1 Ilha phi ibarakha ashinna Musa, ntu a Nlhuku yaalhapelhenlhe aya attu o Israeli ahinaaya urimeelha. Yenre wiira,

2 Apwiiya Nlhuku ahowa akhumaka umwaakoni Usinai,

ahonikhumelhelha umwaakoni Useiri,

ahoweha ukhuma umwaakoni Uparani.

Ahokhumelhelha munlhokoni mwa maelufu o minepa o wiirimu,

ni mooro unoparelha moono aya wo wiimonono.

3 Apwiiya Nlhuku ahaattuna attu aya,

ni anowenkelha attu aya onkhaye.

Chiichammo etu ninoowooroma vamietoni waya,

ni urumelhelha iamuri chaya.

4 Ashinna Musa ahonilhehera wiira nirumelhelhe Malhehero,

iri phi ittu yoombone chinene mwiilhaponi mwihu.

5 Apwiiya Nlhuku nkaakhalha amwene o attu o Israeli,

ikatema ahoolhelhi aya vaakumaana aya,

ni makosho onkhaye vaathukumanne aya.

6 Ashinna Musa nkayoolhumacha weerelha attu o nikosho ni Narobeni wiira,

"Narobeni akhalheke akumi, ahikhwe,

ni attu aya ahikhalhe vakani."

7 Wa attu o nikosho ni Nayuda enre wiira,

"Inyu Apwiiya Nlhuku mwiiwelhelheke wunlha wa attu o nikosho ni Nayuda,

mwaalhutaaniheke tho ni attu akina alhe.

Mwaatakaneke wo miono chinyu wo nlhatu waya,

mwaakaviheke attu o nikosho ni Nayuda aakottolhe amalhaponi aya."

8 Wa attu o nikosho ni Nalawi, enre wiira,

"Inyu Apwiiya Nlhuku mwaapatakulhelheke attu o nikosho ni Nalawi uttuna winyu wo ulhoheriya wo iphiro yo Urimu ni Thumimu,

wo iphiro ya akarumiya inyu o ukhulhuvelhiya, Nalawi,

mwalhikanche inyu Umasa uwo,

nkamwaavilhelha umaashini Umeriba.

9 Alawi ahooniha uuthimichani inyuva,

upwaha chinaathimicha aya manyaathumwanaya,

nkayaalhiyalhacha ashilhoko aya,

ahaachuwelhache ata achishaana aya

ukhalhawaya aheweelhelha malheheriyo inyu,

ni uvarechesha malhehano inyu.

10 Ni eettuchihe attu arumelhelhe malheheriyo inyu,

eettuchihe attu o Israeli malhehero inyu.

Alawi atushereke ubani umihoolho winyu,

isadaka chikumi cho upahiya umadhubahuni winyu.

11 Inyuva Apwiiya Nlhuku nhelheke ibarakha machiri aya,

nrumelhelheke ntheko unopanga aya wo miono chaya,

nkottolhelheke utayi machiri a amalhaponi aya,

machiri a attu anaavenga ayo wiira aheemelhe tho."

12 Wa nikosho ni Nabenyamini enre wiira,

"Nna phi nikosho anottuna aya Apwiiya Nlhuku,

ni nno ninookhalha rata vakhiviru ni ayo.

Yayo phi neesha vakhakaachani waya,

ni weenanelha ikatema yonkhaye."

13 Wa attu o nikosho ni Nayusufu enre wiira,

"Apwiiya Nlhuku ahelheke ibarakha yo ukame wo ukhuma nchulhu,

ni ibarakha yo marapo o maashi.

14 Ilhapo aya ivahiyeke ibarakha cho maphepu oombone anotokotta ilhimwe,

maphepu oombone anotokotta kila nlhaalha.

15 Ilhapo aya yo miako cho khalhayi, ichare maphepu oombone o kila nikosho.

16 Ilhapo aya ichareke chonkhaye chiri choombone,

ivahiyeke ibarakha wo mpuha wa Apwiiya Nlhuku,

oolhumanche vethupini vaapharelha mooro.

Chilha ibarakha chilha chaakhuruwelheke attu o nikosho ni Nayusufu,

ukhalhawaya aari nashirongora munlhokoni mwa ashilhoko aya.

17 Nayusufu ari ni machiri thoko n'dume no ing'ope no nttara,

inyaka chaya phi cho inari ilhopwana.

Naefraimu anookhalha ni chechiyo inyaka maelufu khumi chiyo,

ni Namanase wo maelufu chiicho."

Wo chechiyo, anookekhelha makosho, mpaka mwiinano wo umalhelha ilhapo.

18 Wa attu o nikosho ni Nazabuloni ni o nikosho ni Naisakari enre wiira,

"Nazabuloni, nteelhiyeke munkwahani mwinyu.

ni inyu Naisakari, nteelhiyeke mmaheemani mwinyu.

19 Anowaalhatulha attu umiakoni waya,

ni wowo attu anokumihacha isadaka chinothananiya.

Ukhalhawaya anohalha upatta nhakhu aya ukhuma ubaharini

ni nhakhu wo ukhuma munhaavani umbwaani."

20 Wa attu nikosho ni Nagadi, enre wiira,

"Athimichiye Nlhuku naavaha Nagadi vakittu volhupalhe.

Nagadi aneethelha thoko kharamu,

onthe moono ama vattomelhani.

21 Aheethanlhelha vakittu voombone upwaha vakittu vonkhaye,

vakittu veeshiya nipuro na nholhelhi.

Ahaaholhelha attu ni waarumelhelha Apwiiya Nlhuku,

ahopanga ntheko wa Nlhuku wa attu o Israeli."

22 Wa attu o nikosho ni Nadani enre wiira,

"Nadani ari thoko mwaakharamu,

nothuphathupha ukhuma Ubashani."

23 Wa attu o nikosho ni Nanaftali enre wiira,

"Inyuva Nanaftali phi nvaheriye chinene,

nchanre ibarakha cha Apwiiya Nlhuku,

ilhapo inyu phi mpata wo uchawa uri nthapwi no Ugalilaya."

24 Wa attu o nikosho ni Naasheri yenre wiira,

"Avahiye ibarakha Naasheri, waapwaha achishaana onkhaye a Nayakhobo,

attuniyeke ni ashilhoko aya onkhaye,

ni ilhapo aya ichareke miri cho mizeituni cho waamiya makhura.

25 Ilhapo chinyu chinkelhiyeke milhako cho yuuma ni ishaaba.

Ukumi inyu ulhokelheke mahuku aya onkhaye!"

26 Ashinna Musa nkaamalhihera wo uhimia wiira,

"Inyuva attu o Israeli, khaawo nlhuku ri thoko Nlhuku inyu,

novira wiirimu munchakarimiani wawe,

novira wiirimu uwa uukaviherani.

27 Nlhuku o mahuku o uhimalha phi ittawelhelho inyu,

machiri aya anowoonia velhaponi.

Ahoomolhacha amalhaponi umihoolho winyu,

ahaalhehera wiira, mwaarimeelhiheke.

28 Paahi etu, attu o Israeli ahokhalhacha rata,

achishaana a Nayakobo vekha aya,

ilhapo yaachanre choolhia ni idivai,

ilhapo yaari ni irimu inomoriha ipulha vanlhaalhani.

29 Nhoreeriya mwaatti attu o Israeli.

Mpani ri thoko inyuva mwaatti, attu mwookholhiye ni Apwiiya Nlhuku,

ari phi ichushuru inowinkelhani,

ni uphanga unoovahani ipilhi yo ukottolha!

Amalhaponi inyu anowaacha anokhoromanche umihoolho winyu,

ni inyuva nnowaanyikalhelha vathi."