1 Mamwene onkhaye ari ukhopelhelhe yo mwoolhoko wo Uyorodani ilhapo yo umiakoni ni ilhapo yo uhikhalhe miako ni mipatta chikina chonkhaye cho umbwaani yo ibahari yo Mediteraniya ukelhelha Lebanoni, attu o Uhiti, Aamori, attu o Ukanaani, Aperezi, attu o Hivi ni Ayebusi yewilhe aya ntenga wa attu o Aisreali. 2 Yahothukumanacha vamoka ni nnikwa wo waatakana ikhoto Nayoshua ni attu o Uisraeli.

3 Nansho attu o Ugibeoni yeeweke mwaha Nayoshua chaapannge aya wa attu o iwani cho Uyeriko ni Uai, 4 nkayamulha uphanga miruku. Nkayaakusha choolhia, nkayaachariha majuniya othaalha ni upachira vachulhu iphuta chaya, ni iviriba chothakalha ni uttotiya, 5 nkayaawara iratu cho uthaalha ni choolhia chaya chonkhaye chaari chowuuma ni chimelhe ittupeeru. 6 Paahi nkayaarwa wa Nayoshua unipuroni Ugilgali nkayeerelha anene ayo ni attu o Uisraeli, wiira, "Hiyaano nikhumme ilhapo yo utayi, chonte ninolhepelha wiira mpange malhehano ni hii."

7 Nansho attu o Uisraeli nkayaakhulha yayo attu o Hivi ayo wiira, "Ninoria vayi uphanga malhehano ni inyu mwaatti? Vekinaka inyuva nnokhalha ni hii." 8 Ni ayo nkayaakhulha Nayoshua, "Hiyaano akarumiya inyu." Ni ayo Nayoshua nkayaakoha, "Mwaattiva phi mapani? Nnokhumelhelha vayi?"

9 Nkayaakhulha, "Hiyaano akarumiya inyu nikhumme ilhapo yo utayi, niwiilhe ukhalhawaya niheewa utotopelhiya wo nchina na Apwiiya Nlhuku, Nlhuku inyu, ni niheewa kila ittu chaapangenlhe aya attu o ilhapo yo Umisri. 10 Niheewa chonkhaye chaapangenlhe aya mamwene eelhi a Aamori yaari ukhopelhelhe wo mwoolhoko wo Uyorodani, yaani amwene Nasihoni o Uheshboni ni amwene Naoga o Ubashani aakhalha Uashtaroti uwo. 11 Phi vavawo, ashulhupalhe ihu ni attu onkhaye o ilhapo ihu vaanirenlhe aya wiira, nkusheke mashurupu o unkwahani, nirwe nakumaane, ni mwaattiva ni uwiirelhalhakani wiira Hiyaano akarumiya inyu, chonte mpangeke malhehano ni hii. 12 Mwooneke mikatte chihu, chaari ni ntukutta vaakushilhe ihu vaathama ihu uwanihu, nansho vano chihooma ni ukelhiya ittupeeru. 13 Ni mitumpa cho marapalha chi nahochariha idivai chinari cho naanano, nansho vano chihophwiakacha. Ata ikuwo ni iratu chihu chihothaalha, ukhalhawaya nkwaha waari wo urekama chinene."

14 Paahi attu o Uisraeli ahokusha choolhia chaya wo uhaakoha Apwiiya Nlhuku. 15 Nayoshua nkayaalhehana malhehano o mpuha, nkayaalhehana wiira anowaahiya ukhalha akumi. Aholhelhi o milhoko cha attu o Uisraeli nkayalhupelhelha wiira anoovarechesha yayo malhehano ayo.

16 Mahuku mararu baada yo upangiya malhehano ni yayo manyaattu ayo, attu o Uisraeli ahochuwelha wiira yayo attu ayo ari o waatamana aya ni ayo aakhalhacha munlhokoni mwaya. 17 Paahi attu o Uisraeli nkayattuka nkwaha, kaayuma yo mahuku mararu nkayaaphiya iwani chaya. Chechiyo iwani chiyo chaari; Ugibeoni, Ukefar, Ubealothi ni Ukiriathyearimu. 18 Nansho attu o Uisraeli khayeevilhe, ukhalhawaya ahoolhelhi o nlhoko wa attu o Uisraeli yahaalhupelhelha wo nchina na Apwiiya Nlhuku, Nlhuku o Uisraeli. Paahi nlhoko wonkhaye wa attu nkawaachukulhacha umihoolho wa aholhelhi aya ayo. 19 Nansho aholhelhi o nlhoko wa attu o Uisraeli nkaweerelha attu aya ayo wiira, "Ukhalhawaya nihaalhupelhelha wo nchina na Apwiiya Nlhuku, Nlhuku o Uisraeli vano khaninooria waapangelha ittu yo waathuria. 20 Ninowaahiya akhalhe akumi wiira nihiwe nitwarushiyaka wo nlhatu no ulhupelha ulhupenlhe ihu. 21 Mwaahiyeke akhalheke akumi." Paahi etu attu o Ugibeoni nkayaakhalha yaatumikelhaka attu o Uisraeli onkhaye, yaaremelhaka ikhuni ni waarikelha maashi, thoko ahoolhelhi a attu o Uisraeli chenre aya wo uhimia.

22 Nayoshua nkayeehana attu o Ugibeoni ni waakoha, "Wo nlhatu waani mwahonithepia wiira mwaakhumme ilhapo yo utayi, ni uno mwaattiva nnokhalha vakhiviru ihu? 23 Vanova mwaattiva nholhaviya ni akina inyu ikatema yonkhaye nnookhalha ipotta cho urema ikhuni ni urika maashi wo nlhatu yo inupa ya Nlhuku aka."

24 Attu ayo nkayaakhulha Nayoshua wo wiira, "Nahohimeriya wiira wo ikekhiaye Apwiiya Nlhuku, Nlhuku inyu, yahalheehera karumiya aya ashinna Musa yaarimelhinhe enenchi onkhaye o ilha ilhapo ilha, ni uvahani mwaattiva ilha ilhapo ilha ikhalhe yawinyu. Wo chiichammo etu, nahoovelhelha ukumi ihu, paahi nkanaapanga ulha mwaha ulha. 25 Vanova hiyaano niri mmiononi mwinyu nnipangelheke thoko chinoona inyu ukhalha rata." 26 Paahi yaapangenlhe aya yaari phi woopolha mmiononi mwa attu o Uisraeli wiira aheevakachiye, paahi khayeeviye. 27 Nansho ukhuma nenno nihuku nno, Nayoshua nkayaapanga yayo ukhalha o urema ikhuni ni urika maashi wo nlhatu na attu o Uisraeli, ni wo nlhatu no madhuhabu a Apwiiya Nlhuku, variwoothe Apwiiya Nlhuku vathanlhilhe aya, mpaka lhelho nna.