1 Yamalheke, Apwiiya Nlhuku aheerelha Nayoshua, 2 wiira aahimeriache attu o Uisraeli cho, "mwiichereke iwani i chinohalha awe ntu uttawelha wiira aakihe ukumi awe, thoko cherenlhe aka ashinna Musa wiira ohimerieni. 3 ntu riyoothe amwiivaka ntu wo uhilhakelha, nowooria uttawelha imoka yo chechiyo iwani chiyo ni unttawa ntu ri ntheko wo ulhivihera iphome ya mmuchi awe iriheelhe. 4 Ntu eevilhe uyo attawelheke iwani imoka aya, ni weemelha vanlhakoni vo ukelhelha iwani, ni waahimiachera ashulhupalhe o iwani iyo nlhatu awe. Ashulhupalhe ayo anompochera ni ummaha vakittu wo unkhalhana. 5 Ntu o ulhivihera antwaraka mpaka wowo i iwani uwo, ashulhupalhe o iwani iyo ahinkumihe ntu eevilhe uyo wa yoyo ntu o ulhivihera uyo, ukhalhawaya aamwiivilhe nkhunanawe uyo uhilhakelha, ni ayo khayaari ni indewo mpacho vaa. 6 Ntu eevilhe uyo athepeke ukhalha wowo mpaka vanohalha awe urweehiya umilhatuni ni uhukumulhiya umihoolho wa nlhoko wonkhaye wa attu o Uisraeli, ni tho mpaka opochera ishaani olhupalhe ari uhicheni vanohalha aya urimeelha. Baada yo vavawo ntu uyo nowooria uhokolhia uwannyawe waattawilhe awe uwo."

7 Paahi, wo yoyo nlhatu uyo etu, waheeshiya iwani cho Ukedeshi ilhapo yo Ugalilaya umwaakoni Unaftali, Ushekemu uri miako cho Efraimu ni Ukiriath arba yaani Uhebroni ilhapo yo umiakoni yo Uyuda. 8 Ukhopelhelhe mwoolhoko wo Uyorodani, mpata unosha nchuwa Uyeriko, yaathanlhe iwani yo Ubezeri iri uthako wo uhikhalhe miako, ni iwani inene iyo inokhalhiya ni attu o nikosho ni Narobeni. Tho, ahonthanlha iwani yo Uramothi ilhapo yo Ugileadi, iwani ya attu o nikosho ni Nagadi ni Ugolani, ilhapo yo Ubashani ilhapo ya attu o nikosho ni Namanase. 9 Chilha phi iwani cheeshiye wo nlhatu no attu onkhaye o Uisraeli ni alheto aakhalhacha munlhokoni mwaya, wiira ntu riyoothe nohalha umwiiva nkhunanawe wo uhilhakelha attawelhe wowo hiwe eeviya ni ntu o ulhivihera iphome irihelhe, mpaka vavawo vanohalha awe uhukumulhiya umihoolho wo nlhoko wonkhaye wa attu o Uisraeli.