1 ता तीहयु मने केदु, "ए माणेह नी अवल्यात, जे तने जड़लु से तीने खाय ले; मतलब आहयी कीताप ने खा, ता जाय्न ईस्रायल ना माणहु ह़ाते वात कर।"
2 करीन में मोडु उगड़्यो अने तीहयु मने तीहयी कीताप खवाड़ नाख्यु। 3 ता तीहयु मने केदु, "ए माणेह नी अवल्यात, आहयी कीताप जे में तने आपु, तीने जरवी ले, अने तारु पेट आनी सी भर ले।" अने में तीने खाय लेदो; अने मारा मोडा मे तीहयी मोद ने तेम गळी लागी।
4 अळतेण तीहयु मने केदो, "ए माणेह नी अवल्यात, तु ईस्रायल ना माणहुन्तां जाय्न तीमने मारा बोल ह़मळाव। 5 काहाके तने कानी अंजाणली नीता काठी भासा वाळा राज्यन्तां नी मोकलतो, पण ईस्रायल नात घोराणान्तां मोकलु। 6 अंजाणली बोली नीता काठी भासा वाळा राज्यन्तां जे तारी वात ह़मज नी सके, तने नी मोकलतो। सणका कर्या वगर कदीम में तने एवा माणहुन्तां मोकलतो ता तीहया तारी ह़मळता। 7 पण ईस्रायल ना माणहु तारी ह़मळवा सी नीकारो करहे; तीहया मारी बी ह़मळवा सी नीकारो करे; काहाके आखा तीहया माणहु वण-लाज्या अने एकहेट्या मन ना से। 8 देख में तारा मुख ने तीमना मुख अगळ, अने तारु नींडाळु ने तीमनु नींडाळु अगळ, एकहेट्यु कर देम। 9 में तारु नींडाळु ने हीरान तेम वातड़ु कर देम जे पपलन्या दगड़ा सी बी वातड़ो रेय, एतरे तु तीमनी सी नी बीहजे, अने नी तीमनु मोडु देखीन तारु मन काचु हये; काहाके तीहया धोको देवा वाळा घोराणा ना से।"
10 अळतेण तीहयु मने केदु, "ए माणेह नी अवल्यात, जेतरा बोलु में तने केम, तीहया आखा मन मे राख अने कांटा वेर ह़मळ। 11 अने तीहया गुलामी मे वाळान्तां जाय्न, जे तारा राज्य वाळा अने भायु से, तीमनी ह़ाते वात करजे अने केजे, ‘मालीक यहोवा आसम केय’ भले तीहया ह़मळे, के नी ह़मळे।"
12 ता भगवान नी आत्मा मने उपर उठाड़ी, अने में मारी पसळ एक मोटात बोल नी घड़घड़ अवाज ह़मळ्यो, तीहयो केदो, "भगवान नी बड़ाय बरकत नी से।" 13 अने तीनी ह़ातेत तीहया जीवु नो पाखड़ा नो अवाज, जे एक बीजा ने लागता हता, अने तीमनी ह़ाते ना चाकटा नी अवाज अने ज्योरेत घड़घड़ अवाज ह़मळाय पड़ी। 14 ता आत्मा मने उठाड़ीन ली जी, अने में काठा दुख सी भरायलो, अने मन मे खीजवायतो जाय्न जत र्यो; अने यहोवा नी सक्ती मारी मे भरायली हती; 15 अने में तीहया गुलामी मे वाळान्तां आयो जे कबार नंदी नी काठे तेलाबीब ह़ेर मे रेता हता। अने तां में ह़ात दाड़ा तक तीमनी वच मे दुखी हय्न बह र्यो।
पेहरो देण्या ना रुप मे यहेजकेल ने टाळणु
(यहेजकेल 33:1-9)
16 ह़ात दाड़ा वीतवान अळतेण यहोवा नो आहयो बोल मारीन्तां पुग्यो, 17 "ए माणेह नी अवल्यात," में तने ईस्रायल ना घोराणा जुगु पेहरो देण्यो टाळलो से; तु मारा मोडा नी वात ह़मळीन, तीमने मारी भणी गेथो चेतावजे। 18 जत्यार में गलत काम करन्या ने केम, तु पक्को मरही, अने कदीम तु तीने नी चेतावे, अने नी गलत काम करन्या ने आसवी वात केय जीनी सी तीहयो चेत जाय अने तीनी गलत काम नी वाट छोड़ीन जीवत्लो रेय, ता तीहयो गलत काम करवा वाळो तीना अधरम मे फसलोत मरहे, पण में तीना खुन नो लेखो तारीत पांह लेही। 19 पण कदीम तु गलत काम करन्या ने चेतावे, अने तीहयो तीना गलत काम सी, अने गलत वाटे गेथो नी फीरे, ता तीहयो तीनात अधरम मे फसीन मर जहे; पण तु खुद ने बचाड़ही।
20 "अळतेण जत्यार धरमी माणहु तीना धरम सी फीरीन गलत काम करवा बाज जाय, अने में तीनी अगळ ठोकर मेकु, ता तीहयो मर जहे, काहाके तु जे तीने नी चेतायो, करीन तीहयो तीना पाप मे फसलो मरहे; अने जे धरम ना काम तीहयो कर्यो हय, तीहया काम नी फोम नी करे, पण तीना खुन नो लेखो में तारीत पांह लेही। 21 पण कदीम तु धरमी ने आहयु कीन चेतावे, के तीहयो पाप नी करे, अने तीहयो पाप सी बच जाय, ता तीहयो चेतावणी ने मानवा ना कारण सी पक्कोत जीवत्लो रेहे, अने तु खुद ने बचाड़ही।"
यहेजकेल बोल नी सक्यो
22 अळतेण यहोवा नी ताखत तां मारी पोर उजन्ती हयी, अने तीहयो मने केदो। "उठीन चोवगान मे जा; अने ता में तारी ह़ाते वात करही।"
23 ता में उठीन चोवगान मे ज्यो, अने तां ह़ु देख्यो, के यहोवा नो ह़ेक जेम मने कबार नंदीन काठे देखायलो, तेमेत आञे बी देखाव पड़्यो, अने में मोडा ना भरहे पड़ ज्यो। 24 ता आत्मा मारी मे ह़माय्न मने पोगु ना भरहे उबी कर देदी; अळतेण तीहयी मने केवा बाज जी, "जा तारा घोर मे मोय झापलु दीन बही रे। 25 ए माणेह नी अवल्यात, देख, तीहया माणहु तने दोड़ा वेर कहीन बांद रेहे, अने तु तीमनी वच मे नीकळीन जाय नी सके। 26 में तारी जीप ने तारु ताळु सी लगाड़ही; जीनी सी तु होगो रीन तीमने वडवा वाळो नी रेय, काहाके तीहया झगड़ो करवा वाळा घोराणा ना से। 27 पण जत्यार-जत्यार में तारी ह़ाते वात करही, ता-ता तारु मोडु ने उगड़ही, अने तु तीमने आसम केजे, ‘मालीक यहोवा आसम केय,’ जे ह़मळतु हय तीहयु ह़मळी लेय अने जे नी ह़मळतु तीहयु नी ह़मळे, तीहया झगड़ो करवा वाळा घोराणा ना सेत।"