1 Foibe nɛ ji wa suɔlɔ nyɛmiyo nɛ je Kenkrea asafo ɔ mi ɔ ma nyɛ ngɔ ngɛ be kpiti mi. E gbo hiɛ ɔ asafo ɔ he dengme. 2 Nyɛ he lɛ atuu kaa nyɛ nyɛmiyo ngɛ Nutsɔ ɔ mi; nɛ nyɛɛ pee lɛ nubwɔ kaa bɔ nɛ sa Kristo asafo bimɛ. Nɛ nyɛɛ ye kɛ bua lɛ ngɛ blɔ tsuaa blɔ nɔ, ejakaa lɛ hu e ye kɛ bua ami nitsɛ kɛ nihi fuu ngɛ haomihi a mi. 3 Nyɛ nga Priska kɛ Akuila, ye huɛmɛ nɛ i kɛ mɛ tsuɔ ni ngɛ Yesu Kristo mi ɔ ha mi. 4 Anɔkuale ji kaa a kɛ a wami sã bɔ ngɛ ye he; nɛ tsa pi ami kɛkɛ nɛ i ngɛ mɛ si nae ɔ, se ma je li ɔmɛ nɛ ngɛ asafo ɔmɛ a mi tsuo ngɛ mɛ si nae.

5 Nyɛ nga nihi tsuo nɛ kpee nɛ a jaa Mawu ngɛ a wehi a mi ɔ ha mi. Nyɛ nga ye huɛ kpakpa Epaineto nɛ ji kekle Asia no nɛ kɛ e he ha Kristo ɔ ha mi. 6 Nyɛ nga Maria nɔ nɛ gbo wa he dengme ɔ hu ha mi. 7 Nɛ jehanɛ ɔ, nyɛ nga Androniko kɛ Yunia nɛ ji ye wekuli nɛ a wo i kɛ mɛ tsu mi ɔ ha mi. A he biɛ ngɛ bɔfo ɔmɛ a kpɛti, nɛ a kɛ a he ha Kristo loko i fie a se. 8 Nyɛ nga Ampliato, nɔ nɛ i suɔ lɛ kaa Mawu nitsɛ bi ɔmɛ a ti nɔ kake ɔ, 9 kɛ Urbano, wa huɛ nɛ waa kɛ lɛ tsuɔ ni ngɛ Kristo mi ɔ, kɛ suɔlɔ Staki.

10 Nyɛ nga Apele, nɔmlɔ kpakpa nɛ Nutsɔ ɔ je ha mi ɔ. Nɛ nyɛ nga nihi nɛ ngɛ ni tsue ngɛ Aristobulo we ɔ mi ɔ hulɔ. 11 Nyɛ kai nɛ nyɛ nga ye weku no Herodion kɛ Kristo sɔmɔli ɔmɛ nɛ ngɛ Narkiso we ɔ mi ɔ. 12 Nyɛ nga Nutsɔ ɔ ni tsuli nɛ ji Trifaina kɛ Trifosa kɛ suɔlɔ kpakpa Persi nɛ tsu ni wawɛɛ kɛ ha Nutsɔ ɔ. 13 Nyɛ nga Rufo, nɔ nɛ Nutsɔ ɔ hla kaa e pee lɛ nitsɛ e nɔ ɔ, kɛ e nyɛ nɛ ngɔ mi kɛ pee lɛ nitsɛ e bi ɔ. 14 I kɛ pɛɛ kpami ngɛ nyɛ hɛ mi fɔe nɛ nyɛ nga Asinkrito, Felgon, Herma, Patroba, Herme kɛ nyɛmimɛ nɛ kɛ mɛ ngɛ ɔ. 15 Nyɛ nga Filologo, Yulia, Nerea kɛ e nyɛmiyo ɔ kɛ Olimpa kɛ Kristo se nyɛɛli ɔmɛ tsuo nɛ kɛ mɛ ngɛ ɔ. 16 Nyɛɛ ta nyɛ bi a dɛ mi nɛ nyɛ nga nyɛ he kɛ suɔmi. Kristo asafo ɔmɛ tsuo nɛ ngɛ hiɛmɛ nɛ ɔ biɔ nyɛ.

17 Amlɔ nɛ ɔ, nɔ́ kake nɛ ngɛ ye nya nɛ ma de loko ma gbe womi nɛ ɔ nya ji, nyɛɛ kɛ nihi nɛ kɛ mi gbamihi baa, nɛ ha nihi a hemi kɛ yemi ngɛ tɔtɔe, kɛ nihi nɛ a ni tsɔɔmi ɔmɛ je ekpa ngɛ Kristo he sane ɔ nɛ nyɛ kase ɔmɛ he ɔ nɛ ko bɔ. 18 Kikɛmɛ a tsɔɔli nɛ ɔmɛ ɔ, tsa pi wa Nutsɔ Yesu ni tsumi nɛ a ngɛ tsue, se mohu mɛ nitsɛmɛ a se nami he ni nɛ a ngɛ tsue. A nya mi ngɔɔ dɔkɔdɔkɔ, nɛ a nyɛɔ mlɔɔ nihi nɛ a juɛmi se ti we ɔ. 19 Se nyɛɛ lɛɛ nɔ tsuaa nɔ le kaa nyɛ buɔ tue nɛ nyɛ yeɔ anɔkuale; nɛ enɛ ɔ peeɔ mi bua jɔmi saminya. Ja a he je ɔ, ma suɔ nɛ nyɛɛ nyɛɛ nɔ́ nɛ da se, nɛ nyɛɛ hiɔ yayami. 20 E be kɛe nɛ he jɔmi Mawu ɔ maa naa Abosiami nɔ kɛ wo nyɛ nane si nɛ e maa wɛɛ lɛ bɔdɔbɔdɔ. Wa Nutsɔ Yesu Kristo jɔɔmi ɔ kɛ nyɛ nɛ hi si.

21 Timoteo, ye huɛ nɛ i kɛ lɛ tsuɔ ni kɛ ye wekuli Lukio kɛ Yason kɛ Sosipatre biɔ nyɛ. 22 Ami Tortio, nɛ ngɛ nyɛ womi nɛ ɔ ngmae ngɛ Paulo biɛ mi ɔ hu biɔ nyɛ ngɛ Nutsɔ ɔ biɛ mi. 23 Gaio, nɔ nɛ i ngɛ e ngɔ nɛ i kɛ asafo ɔ kpee ngɛ e we ɔ mi ɔ biɔ nyɛ. Erasto nɛ ji ma sika tolɔ ɔ, kɛ wa nyɛmi Kuarto hu biɔ nyɛ. 24 Nyɛɛ hi si saminya. Wa Nutsɔ Yesu Kristo dloomi ɔ kɛ nyɛ tsuo nɛ hi si.

25 A ngɔ anunyami kɛ ha Mawu! Lɛ e ma nyɛ ha nyɛɛ da si kpɛii ngɛ nyɛ hemi kɛ yemi ɔ mi, ngɛ Yesu Kristo he Manye Munyu ɔ nɛ i fiɛ ɔ nya, kɛ anɔkuale nyakpɛ sane nɛ a ngɔ laa yi nɔhi babauu ngɛ blema be ɔ mi, se a je lɛ kpo ɔ. 26 Jehanɛ ɔ, a je jamɛ a anɔkuale sane ɔ kpo paa kɛ gu gbali ɔmɛ a ngmami ɔmɛ a nɔ. Nɛ ngɛ neneene Mawu ɔ kita nya a, a ha nɛ je ɔ tsuo le, konɛ nɔ fɛɛ nɔ nɛ na hemi kɛ yemi ngɛ Kristo mi nɛ a bu lɛ tue. 27 A ngɔ anunyami kɛ ha Mawu, nɔ nɛ lɛ ji ni lelɔ kake too ɔ, kɛ gu Yesu Kristo, wa Nutsɔ ɔ nɔ. Amen.