1 Ilhapo yaameelhiye ayari o nikosho ni Nayusufu wo woopelhiya ikhura nachokhonlhe vakhiviru mwoolhoko wo Uyorodani, unosha nchuwa nrapo no Uyeriko, ni uvira uthakoni, mpaka miako cho Ubetheli. 2 Ukhuma Ubetheli mwiinano waholhukama Uluzu nkawaavira Uatarothi waakhalha aya Aarki. 3 Nkawaakhuruwa uneelha ilhapo ya Ayafleti mpaka Ubethhoroni wo vathi ni Ugezeri ni umalhelha ibahari yo Umediteraniya.

4 Ayari a Nayusufu, yaani nikosho ni Namanase ni nikosho ni Naefraimu, ahovahiya yeyo ilhapo iyo ukhalha yawaya.

5 Attu o nikosho ni Naefraimu wo ulhikaana ni imbumba chaya aapante ilhapo, mwiinano aya wo unosha nchuwa uviraka Uatarothadari mpaka Ubethhoroni yo Uchulhu, 6 ni umalhelha ibahari yo Umediteraniya. Mpata wo uchulhu waavinre Umikmethathi, ni unoshelha aya nchuwa wahorukureria ni ulhukama Utaana thshilo, waavinre aya unosha nchuwa Uyanoa. 7 Ukhuma Uyanoa mwahorwaa mpaka Uatarothi ni Unaara, nkawaaphiya Uyeriko, waamalhenlhe aya umwoolhokoni Uyorodani. 8 Ukhuma Utapua, mwiinano mwahorwaa uneelha nchuwa mpaka nshepa no Ukana ni umalhelha ibahari yo Umediteraniya. Yeyo phi ilhapo yaavahiye aya attu o nikosho ni Naefraimu wo ulhikaana ni imbumba chaya. 9 vamoka ni iwani ni ittoko chonchereriye Naefraimu aya ukhuma ilapo yo nikosho no Namanase. 10 Attu o nikosho ni Naefraimu khayoonrie woomolha attu o Ukanaani aakhalhacha Ugezeri. Yayo attu o Ukanaani ayo ahothepa ukhalha munlhokoni mwa attu o nikosho ni Naefraimu mpaka llhelho nna, akhalhe ipotta cho uvara mitheko chaya cho ukhanyererihiya.