1 Benɛ Yesu ya su Yeriko nɛ e ngɛ mi poe kɛ yaa Yerusalem ɔ, 2 nyumu Yuda no ko nɛ a tsɛɛ lɛ ke Zakeo ɔ nu e he. E ji jua tsulɔ nɔkɔtɔma kɛ sikatsɛ, nɛ a le lɛ saminya. 3 E ngɛ hlae nɛ e na Yesu, se akɛnɛ ni ɔmɛ hiɛ babauu nɛ e ji nɔmlɔ kpiti he je ɔ, e nɛ lɛ. 4 Enɛ ɔ he je ɔ, e tu fo kɛ sɛ hlami nɛ e ya kuɔ tso ko kaa kɔɔle tso ngɛ blɔ ɔ he haa he nɛ Yesu maa gu ɔ konɛ e nyɛ nɛ e na lɛ.

5 Se benɛ Yesu ya su tso ɔ sisi pɛ kɛkɛ nɛ e wo e hɛ mi nɔ nɛ e hyɛ Zakeo nɛ e tsɛ e biɛ pam ke, "Zakeo, o he nɛ sɔ nɛ o kple si, ejakaa o we ɔ mi nɛ i ma to mwɔnɛ ɔ."

6 Kɛkɛ nɛ Zakeo he sɔ kɛ kple si nɛ e wo Yesu kɛ ho e we ɔ mi ya kɛ bua jɔmi.

7 Se ni ɔmɛ bɔni nya si hɔɔmi ngɛ Yesu he, nɛ a de ke, e ho ya to nɔmlɔ yayami nubwɔ.

8 Se Zakeo da si ngɛ Yesu hɛ mi nɛ e de lɛ ke, "Awetsɛ, i ma wo ye níhi nɛ i ngɛ ɔ tsuo mi dlami fiee kɛ ke ohiafohi. Nɛ i ngɛ si woe kaa ke i sisi nɔ ko nɛ i he sika ngɛ e dɛ pe bɔ nɛ sa a, i ma to nane mi ha lɛ ngwɔ he eywiɛ."

9 Yesu de lɛ ke, "Enɛ ɔ tsɔɔ kaa mwɔnɛ ɔ yi wami hemi ba we nɛ ɔ mi, ejakaa nyumu nɛ ɔ hu Abraham bimɛ nɛ laa amɛ eko ji lɛ. 10 Nɔmlɔ Bi ɔ ba nɛ e ba hla ni nɛmɛ nɛ laa amɛ nɛ e he a yi wami."

11 Akɛnɛ Yesu maa ho Yerusalem sumi ya he je ɔ, e bu mɛ abɛ nɛ ɔ nɛ e kɛ tsɔɔ mɛ kaa tsa pi amlɔ nɛ ɔ mi nɔuu nɛ Mawu Matsɛyemi ɔ maa je sisi.

12 E de ke, "A tsɔ kɛ ba tsɛ ablade ko kaa e ba a matsɛ ma ngua mi nɛ a wo lɛ tsɛ nɛ e ye he nɛ e ngɛ ɔ nɔ; . 13 Loko e maa hia blɔ ɔ, e tsɛ e sisi bimɛ a ti nihi nyɔngma nɛ e ha nɔ tsuaa nɔ sidi akpe enyɔ nɛ e de mɛ ke a kɛ hi ni tsue kɛ ya si e maa kpale kɛ ba. 14 Se e sisi bi ɔmɛ ekomɛ sume lɛ, nɛ lɔ ɔ he je ɔ, a tsɔ nihi kɛ fie e se nɛ a ya de lɛ ke a hla we nɛ e ye a nɔ matsɛ hu.

15 Benɛ e kpale kɛ ba a, e tsɛ ni nɛmɛ nɛ e ha mɛ sika a konɛ a ba bu lɛ akɔtaa.

16 Kekle nɔ ɔ ba nɛ e ba de lɛ ke, ‘Nutsɔ, se nami nɛ i na ngɛ sika a nɔ ɔ peeɔ sika tso ɔ ngwɔ he nyɔngma.’

17 Matsɛ ɔ de lɛ ke, ‘Ayekoo! Ni tsulɔ kpakpa; o ye anɔkuale ngɛ nɔ́ bɔbɔyoo nɛ i to kɛ wo o dɛ ɔ mi, nɛ lɔ ɔ he je ɔ, i ma wo mo tsɛ ngɛ ma nyɔngma nya.’

18 Nɔ nɛ ji enyɔ ɔ hu ba nɛ e ba de ke, ‘I na se; o sika a fu ngwɔ he enuɔ. Lɛ ji enɛ.’

19 Matsɛ ɔ de lɛ ke, ‘Mo! O maa hyɛ mahi enuɔ nɔ.’

20 Se nɔ nɛ ji etɛ ɔ ba nɛ e ba de matsɛ ɔ ke, ‘O sika a ji enɛ; i buɛtɛ lɛ ngɔ fɔ si ha mo. 21 I ye mo gbeye, ejakaa o sane wa. Nɔ́ nɛ pi o nɔ́ ɔ nɛ o woɔ; nɛ o kpaa ni ngɛ he nɛ o du we nɔ́ ko ngɛ.’ 22 Munyu nɛ ɔ hua tsui ha matsɛ ɔ nɛ e de e sisi bi ɔ ke, ‘Nyɔguɛ yaya kɛ yi kpɛti wawɛtsɛ. O ke ye sane wa. Ja a pɛ nɛ i ke mo maa ye ɔ nɛ. Nɛ o le mi saminya kaa ye sane wa a, 23 mɛni he je nɛ o wo we ye sika a kɛ ya tui sika tomi he ɔ bɔ nɛ pee nɛ ma na kɛ mi womi?’

24 Nɛ e de enɛ ɔ se ɔ, e plɛ nɛ e de ni ɔmɛ nɛ daa si ɔ ke, ‘Nyɛ he sika a ngɛ e dɛ nɛ nyɛ kɛ ha nɔ nɛ na pe kulaa a.’

25 Se ni ɔmɛ de lɛ ke, ‘Jamɛ a nɔ ɔ ngɛ fuu momo.’

26 Matsɛ ɔ ha mɛ heto nɛ e de ke, ‘I le, se bɔ nɛ e ngɛ daa ji ja a nɛ; nɔ nɛ ngɛ fuu ɔ, a maa piɛ he ha lɛ; se nɔ nɛ e nɔ́ ɔ hiɛ́ɔ, bɔbɔyoo ɔ nɛ ngɛ e dɛ ɔ tete a ma he ngɛ e dɛ. 27 Jehanɛ ɔ, ye he nyɛli ɔmɛ nɛ tsɔ atuã ke a hla we nɛ ma ye tsɛ ha mɛ hu ɔ, nyɛ wo mɛ kɛ ba nɛ nyɛ ba poo a yi ngɛ ye hɛ mi.’ "

28 Benɛ e bu abɛ nɛ ɔ ta a, e sɛ e kaseli ɔmɛ a hlami nɛ e pue Yerusalem blɔ. 29 Benɛ a ya su Betfage kɛ Betania ngɛ Nuyoku ɔ he ɔ, e tsɔ e kaseli ɔmɛ enyɔ kɛ sɛ hlami. 30 Nɛ e de mɛ ke, "Nyɛɛ ya kɔpe ɔ nɛ ngɛ nyɛ hɛ mi jee ɔ mi; nɛ nyɛ ma a mi sɛsɛ pɛ nyɛ maa na teji nɛ a muɔ lɛ si ngɛ blɔ ɔ he haa. E ji teji bi nɛ nɔ ko hi nɔ hyɛ lolo. Nyɛɛ pine lɛ nɛ nyɛ kpaka lɛ kɛ ba. 31 Nɛ ke nɔ ko bi nyɛ nɔ́ nɛ he nɛ nyɛ ngɛ lɛ pinee ngɛ ɔ, nyɛ de lɛ ke, ‘E he hia Nutsɔ ɔ.’ "

32 Kaseli ɔmɛ ya na teji bi ɔ kaa bɔ nɛ Yesu de mɛ ɔ. 33 Nɛ niinɛ, benɛ a ngɛ lɛ pinee ɔ, nítsɛ ɔmɛ bi mɛ ke, "Mɛni he je nɛ nyɛ ngɛ lohwe ɔ pinee?"

34 A de nɔ́tsɛ ɔmɛ kpiti ke, "E he hia Nutsɔ ɔ." 35 Nɛ a kpaka lohwe ɔ kɛ ba ha Yesu nɛ a je a tadehi ngɔ ha lohwe ɔ se mi konɛ Yesu nɛ hi nɔ.

36 Kɛkɛ nɛ ni ɔmɛ je a tadehi ngɔ ha blɔ ɔ nɔ kɛ nyɛɛ e hlami hluu kɛ ho, nɛ e nyɛɛ nɔ. 37 Benɛ a ya su he nɛ a ma bɔni Nuyoku ɔ kplemi ngɛ ɔ, kaseli ɔmɛ kɛ asafo ɔ tsuo bɔni nyami kɛ lami kɛ ngɛ Mawu yi jee ngɛ nyakpɛ ni tsumi slɔɔtohi nɛ Yesu tsu ɔmɛ a he.

38 Nɛ mɛ tsuo a de ke, "A gbaa Matsɛ ɔ nɛ ma ngɛ Mawu biɛ mi ɔ! A ngɔ anunyami kɛ ha Mawu ngɛ hiɔwe lokoo!"

39 Se Farisi bi ɔmɛ ekomɛ de Yesu ke, "Tsɔɔlɔ, mo ka nihi nɛ nyɛɛ o se ɔ a hɛ mi nɛ a jɔɔ níhi kaa ja a demi!"

40 Se Yesu de mɛ ke, "Ke ni nɛ ɔmɛ pee kɔ ɔ, tɛ nɛ ɔmɛ ngɛ blɔ ɔ he ɔ ma nya kɛ ngmlaa."

41 Benɛ a ma saii nɛ jehanɛ ɔ lɛɛ a kɛ Yerusalem kɛ we hu, nɛ e na ma a nɛ fɔɔ si paa ngɛ e hɛ mi ɔ, e bɔni ya fomi pue ma a nɔ. 42 E fo ya nɛ e de ke, "Jinɛ neneene he jɔmi ma ha mo, se o ngmɛɛ he nɛ amlɔ nɛ ɔ be ɔ be. 43 Ejakaa be ma nɛ o he nyɛli ɔmɛ maa te ba na mo; a maa hule o gbogbo ɔmɛ nɛ a ma sa o yi. 44 A ma wo mo ngɔ fia si kɛ o mi bimɛ kulaa. A ma kpata o hɛ mi nɛ a maa ku o gbogbo ɔmɛ ngɔ pue si, ejakaa o kua he blɔ nɛ Mawu ha mo ɔ."

45 Jehanɛ ɔ e ya sɛ Sɔlemi We ɔ nɛ e ya bɔni ni juali ɔmɛ fiemi ngɛ a gba amɛ a mi. 46 Nɛ e de mɛ ke, "Ngmami ɔmɛ de ke, ‘Ye We ɔ sɔlemi he i; se nyɛɛ lɛɛ nyɛ wo lɛ ngɔ pee juli a hi he.’ "

47 Enɛ ɔ se ɔ, e yaa Sɔlemi We ɔ daa ligbi ya tsɔɔ ni ngɛ lejɛ ɔ; se osɔfo nikɔtɔma amɛ kɛ asafo nikɔtɔma amɛ kɛ ma mi nikɔtɔma amɛ bɔni e he ga hlami nɛ a kpata e hɛ mi. 48 Se a nɛ bɔ nɛ a maa pee, ejakaa a na paa kaa ni ɔmɛ suɔ lɛ saminya, nɛ e munyu ɔmɛ, ngɔɔ ngɛ a tue mi.