एदोम ने भगवान डंड आपे
1 यहोवा नो आहयो बोल मारीन्तां पुग्यो। 2 "ए माणेह नी अवल्यात," आह़फा नु मोडु "सेईर बड़ा भणीन करीन तीना वीरोद मे भगवान वगे गेथी वात के। 3 अने तीने के, भगवान यहोवा आसम केय
"ए सेईर बड़ा, में तारा वीरोद मे से;
अने मारो हात तारा वीरोद मे बड़ावीन तने उजाड़ेत उजाड़ कर देही!
4 में तारा ह़ेरु ने उजाड़ कर देही
अने तु उजाड़ हय जही;
ता तु जाण लेही के में यहोवा से।"
5 "काहाके तु ईस्रायलीम नी ह़ाते जलमकी दुस्मनी राखतो हतो, अने तीमनी गरा नी टेमे जत्यार तीमना अधरम ना डंड नी टेम आयी, ता तीमने तलवार वेर मारवा करीन आप देदो। 6 करीन भगवान यहोवा आसम केय: मारी जीवाय नी ह़ाम, में तने हत्या करवा करीन तीयार करही अने लोय तारी पसळ पड़हे; तु ते लोय सी ह़ीगी नी करतो हतो, आहया कारण सी लोय तारी पसळ पड़हे। 7 आहयी रीते में सेईर बड़ा ने उजाड़ेत उजाड़ कर देही, अने जे तीनी में आवतु-जतु हय, में तीने खत्तम करही। 8 में तीना बड़ा ने मारला सी भर देही; तारा टेकड़ा, घाट्या, अने आखा कोतड़ा मे तलवार वेर मरला पड़हे। 9 में तने जलमकु उजाड़ कर देही, अने तारा ह़ेर पासा नी वहे। ता तमु जाण लेहु के में यहोवा से।
10 "काहाके तु केदलो से, आहया बेम राज्य अने आहया बेम देस मारा रेहे; अने आमुत तीना मालीक बण जहु, पण यहोवा तां हतो। 11 आहया कारण सी, भगवान यहोवा आसम केय, मारी जीवाय नी ह़ाम, तारी रीह नी अनसारे, अने जे खीज तु तीमनी पोर तारी दुस्मनी का कारण सी करलो से, तीनीत अनसारे में तारी ह़ाते वेहवार करही, अने जत्यार में तारो नीयाव करही, ता में तमारी मे खुद ने उजन्तो करही। 12 तु जाणही के में यहोवा तारी आखी नीकारा नी वात ह़मळलो से, जे तु ईस्रायल ना बड़ा ना बारा मे केदलो, ‘तीहया ते उजड़ ज्या, तीहया आमनेत आपला से के आमु तीमने खाय जीया।’ 13 तु मारा वीरोद मे आह़फा नु मोडु सी मोटी-मोटी वात कर्यो, अने मारा वीरोद मे घणी वात केदलो से, आने में ह़मळलो से।"
14 भगवान यहोवा आसम केय, "जत्यार आखी धरती पोर खुसी रेहे, ता में तने उजाड़ करही। 15 तु ईस्रायल ना खुद ना वाटा ने उजड़ जवा ना कारण सी खुस हयो, करीन में बी तारी ह़ाते तेमेत करही; ए सेईर बड़ा, ए एदोम ना आखु देस, तु उजड़ जही। ता तीहया जाण लेहे के में यहोवा से।"