo Ugibeoni yaari thoko iwani irii ni umwene. Ni tho yeyo iwani iyo yaari yo uchuwania upwaha iwani yo Uai ni manyaalhopwana aya onkhaye ari manyaasikari o uminda chinene. 3 Paahi Amwene Naadonisedeki nkayaaruma nttenga wa amwene Nahohamu, o Uhebroni, amwene Napiramu o Uyarmuthi, ni amwene Nayafia o Ulakishi ni amwene Nadebiri o Uegloni nkayeerelha, 4 "Mmwe nkikavihe naarimelhihe attu o Ugibeoni ukhalhawaya ahaavia iphiro yo waathana wo mpuha ni Nayoshua vamoka ni attu o Uisraeli." 5 Yamalheke, yayo mamwene athanu o Uamori ayo, amwene o Uyerusalemu, amwene o Uhebroni, amwene Nayarmuthi, amwene o Ulakishi, ni amwene o Uegloni, aholhutaaniha miphingo chaya, nkayaarwaana mpaka Ugibeoni, nkayeesha nipuro urukureriya yeyo iwani iyo, nkayaata.

6 Attu o Gibeoni nkayanrweeha nttenga u Nayoshua unipuroni Ugilgali uwo, nkayeerelha, "Chonte nhinihiye hiyaano akarumiya inyu, mwaakuvieke nniwe mwaanikaviha ni unoopolha, ukhalhawaya mamwene onkhaye a Uamori ukhuma ilhapo cho umiakoni ahowa unaatakachani."

7 Paahi Nayoshua vamoka ni manyaasikari aya onkhaye ahothamacha Ugilgali. 8 Apwiiya Nlhuku nkayeerelha Nayoshua wiira, "Nhoove ata vakani ukhalhawaya kihaahelha mmiononi mwinyu, wala khaawo ata mmoka nohalha wooria uwaatani." 9 Baada yo weeta uhiyu wonkhaye ukhuma Ugilgali, Nayoshua ahaakhumelhelha, ahikhulhuvelhaka. 10 Apwiiya Nlhuku nkayaahelha nipampa nulhuphalhe uhoolho wa attu o Uisraeli yeevilhe attu enchi Ugibeoni uwo, nkayaatoporaniha wo iphiro yo inokuruwa ukelhelha uhito wo Ubethhoroni, mpaka Uazeka ni Umakeda, ni uwo weevilhe aya attu enchi chinene chiicho uwo. 11 Vaari aya yaattawaka Aisraeli unokhuruwelha mwaako Ubethhoroni, Apwiiya Nlhuku ahoruphiha iphulha yo malhuku molhupalhe ukhuma wiirimu anari mphironi mpaka Uazeha, ata yaakhwiilhe wo yayo malhuku ayo nkayaakhalha enchi upwaha yeeviye ni ikerero cha attu o Uisraeli.

12 Ikatema ya Apwiiya Nlhuku vaakottonlhe aya Aamori, ni waahelha mmiononi mwa attu o Uisraeli Nayoshua yahaalhepelha Apwiiya Nlhuku uhoolho wa attu o Uisraeli onkhaye, eeraka wiira,

"Inyuva nchuwa,

mweemelhe etu vachulhu ilhapo yo Gibeoni,

Inyuva mweeri uhito wa Uayaloni."

13 Nchuwa nkaneemelha yii ni mweeri waheemelha mpaka ilhapo yo Uisraeli naalhivelhinhe aya amalhaponi aya. Thoko chaalhepilhe aya nhina ikitabu i Nayashari, nchuwa aheemelha yii variyari irimu, nkanaahiya nkwaha aya wo ukelha uwiilhani wo nihuku nonkhaye. 14 nihuku toka nenno khaninapacha ukhalha mena woonia tho, nihuku Apwiiya Nlhuku naamwiwelhenlhe aya ntu thoko chiichammo, ukhalhawaya Apwiiya Nlhuku anene ahenkelha attu o Uisraeli.

15 Yamalheke, Nayoshua ahohokolhia unipuroni Ugilgali uwo, vamoka ni attu o Uisraeli onkhaye.

16 Mamwene athanu alhe ahottawa ni wiivitha unikhukuni Umakeda. 17 Nayoshua nkayeewa wiira mamwene athanu ayo ahooniya ukittu wiivithilhe aya, unikhukuni Umakeda. 18 Nkeera, "Mpirikisheke malhuku molhupalhe vanlhakoni wo nikhuku vawo, ni weesha uhitelhelha. 19 Nansho mwaatti nhikhalhe wowo, Baali mwaattwareke amalhaponi inyu. Mwaatakacheke ukhuma mpata wo utulhi, ni mena nhaahiyerere akelhe mmawani mwaya, ukhalhawaya Apwiiya Nlhuku inyu, ahookottolhelhani." 20 Nayoshua vamoka ni attu o Uisraeli ahaatakacha ni waalhakalhiha onkhaye, ni akina vakani ahokulhuphuwa ni uttawelha mmawani mwaya mwaarukureriye ni ishiri. 21 Yamalheke yayo, attu o israeli ahohokolhia salama u Nayoshua unipuroni Umakeda, ni khaariwo tho ntu onrie wulhumacha ittu iriyoothe vachulhu attu o Uisraeli.

22 Yamalheke Nayoshua aheera, "Nhulheke nikhuku nno, mwaawiheke mamwene athanu alhe." 23 Nkayaapanga chiicho, ni waawiihera Nayoshua mamwene athanu alhe, yaani, Amwene o Uyerusalemu, amwene o Uhebroni, amwene o Uyarmuthi, amwene o Ulakishi ni amwene o Uegloni. 24 Mamwene ayo vaawihiye aya, Nayoshua aheehana attu onkhaye ni manyaaholhelhi o miphingo aattukanne aya ukhotoni, nkeerelhacha, "Nrwaacheke, mmwe mwaanyikalhacha mamwene alha nshikoni mwaya." Ni attu ayo ahochusheracha ni waanyikalhacha mmashikoni mwaya. 25 Nayoshua nkeerelha "Nhoove, mena nhikelhiye nipampa, mwiilhipiheke, ukhalhawaya cho phi chiichammo Apwiiya Nlhuku chinohalha aya waapangelha amalhaponi inyu onkhaye anohalha inyu waatakana. Paahi etu mwiilhipiheke rata." 26 Kaanyuma, Nayoshua aheevakacha mamwene wo waathomiacha vamwirini miri mithanu, mpaka uchechilho. 27 Ikatema nchuwa veelha aya, Nayoshua aholhehera wiira athamihiye mmirini mwaathomiachiye aya mmo, ni urihelhiya unikhukuni weevithanche aya. Yamalheke, aheesha malhuku molhupalhe vanlhakoni wo nikhuku vawo, ni yayo malhuku ayo ahawo mpaka lhelho nna.

28 Nenno nihuku Nayoshua naavanre aya mateeka iwani yo Umakeda nno, aheeva amwene ni attu aakhalhacha mwommo onkhaye wo unhihalhiha ata ntu mmoka. Nkaapangelha amwene o Umakeda thoko chaapangenlhe aya amwene o Uyeriko.

29 Ukhuma Umakeda, Nayoshua vamoka ni attu o Uisraeli onkhaye ahorwaa Ulibna, ni waatakacha ilhapo iyo. 30 Apwiiya Nlhuku nkayaakottolha yeyo iwani iyo vamoka ni amwene aya, mminoni wa Aisraeli, nkayeevakacha attu onkhaye wo nhinhiya ata ntu mmoka. nkayampangelha mwene o libna ukhuma aapangilhe amwene o Uyeriko.

31 Baada yo uthana Ulibna, Nayoshua ni attu o Uisraeli onkhaye ahorwaa Ulakishi, nkayaarukureria ni ukelhelha. 32 Apwiiya Nlhuku nkayaakottolha yeyo iwani iyo yo Ulakishi, ni uhelha mmiononi mwa attu o Uisraeli, nkayaavara mateeka nihuku no nayelhi. Nkayeevakacha attu onkhaye aakhalhacha mwommo, thoko chenre aya iwani yo Ulibna.

33 Vavawo amwene Nahoramu o Ugezeri ahowa uwaakavihani attu o Ulakishi. Nansho Nayoshua aheeva yayo vamoka ni attu aya onkhaye, wo uhinhalhiha ata mmoka.

34 Yamalheke uthana Ulakishi, Nayoshua ni attu o Uisraeli onkhaye ahorwaa mpaka Uegloni, nkayaarukureria ni ukelhelha. 35 Nkayaavara mateeka nenno nihuku ni weevakacha attu aakhalhacha wowo, thoko chenre aya wo iwani yo Ulakishi.

36 Tho, baada yo uthana Uegloni, Nayoshua ni attu o Uisraeli onkhaye ahorwaa mpaka Uhebroni, nkayaakelhelha 37 ni uvara mateeka. Nkayeevekacha attu onkhaye aakhalhacha wowo, vamoka ni mamwene aya, nkayaalhakalhiha lhakalhaka iwani chaatamana chiyo, ni weevakacha attu onkhaye thoko chenre aya wo iwani yo Uegloni.

38 Yamalhekeru, Nayoshua ni attu onkhaye o Uisraeli ahohokolhia Udebiri, nkayaakelhelha. 39 Nkayaavara mateeka iwani iyo ni amwene aya vamoka ni iwani chikina chaarukureria ni weevakacha attu onkhaye aariwo, wo uhinhalhiha ata ntu mmoka. Yaapannge chiicho yeyo iwani iyo, thoko chenre aya wo iwani cho Uhebroni ni Ulibna, ni mamwene aya.

40 Paahi, Nayoshua ahovara mateeka ilhapo yonkhaye, nkaakottolhacha mamwene o ilhapo cho umiakoni, ilhapo yo Unegebu, ni ilhapo yo uhikhalhe miako ni chinokhuruwelha umiakoni. Khayaahiilhe ittu iriyoothe ikumi, nansho aholhakalhiha kila ittu thoko Apwiiya Nlhuku o Uisraeli chenre aya wo ulhehera. 41 Nayoshua ahaakottolha attu onkhaye ukhuma Ukadeshbarnea mpaka Ugaza, ni ukhuma Ugosheni mpaka Ugibeoni. 42 Ahokusha ilhapo ilha yonkhaye, ukhalhawaya Apwiiya Nlhuku, Nlhuku a attu o Uisraeli ahaatakanelha attu o Uisraeli. 43 Paahi, Nayoshua ahohokolhia mpaka unipuroni Ugilgali uwo, vamoka ni attu o Uisraeli onkhaye.