यहेजकेल 13

झुटा भगवान वगे गेथी वात केवा वाळा ना वीरोद मे भगवान वगे गेथी वात

1 यहोवा नो आहयो बोल मारीन्‌तां पुग्‌यो, 2 "ए माणेह नी अवल्‌यात, ईस्‌रायल ना जे भगवान वगे गेथी वात केण्‌या आह़फाम नात मन सी भगवान वगे गेथी वात केय, तीमना वीरोद मे भगवान वगे गेथी वात कीन तु के, यहोवा नो बोल ह़मळो!"

3 मालीक यहोवा आसम केय: "गरा आय पड़े, तीहया वण-अकल्‌या भगवान वगे गेथी वात केवा वाळा पोर जे आह़फाम नीत आत्‌मा पसळ भटक जाय, अने कंय बी दरसन नी देख्‌या! 4 ए ईस्‌रायल, तारी मे ना भगवान वगे गेथी वात केवा वाळा ओदरला घोरु मे ना कोल्‌यान तेवा बण र्‌या। 5 तमु चीहायलु भीतड़ु पोर चड़ीन ईस्‌रायल ना घोराणा जुगु भीतड़ु नी ह़ुदार्‌या, जीनी सी तीहया यहोवा ना दाड़े झुमायवा मे टेकीन री सकता। 6 तीहया माणहु जे केय, यहोवा आसम केय, तीहया दरसन नी रीकामी अने झुटी वात करला से; अने ते बी आहयी आह करावे के यहोवा आहयो बोल पुरो करहे; ते बी यहोवा तीमने नी मोकल्‌यो। 7 ह़ु तमारो दरसन झुटो नी हय, अने ह़ु तमु झुटी अगी हयवा वाळी वात नी केता? तमु केवो, ‘यहोवा आसम केय’ पण में कंय बी नी केदो।"

8 करीन मालीक यहोवा तमु ने आसम केय: "तमु जे रीकामी वात केदा अने झुटा दरसन देखला से, करीन में तमारा वीरोद मे से, मालीक यहोवा आसमेत केय। 9 जे भगवान वगे गेथी वात केवा वाळा झुटा दरसन देखे अने झुटी अगी हयवा वाळी वात केय, मारो हात तीना वीरोद मे रेहे, अने तीहया मारा माणहु नी मंडळी मे साजल्‌या नी रेय, अने नी तीमना नाम ईस्‌रायल नी नाम नी चीट्‌ठी मे लीखे, अने नी तीहया ईस्‌रायल ना देस मे भराय सके; आनी सी तमु जाण लेहु के में मालीक यहोवा से।

10 "झुटा भगवान वगे गेथी वात केण्‌या आहयु कीन मारा माणहु ने वहराड़े के आखु कंय सांती मे से पण आञे कोय सांती मे हयेत नी। मारा माणहु कमजोर दगड़ा नु भीतड़ु उबु कर्‌या अने भगवान वगे गेथी वात केण्‌या चुनो लगाड़ीन तीने धोळ्‌ळा चुना वेर पुताय करीन ढाक देदा।✝13:10 यीरम्‌या 6:14; 8:11 11 तीहया पुताय करवा वाळा ने के तीहयु भीतड़ु ओदरी जहे। काहाके जण जबर पाणी पड़हे, अने मोट्‌ली आंजी तीने पाड़ देहे। 12 करीन जत्‌यार भीतड़ु पड़ जहे, ता ह़ु माणहु तमने आहयु नी केय, जे तमु पुताय करला तीहयु कां ज्‌यु?"

13 करीन मालीक यहोवा तमने आसम केय: "में खीजवाय्‌न तीने मोट्‌ली आंजी नी लारे पाड़ही; अने मारी रीह सी घण जबर पाणी पड़हे, अने मारी सी मोट्‌ला-मोट्‌ला गारा पड़हे के भीतड़ु ने ओदार नाखे। 14 आहयी रीते जे भीतड़ु पोर तमु पुताय करला से, तीने में ओदार देही, अने कादा मे भेसकी देही, अने तीनी नीव उखड़ जहे; अने जत्‌यार तीहयी पड़हे, ता तमु बी तीनी तळे डबाय्‌न मर जहु; अने तमु जाण लेहु के में यहोवा से।

15 "आहयी रीते में भीतड़ु पोर अने तीने पुताय करवा वाळा पोर मारी रीह नीकाळीन; अळतेण तमने कीही, नी ते भीतड़ु र्‌यु, अने नी तीने पुताय करवा वाळा र्‌या, 16 मतलब ईस्‌रायल ना तीहया भगवान वगे गेथी वात केवा वाळा जे यरुसलेम ना बारा मे भगवान वगे गेथी वात केता हता अने यरुसलेम नी सांती नो दरसन देखता हता, पण मालीक यहोवा आसम केय, के सांती हयेत नी।"

झुटा भगवान वगे गेथी वात केवा वाळा बयरा ना वीरोद मे भगवान वगे गेथी वात

17 अळतेण मालीक केदो, "ए माणेह नी अवल्‌यात, तु तारा भायु ना बयरा-सोर्‌या ना वीरोद मे मोडु खोल, जे आह़फाम नात मन सी भगवान वगे गेथी वात केय; तीमना वीरोद मे भगवान वगे गेथी वात कीन के, 18 मालीक यहोवा आसम केय:

"तीहया बयरा खत्‌तम हये! जे माणहु ने फसाड़वा करीन आह़फाम ना हातु वेर जादु वाळा तावीज बणावे अने आह़फाम ना मुंडा ढाकवा करीन बीजा भाती ना पड़दा बणावे, तमु मारा माणहु ना जीव ने जाळ मे नाखीन आह़फीम नो जीव बचाड़ लेहे ह़ु? 19 तमु ते मुठ-मुठ भरीन जळगम अने रोट्‌ला ना टुकड़ा नी बदले मने मारा माणहु नी नींगा मे वीटळ्‌ळो ठेरावीन, अने तमारी तीहयी झुटी वात नी लारे, जे मारा माणहु तमारा मोडे ह़मळे, जे खत्‌तम हयवा नी लायक नी हता, तीमने मार नाख्‌या; अने जे बचवा नी लायक नी हता तीहया जीव ने बचाड़ राखला से।"

20 करीन मालीक यहोवा तमु ने आसम केय, "देखो, में तमारा तीहया मुंडा तळे घालवा नी गादीम ना वीरोद मे से, जीमनी लारे तमु जीव नो सीकार करो, करीन जीमने तमु सीकार करीन उडाड़ो तीमने मे तमारी बाथ मे गेथा हापकीन तीमने उडाड़ देही। 21 में तमारा मुंडे ना रुमाल ने फाड़ीन मारा माणहु ने तमारा हात मे गेथा छोड़ावही, अने अगा चालीन तीहया तमारा हक मे नी रेय के तमु तीमनो सीकार कर सको; ता तमु जाण लेहु के में यहोवा से।

22 "तमु जे झुट मेकीन धरमीम नु मन दुखी करला से, में तीने दुखी करवा नी चाह्‌यो, तमु वेरी माणहु ने हीम्‌मत आपला से, के तीहया तीमनी गलत वाटे गेथा नी फीरे अने जीवत्‌ला रेय। 23 आहया कारण सी तमु अळी नी ते झुटो दरसन देखो, अने नी अगी हयवा वाळी झुटी वात केवो; काहाके में मारा माणहु ने तमारा हात मे गेथा छोड़ावही। ता तमु जाण लेहु के में यहोवा से।"