1 Vaari aya Ushilo ilhapo yo Ukanaani aholhelhi o mahimo a Alawi ahorwaa wa opochera ishaani Naeliazari ni u Nayoshua anaaya Nanuni, ni wa manyaaholhelhi akina cho makosho onkhaye a attu o Uisraeli, 2 nkayeerelhacha wiira, "Apwiiya Nlhuku ahaalhehera ashinna Musa wiira nivahiye iwani cho ukhalha ni imata cho ulhihera mihuwo chihu." 3 Paahi, wo ulhikaana ni malhehero a Apwiiya Nlhuku, attu o Uisraeli ahaavara ittu mwiilhaponi mwaya, iwani ni ittoko chaari ni imata cho ulhihera mihuwo, nkayaavahacha Alawi chikhalhe chawaya.

4 Ikhura yo upacha yaapante attu o nikosho ni Nakohathi. Mmilhokoni mwaya attu o iyari ya opochera ishaani Naharuni ahovahiya wo woopelhiya ikhura, iwani chaari mwiilhaponi mwa attu o makosho a Nayuda, Nasimeoni, ni Nabenyamini. Iwani chonkhaye chaavahiye aya chaari khumi ni ttaru.

5 Attu o nikosho ni Nakohathi ahalhenlhe alhe aavahachiye iwani khumi chiri mwi ilhapo cha attu o makosho a Naefraimu, a Unadani ni vaari inusu yo nikosho ni Namanase.

6 Attu o nihimo ni Nagershoni ahovahiya wo woopelhiya ikhura iwani khumi ni ttaru mwiilhaponi mwa attu o makosho a Naisakari, Naasheri, Nanaftali ni ilhapo nusu yo nikosho ni Namanase, Ubashani uwo.

7 Attu o nihimo ni Namerari aavahachiye iwani khumi ni piilhi mwiilhaponi mwa attu o makosho a Narobeni, Nagadi ni Nazabuloni.

8 Attu o Uisraeli ahaavara Alawi chechiyo iwani chiyo vamoka ni iwani chaari ni imata cho uhuwelha mihuwo, thoko chaalhehenre aya ashinna Musa.

9 Alha anottwara alha phi machina o iwani cho ukhuma ilhapo cha attu o makosho a Nayuda ni Nasimeoni chaakumihiye wa 10 wo achishana a opochera ishaani Naharuni, ari ashilhoko aya attu o nihimo ni Nakohathi o nikosho ni Alawi. Ilhapo aya yaari yo upacha woopelhiya ikhura. 11 Aavahiye Ukiriath arba yaani Uhebroni, Naarba ari athumwanaya Naanaki, umiakoni Uyuda, vamoka ni ithuphi chaarukureria. 12 Nansho imata cho yeyo iwani iyo ni ittoko chaarukurenrie chahomalha uvahiya Nakalebu anaaya Nayefune chikhalhe chawaya.

13 Vamoka ni waavaha achishana a opochera ishaani Naharu iwani yo Uhebroni, yeeshiye wo nlhatu no uttawelha attu wiira eechakihe, ahaavaha iwani vamoka ni ilhapo yo Ulibna vamoka ni imata chaya cho ulhihera mihuwo, 14 Uyatiri vamoka ni imata chaya cho ulhihera mihuwo, Ueshtemoa vamoka ni imata chaya cho ulhihera mihuwo, 15 Uholoni vamoka ni imata chaya cho ulhihera mihuwo, Udebiri vamoka ni imata chaya cho ulhihera mihuwo, 16 Uaini vamoka ni imata chaya cho uhuwelha mihuwo, Uyuta vamoka ni imata chaya cho ulhihera mihuwo, ni Ubeth shemeshi vamoka ni imata chaya cho ulhihera mihuwo. Iwani chonkhaye ilhapo cho yayo makosho ayo meelhi ni tisa. 17 Mwiilhaponi mwa attu o nikosho ni Nabenyamini ahovahiya iwani chikina cho: Ugibeoni ni Ugebai vamoka ni imata chaya cho ulhihera mihuwo, 18 Uanathothi vamoka ni imata chaya cho uhuwelha mihuwo, Ualmoni vamoka ni imata chaya cho ulhihera mihuwo. Iwani chonkhaye chaavahiye aya chaari ncheshe. 19 Iwani chonkhaye cha achishana a Naharuni ari opochera ishaani chaari khumi ni ttaru vamoka ni imata chaya cho ulhihera mihuwo.

20 Attu o nihimo ni Nakohathi ahalhenlhe, ari tho ashilhoko a attu o makosho a Alawi ahovahachiya iwani mwi ilhapo yo nikosho ni Naefraimu. 21 Aavahiye Ushekemu, uwani yaari tho phi iwani yo uttawelha ni wiichakiha, vamoka ni imata chaya cho uhuwelha mihuwo, yaari miako yo Efraimu, ni Ugezeri vamoka ni imata chaya cho ulhihera mihuwo, 22 Ukibzaimu vamoka ni imata chaya cho ulhihera mihuwo, ni Ubeth horoni vamoka ni imata chaya cho uhuwelha mihuwo. Iwani chonkhaye chavahiye aya chaari ncheshe. 23 Mwiilhaponi mwa attu o nikosho ni Unadani aavahiye Uelteke vamoka ni imata chaya cho uhuwelha mihuwo, Ugibethoni vamoka ni imata chaya cho ulhihera mihuwo, 24 Uaiyaloni vamoka ni imata chaya cho ulhihera mihuwo, ni Ugath rimoni vamoka ni imata chaya cho uhuwelha mihuwo. Iwani chonkhaye chaavahiye aya chaari ncheshe. 25 Wi ilhapo nusu yo nikosho ni Namanase aavahiye Naanaki vamoka ni imata chaya cho ulhihera mihuwo, ni Ugath rimoni vamoka ni imata chaya cho ulhihera mihuwo. Iwani chonkhaye chaavahiye aya chaari piilhi. 26 Paahi iwani chaavahiye aya ashilhoko a Nakohathi chaahalhenlhe, chaari khumi vamoka ni ithuphi chaya cho ulhihera mihuwo.

27 Ashilhoko a Alawi, attu o mahimo a Nagershoni, aavahiye iwani piilhi ukhuma nusu yo ilhapo yo nikosho ni Namanase: Ugolani, Ubashani uwo, iwani yo uttawelhelha ni wiichakiha, vamoka ni imata chaya cho ulhihera mihuwo, ni Ubeesh tera vamoka ni imata chaya cho ulhihera mihuwo. 28 Wiilhaponi mwo nikosho ni Naisakari, aavahiye Ukishioni vamoka ni imata chaya cho uhuwelha mihuwo, Udaberathi vamoka ni imata chaya cho ulhihera mihuwo, 29 Uyarmuthi vamoka ni imata chaya cho ulhihera mihuwo, ni Uen ganimu vamoka ni imata chaya cho ulhihera mihuwo. Iwani chonkhaye chaavahiye aya chaari ncheshe. 30 Wiilhaponi wo nikosho ni Naasheri aavahiye Umishali vamoka ni imata chaya cho ulhihera mihuwo, Uabdoni vamoka ni imata chaya cho ulhihera mihuwo, 31 Uhelkathi vamoka ni imata chaya cho uhuwelha mihuwo, ni Urehobu vamoka ni imata chaya cho ulhihera mihuwo. Iwani chonkhaye chaavahiye aya chaari ncheshe. 32 Wiilhaponi wa nikosho ni Nanaftali aavahiye Ukedeshi, uwani yo uttawelha ni wiichakiha irii Ugalilaya uwo, vamoka ni imata chaya cho uhuwelha mihuwo, Uhamoth dor vamoka ni imata chaya cho ulhihera mihuwo, ni Ukartani vamoka ni imata chaya cho uhuwelha mihuwo. Iwani chonkhaye chaavahiye aya chaari ttaru. 33 Jumla yo iwani cha ashilhoko a attu o nihimo ni Nagershoni chaari khumi ni ttaru, vamoka ni imata chaya cho ulhihera mihuwo.

34 Alawi akina aahanlhe, yaani ayari a Namerari, aavahachiye iwani u nikosho ni Nazabuloni. Ni chiyo phi Uyokneamu vamoka ni imata chaya cho ulhihera mihuwo, Ukarta vamoka ni imata chaya cho ulhihera, 35 Udimna vamoka ni imata chaya, ni Unahalali vamoka ni imata chaya cho ulhihera mihuwo, jumla chaari iwani ncheshe. 36 Attu o nikosho ni Narobeni aavahiye Ubezeri vamoka ni imata chaya cho ulhihera, Uyahazi vamoka ni imata chaya cho ulhihera, 37 Ukedemothi vamoka ni imata chaya cho ulhihera mihuwo, ni Umeafathi vamoka ni imata chaya cho ulhihera mihuwo. Jumla chaari iwani ncheshe. 38 Wa attu o nikosho ni Nagadi, yayo aavahiye iwani yo Uramothi yo Ugileadi, iwani yo uttawelhelha ni wiichakiha, vamoka ni imata chaya cho ulhihera mihuwo, Mahanaimu vamoka ni imata chaya cho uhuwelha mihuwo, 39 Uheshboni vamoka ni imata chaya cho ulhihera ni Uyazeri vamoka ni imata chaya cho ulhihera mihuwo. Jumla chaari iwani ncheshe. 40 Iwani chonkhaye chaavahiye aya ayari a Namerari, yaani ashilhoko a Alawi chaahalhenlhe, chaari khumi ni piilhi.

41 Jumla yo iwani chonkhaye chaavahiye aya Alawi mwiilhaponi mwa Aisraeli chaari makhumi ncheshe ni nane, vamoka ni imata chaya cho uhuwelha mihuwo. 42 Kila imoka munlhokoni mwo chechiyo iwani chiyo, chaarukureriye ni imata cho ulhihera mihuwo.

43 Paahi, Apwiiya Nlhuku ahaavara attu o Uisraeli ilhapo yonkhaye yaalhenhe aya chalhupenlhe manyaapwiiya aya. Ni ayo ahovarelha ni ukhalha mwommo. 44 Apwiiya Nlhuku nkayaavahacha mpuha kila vakittu mwiilhaponi mmo, thoko chaalhupenlhe aya manyaapwiiya aya. Khaariwo mmalhaponi riyoothe oonrie waatakana ukhalhawaya Apwiiya Nlhuku ahomalha waakottolhelha yayo amalhaponi aya ayo. 45 khawaariwo malhehano nirinoothe norera, naalhehilhe aya Apwiiya Nlhuku wa attu o Uisraeli nahaatiminre. Malhehano onkhaye ahotimira.