यहेजकेल 45

देस नी जागा मे भगवान नो वाटो

1 जत्‌यार तमु चीट्‌ठी नाखीन देस ने वाटो, ता देस मे गेथो एक वाटो चोखलो जाणीन यहोवा ने ह़ोपजो; तीनी लम्‌बाय पच्‌चीह हजार टोकरा रेय अने चवड़ाय दह हजार टोकरा रेय, तीहयो वाटो तीनी च्‌यारो-मेर नी काकड़ तक चोखलो ठेरे। 2 तीनी मे गेथो चोखला जागा जुगु पांच ह़ोव टोकरा नाम्‌बो अने पांच ह़ोव टोकरा चवड़ो जागो रेय, अने तीनी च्‌यारो-मेर पचाह-पचाह हात चवड़ो जागो छुट्‌लो पड़लो रेय। 3 तीहया चोखला जागा मे तमु पच्‌चीह हजार टोकरा नाम्‌बो अने दह हजार टोकरा चवड़ो जागो मापजो; अने तीनीत मे चोखलो जागो बणावजो, जे आखा गेथो चोखलो ठेरे। 4 जे पुंजारो चोखला जागा नी सेवा-चाकरी करे अने यहोवा नी सेवा-चाकरी करवा करीन ह़ाते आवे, तीहयो तीमनीत जुगु रेय; तां तीमना घोरु जुगु जागो रेय अने चोखला जागा जुगु चोखलो ठेरे। 5 अळतेण पच्‌चीह हजार टोकरा नाम्‌बो, अने दह हजार टोकरा चड़वो एक वाटो, घोर नी सेवा-चाकरी करवा वाळा लेवीम ना वीह कोपरा जुगु रेय।

6 अळतेण ह़ेर जुगु, ह़ोपला चोखला जागान्‌तां तमु पांच हजार टोकरा चड़वो अने पच्‌चीह हजार टोकरा नाम्‌बो, खास जागो ठेरावजो; तीहयो ईस्‌रायल ना आखा घोराणा जुगु रेय।

मुख्‌या जुगु जागो

7 मुख्‌या नो खुद नो वाटो चोखला ह़ोपला वाटा अने ह़ेर ना खास जागा नी बेम ह़ोड़ मतलब बेम नी बुडवणी अने उगवणी ह़ोड़ बेम वाटा नी अगळ हय; अने तीनी लम्‌बाय बुडवणी गेथी लगाड़ीन उगवणी ह़ोड़ तक तीहया बे वाटा मे गेथो काना बी एक नी बराबर हय। 8 ईस्‌रायल ना देस मे मुख्‌या नो आहयोत खुद नो जागो रेय। मारा ठेरावला मुख्‌या मारा माणहु ने अळी वेला नी पाड़े; पण ईस्‌रायल ना घोराणा ने तीमना घोराणा नी अनसारे देस जड़े।

मुख्‌या जुगु नेम

9 भगवान यहोवा आसम केय, "ए ईस्‌रायल ना मुख्‌या! रेवा देवो, वेला पाड़वा अने दमवा छोड़ देवो, अने नीयाव अने धरम ना काम कर्‌या करो; मारा माणहु ने नीकाळवा छोड़ देवो, भगवान यहोवा आसमेत केय।

10 "तमारी ताकड़ी, माप-तोल ना बाट अने मापवा नु ठाहरु खरलु रेय।✝45:10 लेव्‌यवेवस्‌था 19:36

11 "एपा*45:11 एपा 10 कीला बराबर अने बाट बेम एकीत माप ना रेय, मतलब बेम मे होमोर नो दह़वो वाटो ह़माय; बेम नी माप होमोर ना हीसाप सी रेय।

12 "सेकेल*45:12 सेकेल 11गराम सी थोड़ुक वदु रेय वीह गेरा*45:12 गेरा आदो गराम नो रेय; अने तमारा मानेह*45:12 मानेह आनो भार आदा कीला सी थोड़ोक वदु रेय वीह, पच्‌चीह, नीता पंदरे सेकेल नी रेय।

13 "तमारी भेट आहयी रेय, मतलब गम ना होमेर*45:13 होमेर 100 कीलो बराबर वेर एपा नो छटवो वाटो, अने जळगम ना होमेर मे गेथा एपा नो छटवो वाटो आपजो। 14 तेल नो ठेरावलो वाटो कोर*45:14 कोर 220 लीटर ते दह बत*45:14 बत 22 लीटर मतलब एक होमेर नी बराबर से, काहाके होमेर दह बाट नो रेय। 15 ईस्‌रायल ना वारला-वारला चारवा ना जागा मे गेथा बे-बे ह़ो गाडरा-बोकड़ा मे गेथा एक गाडरु नीता बोकड़ु आपे। आहयु आखु ह़मान अनबादा, होम बादा अने मेल-मीलाप नी बादा जुगु आपे जीनी सी तीमनी जुगु पछतावो करे, भगवान यहोवा आसमेत केय।

16 "ईस्‌रायल ना मुख्‌या जुगु देस ना आखा माणहु आहयी भेट आपे। 17 तीवार, नवला चांद ना दाड़ा, अराम ना दाड़ा अने ईस्‌रायल ना घोराणा नी आखी ठेरावली टेम मे होम बादा, अनबादा, अने रेचव्‌वा नी बादा आपवा मुख्‌या नुत काम रेय। ईस्‌रायल ना घोराणा जुगु पछतावो करवा करीन तीहयी पापबादा, अनबादा, होम बादा अने मेल-मीलाप नी बादा तीयार करे। ईस्‌रायल ना घोराणा जुगु पछतावो करवा करीन तीहयी पापबादा, अनबादा, होम बादा अने मेलबादा तीयार करे।"

तीवार

18 भगवान यहोवा आसम केय, "पेल्‌ला मयना ना पेल्‌ला दाड़े तु एक वण-गुनाळ्‌ळु वाछड़ु लीन चोखला जागा ने चोखो करजे। 19 आहयी पापबादा नी लोय मे गेथु पुंजारो थोड़ुक लीन घोर नी चवखट ना खम्‌बे, अने वेदी ना पाया ना च्‌यारोव खुणा, अने मोय नु आंगणु ना फाटा ना खम्‌बा पोर लगाड़े। 20 अळतेण भुलीन नीता गलती सी पाप कर्‌या हय तीमनी जुगु मयना ना ह़ातवा दाड़े बी आसमेत करजे; आहयीत रीते घोर जुगु पछतावो करजे।

21 "पेल्‌ला मयना ना चोवदवा दाड़े तमारो तीवार हया करे, तीहयो ह़ात दाड़ा नो तीवार रेय अने तीहया तीवार मे खमीर वगर ना रोट्‌ला खाय। 22 तीहया दाड़े मुख्‌यो आह़फा अने आखा माणहु जुगु एक वाछड़ु पापबादा जुगु तीयार करे। 23 तीवार ना ह़ातोव दाड़ा तीहयो यहोवा जुगु होम बादा तीयार करे, मतलब एक-एक दाड़े ह़ात-ह़ात वण-गुनाळ्‌ळा वाछड़ा अने ह़ात-ह़ात वण-गुनाळ्‌ळा गाडरा अने दाड़ीक एक-एक बोकड़ो पाप नी बादा जुगु तीयार करे। 24 आखा वाछड़ा अने गाडरा ह़ाते तीहयो एपा भरीन अनबादा, अने एपा पसळ हीन*45:24 हीन साड़ी तीन लीटर भर तेल तीयार करे।

25 "ह़ातवा मयना ना पंदरवा दाड़े गेथा लगाड़ीन ह़ात दाड़ा तक मतलब तीवार ना दाड़ा मे तीहयो पापबादा, होम बादा, अनबादा अने तेल नी भेट आहयीत रीती नी अनसारे कर्‌या करे।"