1 Nɛ Farisi bi kɛ mlaa tsɔɔli komɛ nɛ je Yerusalem ɔ ba bi Yesu ke, 2 "Mɛni he je nɛ o kaseli ɔmɛ yi Yuda bi ɔmɛ a blema kusumi ɔmɛ a nɔ ɔ? Ejakaa mɛɛ lɛɛ a fɔ we a dɛ kaa bɔ nɛ wa kusumi ɔ ngɛ ɔ loko ji a yeɔ ni." 3 Yesu he nɔ nɛ e bi mɛ ke, "Mɛni he je nɛ nyɛ hu nyɛɛ kɛ nyɛ kusumi ɔmɛ tɔɔ Mawu kita amɛ a nɔ ɔ? 4 Ejakaa Mawu de ke, ‘Buu o tsɛ kɛ o nyɛ, nɛ nɔ tsuaa nɔ nɛ gbiɛɛ e tsɛ loo e nyɛ ɔ, a maa gbe le.’ 5 Se nyɛɛ lɛɛ nyɛ deɔ ke, ‘Ke ji e fi nyɛ fɔli ɔmɛ tete ɔ, nɔ nɛ nyɛ ma kɛ ye kɛ bua mɛ ɔ, nyɛ ma kɛ ba ha asafo ɔ mohu.’ 6 Enɛ ɔ he je ɔ, nyɛ ngɔ nyɛ nitsɛmɛ nyɛ mlaa amɛ kɛ to Mawu kita nɛ e wo kaa o bu o tsɛ kɛ o nyɛ nɛ o hyɛ a nɔ ɔ nane mi. 7 Osatotsɛmɛ! Anɔkuale munyu nɛ Yesaia tu ngɛ nyɛ he ke, 8 ‘Ni nɛ ɔmɛ kɛ a nya woɔ ye hɛ mi nyami, se e ji a tsui mi. 9 Yaka tsuaa nɛ a jaa mi ɔ nɛ, ejakaa a tsɔɔ we Mawu kita amɛ, se mohu nimli a mlaa amɛ nɛ a tsɔɔ.’ "

10 Nɛ Yesu tsɛ asafo ɔ kɛ ba e ngɔ nɛ e de mɛ ke, "Nyɛɛ bu nɔ nɛ ma de ɔ tue, nɛ nyɛɛ nu sisi. 11 Tsa pi nɔ nɛ yaa nɔ nya mi ɔ nɛ peeɔ nɔmlɔ mutsɛ, se mohu nɔ nɛ jee nɔ nya mi ɔ ji nɔ nɛ woɔ lɛ mu."

12 Kɛkɛ nɛ e kaseli ɔmɛ ba e ngɔ ba de lɛ ke, "Anɛ o le kaa benɛ Farisi bi ɔmɛ nu munyu ɔ nɛ o tu ɔ, a na o he abofu ɔ?"

13 Nɛ e he nɔ ke, "Tso tsuaa tso nɛ pi ye Tsɛ ngɛ hiɔwe ɔ nɛ ma lɛ ɔ, a maa hia lɛ. 14 Nyɛ ko di a se. Hɛ yuyuili nɛ ngɛ hɛ yuyuili blɔ tsɔɔe ji mɛ, mɛ tsuo a ma ya nɔ muɔ mi."

15 Petro he nɔ nɛ e bi Yesu ke, "tsɔɔ wɔ abɛ ɔ nɛ o bu ke tsa pi nɔ nɛ yaa nɔ nya mi ɔ nɛ peeɔ nɔmlɔ mutsɛ ɔ sisi."

16 Nɛ Yesu bi ke, "Anɛ nyɛ hu nyɛ nui ni nɛ ɔmɛ a sisi kɛ sa? 17 Anɛ nyɛ li kaa nɔ tsuaa nɔ nɛ yaa nɔ nya mi ɔ, muklii mi e ya sɛɛ loko ji a ya jeɔ kɛ woɔ agbotso mi lo? 18 Se munyu yayahi nɛ jee nya mi jee kpo ɔ, tsui mi a jee, nɛ mɛ ji níhi nɛ woɔ nɔmlɔ he mu ɔ nɛ. 19 Ejakaa tsui mi nɛ susumi yayahi kaa, nɔmlɔ gbemi, gba puɛmi, ajuama bɔmi, jumi, lakpa kɛ nyangɔ odase yemi kɛ musu bɔmi jee. 20 Ni nɛ ɔmɛ ji níhi nɛ woɔ nɔmlɔ he mu, se dɛ nɛ a fɔ we loko ji a yeɔ ni ɔ, e wui nɔ he mu ngɛ mumi mi."

21 Nɛ Yesu je lejɛ ɔ, e nyɛɛ nane kɛ ho Tiro kɛ Zidon ni ɔmɛ a mi ya. 22 Kɛkɛ nɛ Kanaa yo ko nɛ je lejɛ ɔ ni ɔmɛ a mi ɔ ba e ngɔ kɛ ngmlaa ke, "Naa mi mɔbɔ, Nutsɔ, Matsɛ David Bi! Mumi yayami ko ngɛ ye biyo haoe."

23 Se Yesu pui e nya mi. Nɛ e kaseli ɔmɛ ba e ngɔ ba kpa lɛ pɛɛ nɛ a de lɛ ke, "Moo wo lɛ blɔ nɛ e ho, ejakaa e ngɛ ngmlaa kpae kɛ ngɛ wa se nyɛɛe tsɔ."

24 Nɛ e he nɔ de mɛ ke, "Israel tohi nɛ laa amɛ a ngɔ kɛkɛ nɛ a tsɔ mi, pi ma je li ɔmɛ a ngɔ."

25 Se yo ɔ ba ba kpla si ngɛ e hɛ mi nɛ e de lɛ kɛ pɛɛ kpami ekohu ke, "Mawetsɛ, moo ye kɛ bua mi!"

26 Yesu he nɔ ke, "E dɛ kaa a ngɔɔ bimɛ abolo ɔ sakee kɛ haa gbehi."

27 Nɛ yo ɔ he nɔ ke, "Mawetsɛ, ja i mohu, se tse gbe bi ɔmɛ hu yeɔ bibliwi nɛ pueɔ si ngɛ a nutsɔ o okplɔɔ ɔ sisi ɔ eko!"

28 Kɛkɛ nɛ Yesu ha lɛ heto ke, "Yo, o hemi kɛ yemi ɔ kle! A pee ha mo kaa bɔ nɛ o ngɛ hlae ɔ." Nɛ a tsa e biyo ɔ jamɛ a ngmlɛfia a nɔ nɔuu.

29 Yesu je lejɛ ɔ kɛ ba Galilea wo ɔ nya, nɛ e kuɔ kɛ ya yoku ɔ nɔ, nɛ e ya hi si ngɛ lejɛ ɔ. 30 Nihi babauu ba e ngɔ nɛ a wo nihi nɛ kplɔ kɛ nihi nɛ hɛ yu kɛ libɔɔhi kɛ mumuihi kɛ ni kpahi fuu kɛ ba pue e nane nya nɛ e tsa mɛ tsuo. 31 Nɛ ni ɔmɛ a nya kpɛ a he benɛ a na kaa mumui ɔmɛ ngɛ munyu tue, libɔɔ ɔmɛ te si, nihi nɛ kplɔ ɔmɛ ngɛ nyɛɛe, nɛ nihi nɛ he yu ɔmɛ hu ngɛ nɔ hyɛe ɔ, a wo Israel Mawu ɔ hɛ mi nyami.

32 Kɛkɛ nɛ Yesu tsɛ e kaseli ɔmɛ kɛ ba e ngɔ nɛ e de mɛ ke, "Nimli nɛ ɔmɛ a he mɔbɔ ngɛ mi pee, ejakaa mwɔnɛ ɔ ji ligbi etɛ sɔuu nɛ a kɛ mi hi si nɛ a nɛ nɔ ko nɛ a ye i sume kaa ma wo mɛ blɔ kɛ muklii mi gu nɛ klibi nɛ ya po mɛ ngɛ blɔ ɔ nɔ."

33 E kaseli ɔmɛ bi lɛ ke, "Jije wa ma na abolo fuu ngɛ ngɛ nga nɛ ɔ nɔ nɛ maa su asafo nɛ ɔ nya?"

34 Nɛ Yesu bi mɛ ke, "Abolo nyɛmɛ nyɛ ngɛ?" A de lɛ ke, "Kpaago kɛ lo tsɔwi bɔɔ ko."

35 Nɛ e fa asafo ɔ ke a hi si ngɛ zugba. 36 Kɛkɛ nɛ e kukuɔ abolo kpaago ɔ kɛ lo ɔmɛ, nɛ benɛ e gbaa nɔ ɔ, e ku a mi nɛ e ngɔ kɛ ha e kaseli ɔmɛ nɛ mɛ hu a ngɔ kɛ ha asafo ɔ. 37 Nɛ mɛ tsuo a ye nɛ a tɔ, nɛ kaseli ɔmɛ bua bibliwi nɛ piɛ ɔ nya nɛ a na kusii kpaago nɛ a hyi tɔtɔɔtɔ. 38 Nihi nɛ ye ni ɔ, a nya ji nyumuhi akpe eywiɛ, e slo yihi kɛ jokuɛwi.

39 Jehanɛ ɔ, Yesu wo asafo ɔ blɔ nɛ lɛ nitsɛ e wo lɛ nɛ e pue nɔ kɛ ba Magadan ni ɔmɛ a mi.