1 Baada yo ukottolha ilhapo ilhe, nlhoko wonkhaye wa attu o Uisraeli wahokumaana Ushilo uwo ni weemesha Nihema Nitakatifu. 2 Nansho ahokhalha makosho saba ari ahinameelhiya ilhapo aya. 3 Paahi etu, Nayoshua aheerelha attu o Uisraeli wiira, "Chani, nhocherewa mpaka iyaakha wo uhirwaaka ukhalhelhani ilhapo ivahiye inyu ni Apwiiya Nlhuku, Nlhuku a manyaapwiiya inyu ilhe? 4 Nthanlheke attu araru ukhuma kila nikosho, kaarume mwiilhaponi mwonkhaye ahotelhe ni ulhepa iramani wo ulhikaana ni makosho aya, amalhihaka awe aakihimeria. 5 Ni ayo amianiheke ilhapo iyo mipatta saba. Nikosho ni Nayuda nihalheke ni mpata aya wo uchawa, ni nikosho ni Nayusufu mpata aya wo uchulhu. 6 Nlhepeke mwaha unaacha mipatta chonkhaye saba ni ukiwiihera. Vavawo kinowa woopa ikhura umihoolho wa Apwiiya Nlhuku, Nlhuku ihu, kichuwelhe mwaha unaacha mpata wo kila nikosho. 7 Nansho Alawi khanovahiya mpata uriyoothe munlhokoni mwinyu, ukhalhawaya mpata aya phi ukhalha opochera ishaani o waakavihera Apwiiya Nlhuku. Makosho a Nagadi, Narobeni ni nusu yo nikosho ni Namanase yayo ahomalha upatta mipatta chaya, unosha nchuwa mwoolhoko wo Uyorodani. Aavahiye wowo ni ashinna Musa, karumiya a Apwiiya Nlhuku."

8 Paahi, yayo attu ayo ahochokholha nkwaha wo urwaa uhotelhani ilhapo. Nansho ahinaaya uthama, Nayoshua ahaalhehera wiira, "Nrweeke mwiilhaponi mwonkhaye mwalhepe mwaha wo chittu cho ilhapo iyo, mwamalhihaka nhokolhieke mmwe mwaakihimeria, ni mii kinowoopa ikhura umihoolho wa Apwiiya Nlhuku vava va Shilo va, kichuwelhe mipatta chinohalha inyu uvahiya." 9 Manyaalhopwana ayo nkayaathama ni urukureriya ilhapo yonkhaye, nkayaalhepa mwaha unaacha mipatta chaya saba vamoka ni iwani chaya, amalhiheru ahohokolhia u Nayoshua unipuroni Ushilo. 10 Wowo Ushilo uwo etu, Nayoshua ahoopelha ikhura chechiyo mipatta chiyo umihoolho wa Apwiiya Nlhuku, nkaameelhacha attu o Uisraeli, kila nikosho ni mpata aya.

11 Ikhura yo upacha yaapante attu o nikosho ni Nabenyamini wo ulhikaana ni mahimo aya. Ilhapo yaavahiye aya yayo attu ayo yaari iriyari yo nikosho ni Nayuda ni nikosho ni Nayusufu. 12 Mwiinano aya wo uchulhu waachokholhenlhe mwoolhoko wo Uyorodani ni uvira uchulhu wo Uyeriko ni ilhapo yo miako ulhukamaka uneelha nchuwa mpaka uthako wo Ubethaveni. 13 Uthama vavawo, mwiinano uyo mwahorwaa uchawa wo Uluzu, yaani Ubetheli, mpaka Uatarothadari, umwaako uri uchawa wo Ubethhoroni yo vathi. 14 Mpata uneelha nchuwa ukhuma mwaako unoweehana iwani Ubethoroni mpata o uchawa mpaka wahorukunuwa ukelha yoyo iwani ina Benyamini phi waari mwiinano aya wo mpata uneelha nchuwa. ni uphiya iwani Ukriathyearimu, iwani ya attu o nikosho ni Nayuda. 15 Mpata uneenlhe uchawa ni ukhuma urii mwaako inoweeha iwani yo Ukiri mpata o uchawa mwiinano urukunuwe waviraka nchereshere wo ilhapo i Nabenyamini ni upiya Ukiriath ibahahari yaari iwani ya attu o Uyuda. 16 Yamalheke wahokhuruwa uvirelha nchereshere mwaako uri vakhiviru ni nikoote no mwaamwanaya Nahinomu, naari mpata wo uchulhu chinene wo nikoote na Arefai. Tho, mwiinano wahokhuruwa ukelha nikoote no Uhinomu, uchawa waari mwaako wa Ayebusi, nkawaathepa ukhuruwa mpaka Uenrogeli. 17 Wowo, miinano wahorukunuwa uuchulhu ni ukelha Uenshemeshi, nkawaavira Ugelilothi unowehana mwamwako wo Uadumimu ni ukhuruwa mpaka waari nlhuku ni Nabohani anaaya Robeni. 18 Wo uthama vavawo, mwiinano wahorukunuwa uchulhu wo Uaraba ni umalhelha Uaraba uwo. 19 Tho, ahothepa urwaa mpata wo uchulhu wo mwaako wo Ubethhogla ni umalhelha uchulhu chineneni wo Ibahari yo Maakha, vakittu vanokelha mwoolhoko wo Uyorodani. yoyo phi mwiinano wo mpata wo uchawa. 20 Mwoolhoko wo Uyorodani waari phi mwiinano aya wo mpata wo uneelha nchuwa. Phi chiichammo etu cheesheriye aya miinano mahimo a attu o nikosho ni Nabenyamini.

21 Iwani cho mahimo a attu o nikosho ni Nabenyamini chaari; Uyeriko, Ubethhogla, Uemekkesisi, 22 Ubetharaba, Uzemaraimu, Ubetheli, 23 Uavimu, Upara, Uofra, 24 Ukefar Naamoni, Uofni ni Ugebai. Jumla yo iwani chaavahiye aya chaari khumi ni piilhi vamoka ni ittoko chaya. 25 Iwani chikina chaari; Ugibeoni, Uraama, Ubealothi, 26 Umizpa, Ukefar, Umoza, 27 Urekemu, Uirpeeli, Utarala, 28 Uzela, Uhelefu, Uyebusi, yaani Uyerusalemu, Ugibea ni Ukiriathyearimu. Jumla yo iwani chaavahiye aya chaari khumi na ncheshe vamoka ni ittoko chaya. Chechiyo chonkhaye chiyo phi mipatta cho ilhapo chaavahiye aya attu o nikosho ni Nabenyamini ni mahimo aya.