घोर मे भगवान नु वीजाळु
1 अळतेण तीहयो मने तीहया फाटान्तां लीज्यो जे उगवणो फीरीन नो हतो। 2 ता ईस्रायल ना भगवान नु वीजाळु उगवणी ह़ोड़ गेथु आयु; अने तीनी अवाज दर्या नु पाणी नी गाज ने तेवी हती; अने तीनु वीजाळु वेर धरती उजड़ान हयी।43:2 यहेजकेल 10:3,4,18,19; 11:22,23; परकासीतवाक्य 1:15 3 आहयो दरसन तीहया दरसन ने तेवो हतो, जे में तीने ह़ेर ने खत्तम करवा करीन आव्वा नी टेमे देखलो हतो; अने तीहया दरसन ने तेम, जे में कबार नंदी ना काठे देखलो हतो; अने में मोडा ना भरहे पड़ ज्यो। 4 ता यहोवा नु वीजाळु तीहया फाटे हय्न घोर मे आय लाग्यु, जे उगवणो फीरीन हतो।
5 ता आत्मा मने उचलीन मोय नु आंगणु मे पुगाड़ देदी; अने यहोवा नु वीजाळु घोर मे भराय जेलु हतु। 6 ता में एक जणा नो बोल ह़मळ्यो, जे घोर मे गेथो मने केवा बाज र्यो हतो, अने तीहयो अदमी मारी ह़ाते उबो हय र्यो हतो। 7 तीहयो मने केदो, "ए माणेह नी अवल्यात, यहोवा आसम केय: आहयो ते मारी राजगादी नो जागो अने पोग मेकवा नो जागो से, जा में ईस्रायल नी वच मे जलम रीया करही। नी ते ईस्रायल नु घोराणु, अने नी तीना राजा तीमनु छीनाळु सी, नीता आह़फाम ना उचा जागा मे आह़फाम ना राजाम ना धोड़ु नी लारे मारु चोखलु नाम वीटळ्ळु ठेरावे। 8 तीहया आह़फाम नी ढेहळ मारी ढेहळ ने तां, अने आह़फाम ना झापला ना खम्बा मारा झापला ना खम्बान्तां बणावता हता, अने मारी अने तीमनी वच मे भीतड़ु एतरुत हतु, अने तीहया तीमना गलत कामु वेर मारु चोखलु नाम वीटळ्ळु ठेरावला हता; करीन मे रीह करीन तीमने खत्तम कर्यो। 9 हाव तीहया आह़फाम नु छीनाळु अने आह़फाम ना राजा ना धोड़ मारी अगळ गेथा सेटा कर देय, ता में तीमनी वच मे जलम रीया करही।
10 "ए माणेह नी अवल्यात, तु ईस्रायल ना घोराणा ने भक्ती ना बारा मे देखाड़ के तीहया आह़फाम ना अधरम ना कामु सी लजवाय्न तीहया भक्ती करवा ह़ीके । 11 कदीम तीहया आह़फाम ना आखा कामु सी लजवाय, ता तीमने आहया घोर नी बणावट अने केवु बणाव्वा, अने तीनी मोय-बारा आव्वा-जवा नी वाट, अने तीनी आखी बणावट रीती, अने नेम देखाड़जे, अने तीनी अगळ लीख राखजे; जीनी सी तीहया आनी आखी बणावट अने आनी रीती ने फोम करीन तीनी अनसारे करे। 12 घोर नो नेम आहयो से के बड़ा नी चोट्ली नी च्यारो-मेर नो आखो वाटो आखा गेथो चोखलो से। देख, घोर नो नेम आहयोत से।
वेदी नी बणावट
13 "एवा हात ना माप सी जे आखा बीजा हात सी च्यार आंगळा जादा हय, वेदी नी माप आहयी रेय, मतलब तीनी नीव एक हात नो, अने तीनी चवड़ाय एक हात नी, अने तीनी च्यारो-मेर नी कोर पोर नी पटड़ी च्यार आंगळा नी। वेदी नी उचाय आहयी से:43:13 नीरगमन 27:1,2; 2 ईतीहास 4:1 14 धरती पोर मेकला नीव गेथी लगाड़ीन हेटला पाया तक बे हात नी रेय, अने तीनी चवड़ाय हातेक रेय; अने नान्ला पाया गेथी लगाड़ीन मोट्ला पाया तक च्यार हात रेय अने तीनी चवड़ाय हातेक रेवा जोवे; 15 अने उपरलो वाटो च्यार हात उचो रेय; अने वेदी पोर धपाड़वा ना जागा ना च्यार ह़ींगड़ा उपरली ह़ोड़ नीकळला रेय। 16 वेदी पोर धपाड़वा नो जागो च्यार-खुट्यो रेवा जोवे, अने बारे हात नाम्बु अने बारे हात चवड़ु रेय। 17 हेट्लो पायो चवदे हात नाम्बो अने चवदे हात चवड़ो रेय, अने तीनी च्यारो-मेर नी पटड़ी आदा हात नी रेय, अने नीव च्यारो-मेर हातेक रेय। तीनी पयड़ी तीनी उगवणी ह़ोड़ रेय।"
वेदी ने ह़ोपणु
18 अळतेण तीहयो मने केदो, "ए माणेह नी अवल्यात, भगवान यहोवा आसम केय, जे दाड़े होम बादा चड़ाव्वा अने लोय छाटवा करीन वेदी बणावे, तीहया दाड़े नी रीती-भाती आहयी ठेरे:43:18 नीरगमन 29:35-37 19 मतलब लेवी पुंजारा माणहु, जे सादोक नी अवल्यात से, अने मारी सेवा-चाकरी करवा करीन मारी ह़ाते रेय, तीमने तु पाप नी बादा जुगु एक वाछड़ु आपजे, भगवान यहोवा आसमेत केय। 20 ता तु तीनु लोय मे गेथु थोड़ुक लीन वेदी ना च्यारोव ह़ींगड़ा पोर अने कुड़ची ना च्यारो खुणा पोर अने च्यारो-मेर नी पटड़ी पोर लगाड़जे; आहयी भाते तीनी जुगु पछतावो करवा नी लारे तीने चोखी करजे। 21 ता पाप नी बादा नु वाछड़ु ने लीन, घोर ना चोखला जागा नी बाहर ठेरावला जागा मे धपाड़ देजे। 22 बीजा दाड़े एक वण-गुनाळ्ळो बोकड़ो पाप नी बादा करीन चड़ावजे, अने जेम वाछड़ु नी लारे वेदी ने चोखी करे, तेमेत आहया बोकड़ा नी लारे बी चोखी करे। 23 जत्यार तु तीने चोखी कर देय, ता एक वण-गुनाळ्ळु वाछड़ु, अने एक वण-गुनाळ्ळु गाडरु चड़ावजे। 24 तु तीमने यहोवा नी अगळ ली आवजे, अने पुंजारा माणहु तीमनी पोर खरलु-मीठु नाखीन तीमने यहोवा ने होम बादा करीन चड़ावे। 25 ह़ात दाड़ा तक तु दाड़ीक पाप नी बादा जुगु एक बोकड़ो तीयार करजे, अने वण-गुनाळ्ळु वाछड़ु अने गाडरा मे गेथु एक गाडरु बी तीयार करे। 26 ह़ात दाड़ा तक पुंजारा माणहु वेदी जुगु पछतावो करीन तीने चोखा करता रेय; आहयीत रीते तीनी रीती हये। 27 जत्यार तीहया दाड़ा पुरा हय जाय, ता आंठवा दाड़ान अळतेण गेथा पुंजारा माणहु तमारी होम बादा अने मेल-मीलाप नी बादा वेदी पोर चड़ाया करे; ता मे तमारी सी खुस हयही, भगवान यहोवा आसमेत केय।"