1 "Mwaatti phi achishaana a Apwiiya Nlhuku inyu. Paahi etu nhiittume veruttuni mena wuuwulha mputhu mmamiuruni mwinyu, ntu vanokhwa awe thoko chinopanga aya attu akina. 2 Mwaatti phi attu a Apwiiya Nlhuku inyu. Apwiiya Nlhuku ahouthanlhani mwatti ukhalha attu aya anenene, munlhokoni mwa attu onkhaye anokhalhacha velhaponi va.

3 "Nhilhie ittu iriyoothe ihinorumelhelhiya umihoolho wa Apwiiya Nlhuku. 4 Ashinama o ukhuura inama chaya phi alha: Ing'ope, ikhondoro, ipuri, 5 ipaalha, nachoro, naahe, imbarapi, ittata, imbutuka, 6 ni kila mwannama o ikottwa chiparuwilhe velhi, ni nochukhulha, yayo mwaakhureke. 7 Nansho nhinkhuure mwannama riyoothe hiparuwilhe ikottwa chawe velhi ni wala khanochukhulha, nhikhure inama yo ingamia, yo hukulha, ama yo ichanga inakhalhaka anoochukhulha, ukhalhawaya ikottwa chaya khachiparuwilhe velhi, yayo uwannyu phi o uhirumelhelhiya. 8 Tho, nhikhuure ikulhuwe, ukhalhawaya inakhalhaka ikottwa chaya chihoparuwa velhi, ikulhuwe khachinochukhulha, yayo phi o uhirumelhelhiya uwannyu mwaatti. Nhikhuure inama cho yayo ashinama ayo, ni wala nhivare mitembo chaya.

9 "Nkhuureke kila nikosho no ihopa cho mapezi ni cho makakahapa. 10 Nansho nhikhuure yo wuupiya iriyoothe yo mmaashini, ihiri ni mapezi wala makakahapa. Mwaakhuuraka yayo khannorumelhelhiya wo iphiro cho waalhapelha Apwiiya Nlhuku.

11 "Mwaakhureke ashinuni onkhaye anorumelhelhiya. 12 Nansho nhaakhuure alha ashinuni alha: Iwuku, akapungu, 13 akengewa, inaka ni irumaachi cho makosho onkhaye, 14 makosho onkhaye a anakhuku, 15 imbuni, anakupapara, matipitipi, makosho onkhaye a ashaaka, 16 achichi, imumbi, achichi olhupalhe, 17 ampicha, miolholho, inderi, anttieku, 18 imembe, magolegole, anlhema ni ananthuthu. 19 Tho, nhaakhuure ashimweettu onkhaye anovava, aneeta wo mieto micheshe, yayo khanorumelhelhiya umihoolho wa Apwiiya Nlhuku. 20 Nansho ashimweettu akina ari ni mapupha, aneeta ni uthupathupha vathi wo mieto micheshe, yayo mwaakhureke.

21 "Nhikhuure ichibudu, nansho mwaahiyereke alheto anaakhalhana inyu, akhuureke ama munthumihereke ntu riyoothe o nikosho nikina, ukhalhawaya mwaatti phi inyu attu a Apwiiya Nlhuku ri Nlhuku inyu.

"Nhimwaapie mwaakhondoro ama mwaapuri wo mapelhe a anumwanawe.

22 "Mweesheke vathetho isadaka cho mpatta wo khumi wo choolhia chiruwenrie inyu mmamatani mwinyu kila iyaakha. 23 Mwamalhihaka, nkusheke nrweeke vakittu vathaanlhilhe aya Apwiiya Nlhuku inyu wiira mwaathimiche. Wowo, mwalhieke isadaka yo mpatta mmoka wo mipatta khumi wo choolhia chinyu, ni yo idivai inyu, ni yo makhura o izeituni, ni yo inama yo mattara malhopwana o ing'ope ni ikhondoro chinyu chiyo. Mwapangake chiicho wiira mwiittuche waathimicha Apwiiya Nlhuku inyu wo mahuku onkhaye. 24 Nansho yakhalhaka wowo uthanlhiye ni Apwiiya Nlhuku inyu wiira athimichiye uwo, utayi chinene ukhuma uwannyu, ni inyu khannoria ukusha isadaka cho chittu chinyu chivaheriye inyu ni Apwiiya Nlhuku chiyo, paahi etu, 25 nthumiheke chittu chinyu chiyo ni ukusha nchurukhu waya uyo mpaka vakittu vathanlhiye ni Apwiiya Nlhuku inyu vawo. 26 Wowo nchurukhu uyo mwathumeke ittu iriyoothe inohalha inyu uthanana, inama yo ing'ope, ama inama yo ikhondoro, inama yo ipuri, ama idivai ama utheka. Mwawurieke ni uteelhiya umihoolho wa Apwiiya Nlhuku inyu, vamoka ni ashilhoko inyu onkhaye.

27 "Nansho nhaalhiyalhe Alawi anaakhalhana inyu vamoka munlhokoni mwinyu, yayo kharina ittu mmathathani wala ilhapo ivahiye aya munlhokoni mwinyu. 28 Ni kila mmalha iyakha wo iyaakha yo neraru, nkumiheke isadaka yo mpatta mmoka wo mipatta khumi wo choolhia chinyu chonkhaye, ni uthokoreria mmakhupini mmawani mwinyu. 29 Chechiyo chinowa ukhalha wo nlhatu na Alawi, ukhalhawaya yayo manyaattu ayo kharina ittu mmathathani wala ilhapo yo uhiyeriya munlhokoni mwinyu. Tho, wo nlhatu no alheto, manyanankhwelhi ni achishaana ohiiya, anokhalhacha mmawani winyu, alhieke ni urupalhacha. Mwiireke chiicho, ni Apwiiya Nlhuku inyu, anouvahani ibarakha mmithekoni nnovara inyu.