1 Hejɔɔmi Ligbi ɔ nyagbe mi benɛ je bɔni nami kɛ ma otsi ɔ kekle ligbi ɔ nɔ ɔ, Maria Magdalena kɛ Maria kake ɔ ba yɔkɔ ɔ slaami.

2 Kɛkɛ nɛ zugba hoso wawɛɛ si kake too, ejakaa Nutsɔ ɔ bɔfo je hiɔwe kple si, nɛ e ba kpɛne tɛ ɔ kɛ je muɔ ɔ nya kɛ ho se ya nɛ e ho hi si ngɛ nɔ 3 E hɛ mi ngɛ kpɛe kaa oslabai, nɛ e tade ɔ hiɔ futafuta. 4 Soja amɛ ye gbeye nɛ a he kpokpo benɛ a na bɔfo ɔ, nɛ a plɛ kaa ni gbogboehi. 5 Kɛkɛ nɛ bɔfo ɔ de yi ɔmɛ ke, "Nyɛ ko ye gbeye, ejakaa i le kaa nyɛ ngɛ Yesu nɔ nɛ a sɛu lɛ ɔ hlae. 6 E be hiɛ ɔ, e te si kaa bɔ nɛ e de ɔ. Nyɛɛ ba nɛ nyɛ ba hyɛ muɔ ɔ mi he nɛ a dla lɛ ngɛ ɔ. 7 Nyɛɛ ya mlamlaamla nɛ nyɛ ya de e kaseli ɔmɛ ke, e te si kɛ je gbeje, nɛ e sɛ a hlami kɛ yaa Galilea nɛ e kɛ mɛ ya kpe ngɛ lejɛ ɔ."

8 Nɛ yi ɔmɛ ye esɔ kɛ je yɔkɔ ɔ he kɛ gbeye kɛ nyami konɛ a ya de e kaseli ɔmɛ bɔfo ɔ sɛ ɔ. 9 Se benɛ a hɛɛ fo kɛ yaa a, o nɛ, Yesu kɛ mɛ ya kpe nɛ e de mɛ ke, "I nga nyɛ!" Kɛkɛ nɛ a ya kpla si ngɛ e hɛ mi nɛ a nu e nane, nɛ a ja lɛ.

10 Nɛ Yesu de mɛ ke, "Nyɛ ko ye gbeye, nyɛɛ ya nɛ nyɛ ya de ye nyɛmi ɔmɛ ke a ho Galilea ya nɔuu, nɛ a kɛ mi ya kpe ngɛ lejɛ ɔ."

11 Benɛ yi ɔmɛ yaa ma a mi ɔ, Sɔlemi We ɔ he buli ɔmɛ a ti nihi nɛ ngɛ yɔkɔ ɔ he bue ɔ hu ba ma a mi nɛ a ba bɔ osɔfo nikɔtɔma amɛ nihi nɛ ba a. 12 Kɛkɛ nɛ a kɛ ma mi nikɔtɔma amɛ ya kpe yi nɛ a wo soja amɛ a nya mi nɔ, 13 nɛ a de mɛ ke a de ke Yesu kaseli ɔmɛ ba nɛ a ba ju e gbogboe ɔ nyɔ mi benɛ a hwɔ mahe. 14 A wo soja amɛ si ke, "Ke amlaalo ɔ nu he ɔ, wa maa da nyɛ se nɛ nyɛ be sane ko nae."

15 Soja amɛ he nyɔ mi ni ɔ, nɛ a pee bɔ nɛ a tsɔɔ mɛ ɔ. Nɛ sane nɛ ɔ gbɛ fia ngɛ Yuda bi ɔmɛ a kpɛti kɛ ba si mwɔnɛ ɔ.

16 Kɛkɛ nɛ kaseli nyɔngma kɛ kake ɔ je kɛ ho Galilea yoku ɔ nɔ ya, he nɛ Yesu de ke a maa na lɛ ngɛ ɔ. 17 Benɛ a ya na lɛ ɔ, a kpla si nɛ a ja lɛ, se a kpɛti ni komɛ je nguane kaa tsa pi Yesu i.

18 Kɛkɛ nɛ Yesu kɛ mɛ tu munyu nɛ e de mɛ ke, "A ngɔ he blɔ tsuo kɛ ha mi ngɛ hiɔwe kɛ zugba a nɔ. 19 Lɔ ɔ he je ɔ, nyɛɛ ya nɛ nyɛ ya pee majemaje ɔ tsuo ye kaseli. Nyɛɛ baptisi mɛ ngɛ Tsɛ ɔ kɛ Bi ɔ kɛ Mumi Klɔuklɔu ɔ biɛ mi, 20 nɛ nyɛɛ tsɔɔ kaseli he nɛ ɔmɛ nɛ a ye mlaahi tsuo nɛ i tsɔɔ nyɛ ɔ nɔ; nɛ Niinɛ, i kɛ nyɛ ngɛ daa kɛ yaa su je mi nyagbe."