हांडलु नो दाखलो
1 नव्वा साल ना दहवा मयना ना दहवा दाड़े, यहोवा नो आहयो बोल मारीन्तां पुग्यो: 2 "ए माणेह नी अवल्यात," आज नो दाड़ो लीखीन राख, काहाके आज नात दाड़े बेबीलोन नो राजा यरुसलेम ने घेरवी लेदलो से।24:2 2 राजा 25:1; यीरम्या 52:4 3 आहया बक-बक करवा वाळा घोराणा ने आहयो दाखलो के; मालीक यहोवा केय: हांडलु ने आक्ठु पोर मेक देवो; तीने मेकीन तीनी मे पाणी नाख देवो; 4 ता तीनी मे ह़ातळ्या, खांदा अने आखा वारला-वारला टुकड़ा एक्ठा करीन मेको; अने हांडलु मे वारला-वारला हाटका वेर भर देवो। 5 टोळा मे गेथा आखा सी वारु जानवरु ने लीन तीहया हाटका ने हांडलु नी तळे ढेर करो; अने तीमने वारु चड़ावो के तीनी मोय ना हाटका बी वारु चड़ जाय। 6 "करीन मालीक यहोवा आसम केय: गरा आय पड़े, तीहयु हत्यारु ह़ेर पोर! गरा आय पड़े तीहयु हांडलु पोर! जीनो जंग तीनी मे बणलो से अने छुट्यो नी; तीनी मे गेथो टुकड़ा-टुकड़ा करीन नीकाळ लेवो, तीनी जुगु चीट्ठी नी जरवत नी हय। 7 काहाके तीहया ह़ेर मे करली हत्या तीनी मे से; तीहयु तीने धरती पोर नाखीन कादा वेर नी ढाक्यु, पण उगाड़ला चाफर्या पोर मेक देदु। 8 करीन में बी तीनु लोय उगाड़ला चाफर्या पोर रेचवलो से के तीहयु ढकाय नी सके अळी के बदलो लेवा करीन रीह भड़के। 9 मालीक यहोवा आसम केय: गरा आय पड़े तीहयु हत्यारु ह़ेर पोर! में बी ढेर ने मोटो करही। 10 अने जादा लाकड़ा नाखीन, आक्ठु ने जादा करीन, मांह ने वारु चड़ावो अने मसालो भेसको, अने हाकटा बी धपाड़ देवो। 11 ता हांडलु ने ठारलु करीन ईंगाळा पोर मेक जीनी सी तीहयु उनु हये अने तीनु पीतळ धपे अने तीनी मे नो मोळ ओगळे, अने तीनो जंग खत्तम हय जाय। 12 में तीना कारण सी मेहनत करते-करते थाक ज्यो, पण तीनी भारी जंग तीनी सी छुटती नी, तीनी जंग आक्ठु नी लारे बी नी छुटती। 13 ए यरुसलेम ह़ेर तारु वीटळ्ळु मोट्ला पाप नु से. में ते तने चोखु करवा हींडतो हतो, पण तु चोखु नी हयु, करीन जत्यार तक में मारी रीह कम नी कर लेय, तांह तक तु चोखु नी हये। 14 में यहोवात आहयु केदलो से; अने तीहयु हय जहे; में आसमेत करही, में तने नी छोड़ु, अने नी तारी पोर दया करु, नी पसताम; तारी चाल-चलण अने कामु नीत अनसारे तारो नीयाव हयहे, मालीक यहोवा आसमेत केय।"
यहेजकेल नी लाडी नु मरनु
15 यहोवा नो आहयो बोल बी मारीन्तां पुग्यो: 16 "ए माणेह नी अवल्यात, देख, में तारा डोळा नी मोंगाळ्ळी चीज ने मारीन तारी पांह गेथी ली लेवा पोर से; पण तु नी रड़जे अने दुखी हयजे, अने नी आंहवा पाड़जे। 17 डहका ते ली लेय, पण तीहया ह़मळायवा नी जोवे; मरला जुगु बी दुखी नी हयहे। मुंडे पागड़ी बांदीन अने पोगे खाहड़ा पेरीन रेजे; अने नी ते आह़फा ना होट्या ने डाबजे नी दुखीन तेम रोट्लो खाजे।" 18 ता में ह़वारे माणहु ने केदो, अने ह़ांती मारी लाडी मर जी। ता ह़वारे में हुकम नी अनसारे कर्यो। 19 ता माणहु मने केवा बाज ज्या, "ह़ु तु आमने नी देखाड़े के आहयु जे तु करे, तीनु अमारी जुगु ह़ु मतलब से?"
20 में तीमने जपाप आप्यो, "यहोवा नो आहयो बोल मारीन्तां पुग्यो: 21 तु ईस्रायल ना घोराणा ने के, मालीक यहोवा आसम केय: देखो, में मारा चोखला जागा ने जीने कीलो बणवा सी तमु खुस हयो; अने जे तमारा डोळा ने गमण्यु से, अने जे तमारु मन ने गमे, तीने में वीटाळवा पोर से; अने मारात सोरा-सोरी ने तमु तीमने तां मेक आवला से, तीमने तलवार वेर मार नाखहे। 22 जेम में करलो से तेमेत तमु बी करहु; तमु बी तमारा होट्या नी ढाको, अने नी दुखीन तेम रोट्लो खावो। 23 तमु मुंडे पागड़ी बांदीन अने पोग मे खाहड़ा पेरीन रेहु, नी तमु रड़ो, नी छाती ठोको, पण आह़फाम ना अधरम ना काम मे फसला गळता जहु अने एक-बीजा भणीन कंजारता रेहु। 24 आहयी रीते यहेजकेल तमारी जुगु सेलाणी ठेरहे; जेम तीहयो कर्यो, तेमेत तमु बी करहु। जत्यार आहयु हय जाय, ता तमु जाण लेहु के में भगवान यहोवा से।"
25 "ए माणेह नी अवल्यात, ह़ु आहयु ह़ाचली नी हय, के जे दाड़े में तीमनो मजबुत कीलो, जे तीमनी ह़ोबा, अने तीमनी खुसी नो कारण से, अने तीमना सोरा-सोरी जे तीमनी ह़ोबा, तीमना डोळा नो आनन्द, अने मन ने गमण्या से, तीमने मे हापकी लेही, 26 तीहयात दाड़े जे नाहीन बच जहे, तीहयु तारीन्तां आवीन तने खबर ह़मळावहे। 27 तीहयात दाड़े तारु मोडु उगड़ी जहे, अने तु होगो नी रेय पण तु तीहया बचला माणेह ह़ाते वात करही। आहयी रीते तु आहया माणहु जुगु सेलाणी ठेरही; अने आहया जाण लेहे के में यहोवा से।"