1 Benɛ e daa si ngɛ Sɔlemi We ɔ, e na ni ɔmɛ nɛ a wo a nike ni ɔmɛ kɛ ngɛ onia tsumi daka a mi woe. 2 Nɛ e maa hyɛ ɔ, e na yo ohiafo ko nɛ e huno gbo ɔ, nɛ lɛ hu e wo kaplɛ pɛsua enyɔ kɛ ba wo daka a mi. 3 Kɛkɛ nɛ e de ke, "Ngɛ anɔkuale mi ɔ, yo nɛ ɔ ha pe ni ɔmɛ tsuo a nɔ́ ɔ nɛ a bla. 4 Ejakaa mɛɛ lɛɛ ni nɛ a na nɛ be nɔ ɔ mi nɛ a je kɛ ha bɔbɔyoo nɛ he hia we mɛ; se yo nɛ ɔ lɛɛ sika kulaa nɛ ngɛ e dɛ ɔ nɛ e ngɔ kɛ ba ha nɛ ɔ nɛ."

5 Enɛ ɔ se ɔ, e nu nɛ e kaseli ɔmɛ bɔni Sɔlemi We ɔ tɛ gbogbo ɔmɛ kɛ afɛu nihi nɛ a kɛ dla he ɔ kɔmi.

6 Kɛkɛ nɛ e de mɛ ke, "Be ma nɛ a ma puɛ nɔ́ nɛ ɔmɛ nɛ nyɛ ngɛ kɔe nɛ ɔ tsuo. A maa ywia tsu nɛ ɔ dukuduku ngɔ pue si nɛ a be tɛ kake po sie ngɛ eko nɔ."

7 Nɛ a bi lɛ ke, "Tsɔɔlɔ, mɛni be nɛ a maa pee kikɛmɛ a nɔ́ nɛ ɔ, nɛ mɛni okadi wa maa na kɛ nyɛɛ hɛ mi."

8 E de mɛ ke, "Nyɛɛ hyɛ nɛ hi nɛ nɔ ko nɛ ko mlɔɔ nyɛ, ejakaa nihi fuu maa ba ngɛ ye biɛ mi, nɛ a ma de ke, ‘Be ɔ su.’ Se nyɛ ko he mɛ ye. 9 Nɛ ke nyɛ nu tahi kɛ atuã tsɔmi nɛ ngɛ si tee a he ɔ, nyɛ tsui nɛ ko po. Anɔkuale mi ɔ, tahi maa te si, se nyagbe be ɔ be bae amlɔ ɔ nɔuu. 10 Ejakaa ma maa te si kɛ si ma, nɛ matsɛ yemi maa te si kɛ si matsɛ yemi. 11 Nɛ zugba hosomi kɛ hwɔ nɛ nya wa kɛ gbenɔ hiɔ nɛ saa nɔ maa ba hehi fuu, nɛ a maa na nyakpɛ kɛ gbeye okadihi fuu ngɛ hiɔwe.

12 Se loko ji enɛ ɔ maa ba a, a maa nuu nyɛ nɛ a maa wa nyɛ yi kpɛti. A ma wo munyu kɛ wo nyɛ he nɛ a maa sa nyɛ kɛ ho matsɛmɛ kɛ amlaalohi a hɛ mi ya ngɛ kpe he ɔmɛ nɛ a ya kojo nyɛ ngɛ ye he je. 13 Se kɛ gu enɛ ɔmɛ a nɔ ɔ, je ɔ tsuo maa le Yiwamihelɔ ɔ nɛ a maa wo e hɛ mi nyami. 14 Se nyɛ ko ye tsui ngɛ bɔ nɛ nyɛ ma ya je nyɛ nya ha he, 15 ejakaa i ma wo nyɛ nya nɔ́ nɛ sa kaa nyɛ de, nɛ i ma ha nyɛ juɛmi bɔ nɛ ni nɛmɛ nɛ wo nyɛ kɛ ya a be nyɛ nya nyɛe maa da. 16 Nyɛ wekuli kɛ nyɛ fɔli kɛ nyɛ nyɛmimɛ kɛ nyɛ huɛmɛ tete po maa tsɔɔ nyɛ se blɔ nɛ a ma ba nuu nyɛ; nɛ a maa tane nyɛ ti ni komɛ po nyɛ yi. 17 Nihi fuu maa nyɛ nyɛ, ejakaa ye nihi ji nyɛ nɛ a kɛ ye biɛ wo nyɛ. 18 Se i ngɛ nyɛ dee anɔkuale mi ke, nyɛ yi bwɔmi kake hu be laae. 19 Ejakaa ke nyɛ da si kpɛii ɔ, nyɛ ma he nyɛ susumahi a yi wami.

20 Se ke nyɛ na kaa ta buli bɔle Yerusalem he pɛ, nyɛɛ le kaa ma a hɛ mi kpatami be ɔ su. 21 Kɛkɛ ɔ, nihi nɛ ngɛ Yudea a a tu fo kɛ sɛ yoku ɔmɛ a mi, nɛ ni nɛmɛ nɛ ngɛ Yerusalem ɔ mɛɛ a tu fo kɛ je ma a mi, nɛ nihi nɛ be Yerusalem ma a mi jamɛ a be ɔ mi ɔ, a ko de ke a ngɛ kpalee kɛ ma. 22 Ejakaa jamɛ a be ɔmɛ ji yayami nane mi tomi behi, nɛ kaa bɔ nɛ a ngma ngɛ gbali ɔmɛ a womi ɔmɛ a mi ɔ, e maa ba mi pɛpɛɛpɛ. 23 Se due ha bimwɔwi a nyɛmɛ kɛ yihi nɛ hɛɛ hɔ ngɛ jamɛ a be ɔmɛ a mi. Ejakaa e maa pee aywilɛho be ngɛ zugba a nɔ. 24 He nyɛli maa tane a yi basabasa aloo a maa nuu mɛ nyɔguɛhi kɛ ho majemaje ya. Nɛ nihi nɛ li Mawu ɔmɛ ma kpata Yerusalem hɛ mi nɛ a maa pee lɛ posoposo kɛ ya si be nɛ Mawu nitsɛ to ɔ maa su.

25 Jamɛ a be ɔ mi ɔ, nyakpɛ okadihi slɔɔtohi maa je kpo ngɛ hiɔwe ngɛ pu kɛ hlami kɛ dodoehi a mi. Nɛ zugba a nɔ ma tsaka, nɛ wo ma gli nɛ e ma hyi bɔ nɛ a nɛ eko hyɛ. 26 Nihi fuu maa ye gbeye nɛ a maa hɛli ngɛ okadi nɛ ɔmɛ a he, ejakaa Hiɔwe tete ma tsaka. 27 Jamɛ a be ɔ mi nɛ a maa na Nɔmlɔ Bi ɔ nɛ ma ngɛ bɔ kuu ɔmɛ a mi kɛ he wami kɛ anunyami. 28 Lɔ ɔ he je ɔ, ke nyɛ na nɛ ni nɛ ɔmɛ ngɛ nɔ yae ɔ, nyɛ wo nyɛ hɛ mi nɔ nɛ nyɛɛ hyɛ hiɔwe, ejakaa nyɛ yi wami hemi be ɔ nɛ su ji lɔ ɔ nɛ."

29 Kɛkɛ nɛ e bu mɛ abɛ nɛ e de ke, "Nyɛɛ to tso ko kaa mangoo tso ɔ kɛ tso kpa amɛ a he hɛ. 30 Ke a bɔni ba jemi pɛ gbiɛ nya su. 31 Ja a kɛ ke okadihi nɛ i tu a he munyu nɛ ɔmɛ bɔni a he kpo jemi pɛ nyɛɛ le kaa Mawu Matsɛyemi ɔ su si.

32 I ngɛ nyɛ dee anɔkuale mi ke, ke ni nɛ ɔmɛ ba mi pɛ nyɛɛ le kaa yi nɔ nɛ ɔ nyagbe ɔ su. 33 Nɛ hiɔwe kɛ zugba kulaa maa be kɛ ho, se ye munyu ɔmɛ maa hi si daa.

34 Nyɛ hɛ nɛ hi nyɛ he nɔ! Nyɛ ko ha nɛ ye bami ɔ nɛ ba ti nyɛ si tlukaa. Ma ko ba na nyɛ nɛ nyɛ ngɛ kɛkɛ, nɛ nyɛ ngɛ fiɛe, nyɛ ngɛ da nue nɛ nyɛ kɛ je nɛ ɔ mi níhi pee nyɛ kɔmɔ. 35 Ejakaa ni nɛ ɔmɛ maa ba je ɔ tsuo nɔ. 36 Nyɛɛ hwɔɔ be fɛɛ be nɛ nyɛɛ sɔle wawɛɛ, nɛ ke e maa hi ɔ, nyɛɛ hi he wami nɛ nyɛ nyɛ ni nɛ ɔmɛ a mi nɛ nyɛɛ gu."

37 Daa ligbi ɔ, Yesu yaa Sɔlemi We ɔ nɛ e ya tsɔɔ ni, nɛ gbɔkuɛ mi ɔ e yaa ya hwɔɔ Nuyoku ɔ nɔ. 38 Nɛ ke je na mɔtu pɛ ni ɔmɛ baa e ngɔ ngɛ Sɔlemi We ɔ nɛ a ba buɔ lɛ tue.