1 "Yamalhaka baada ya Apwiiya Nlhuku inyu waalhakalhiha attu o ilhapo inovaha ayani ayo, ni mwamalhaka uvarelha ni ukhalha mmanupani mwaya, 2 mwatengeke iwani ttaaru wowo wiilhaponi unokelha inyu uvahiya ni Apwiiya Nlhuku inyu uwo. 3 Mwamalhihaka, mwamianiheke vararu, kila vakittu vakhalheke ni iwani inohalha awe ntu uphiya wo uhihuvahuva, wiira ntu nomwiiva nkhunanawe oorieke uttawelha wowo ni waakiha ukumi awe. 4 Yakhalhaka ntu noomwiiva nkhunanawe wo uhilhakelha, hirii mmalhaponi awe khalhayi vawo, attawelheke imoka yo chechiyo iwani chiyo, wiira ookholhe ukumi awe. 5 Wo ulhikaaniha, niireke wiira, yakhalhaka ntu noorwaa wiithuphini ni nkhunanawe uuremani ikhuni, ni vanokakha awe mwiri vawo, ipacho inowiikhulha mumminini mwaya nkayaamwiiva ntu nkina ulhe. Ntu thoko yoyo nowooria uttawa nkaarwaa uukhalhani iwani imoka aya wiira ookholhe ukumi awe. 6 Nansho yakhalhaka iwani yaari imoka tu, ni iyo yaari utayi chinene, paahi ntu o ulhivelhelhiha nowooria wo urushiya wawe unttwara wowo. Ammareke ni umwiiva yoyo mmwiihilhe nokhwa uyo, inakhalhaka kaahumukumulhiye ukhwa, ni wala yayo eelhi ayo khayaari avenganaka khalhayi vawo! 7 Paahi etu phi nlhatu ninoulheheraakani wiira ntengeke iwani ttaaru.

8 "Tho yakhalhaka Apwiiya Nlhuku inyu anookhanulha miinano cho ilhapo inyu, thoko chaalhehiye aya ni manyaapwiiya inyu, ni ayo nkayoovahani ilhapo yonkhaye yaalhenhe aya waavaha manyaapwiiya inyu, paahi etu mwoncherereke iwani ttaaru chikina wo uthepa chi iwani ttaaru chi. 9 Anokouvahani ilhapo iyo mwaavarechesha malhehero onkhaye anoulheherakani lhelho alha, nkamwaattuna Apwiiya Nlhuku inyu ni uttwara iphiro chaya mahuku onkhaye. 10 Mwatengeke chechiyo iwani chiyo, wiira ntu hittenke hiwe eeviya wiilhaponi unokelha inyu uvahiya ni Apwiiya Nlhuku inyu wiira ukhalhe wawinyu, nkamwaareiya milhatu cho nookhwa.

11 "Nansho ntu akhalhaka mmalhaponi a nkhunanawe, nkaamwiithelha, nkaamwaatakacha ni umwiiva, nkaattawelha imoka yo chechiyo iwani chiyo, 12 vavawo ashulhupalhe o yeyo iwani iyo aarumeke attu ammareke wowo, ni ummwiiha wa attu o ulhivelhelhiha nlhatu wo urihia iphome, wiira eeviye. 13 Nhimwoonelhe ikiriri yoyo, vavawo etu phi nohalha inyu umalhiha uwonya wo wiiviya attu ahittenke mwiilhaponi mu Israeli, wiira nkhalhe wo mpuha.

14 "Vanohalha inyu ukelha ilhapo inovahiya inyu ni Apwiiya Nlhuku inyu, ikhalhe yawinyu uwo, nhikelhe mwakhulha ikhomo cho miinano cha amwaatamana inyu, cheeshiye ni Apwiiya Nlhuku toka khalhayi, ikatema ya manyaapwiiya inyu.

15 "Uhimiechesha wa ntu mmoka khunthosha unhukumulha ntu mwaha wo nlhatu wawe uriyoothe wo uwonya, ama wo utteka upannge awe. Uhimiechesha wa attu eelhi ama araru veekha aya phi nohalha wiiwelhelhiya. 16 Yakhalhaka ntu noohimiechesha wo woothacha, ni umwootheria ntu riyoothe nlhatu uriyoothe, 17 paahi yoyo mwanene uyo ni ntu otheriye milhatu uyo, arweeke umihoolho wa Apwiiya Nlhuku, ni umihoolho wa attu opochera ishaani, ni wa attu o waamulha milhatu arii munthekoni yeyo ikatema iyo. 18 Attu o waamulha milhatu ayo awehaweheke rata yoyo nlhatu uyo, ni yakhalhaka ntu o uhimiechesha uyo nohimiechesha wo woothacha, noomwootheria nkhunanawe milhatu cho woothiya, 19 paahi yoyo atwarushiyeke ntwarusho waathananiya utwarushiya ntu ootheriye uyo. Yeyo phi iphiro inohalha inyu umalhiha mwaha wo uwonya thoko yolha munlhokoni mwinyu. 20 Ni kila ntu nowiiwa ni woova, ni uwonya thoko yoyo khunowa waakhumelhelha tho munlhokoni mwinyu. 21 Nhoonelhe ikiriri attu thoko yayo! Ukumi unowa ulhiviya wo ukumi, ni niitho wo niitho, niino wo niino, moono wo moono ni mweto wo mweto.