मीस्र देस ना राजा ना वीरोद मे भगवान वगे गेथी वात
1 दहवा साल ना दहवा मयना ना बारवा दाड़े यहोवा नो आहयो बोल मारीन्तां पुग्यो: 2 "ए माणेह नी अवल्यात," तारु मोडु मीस्र ना राजा फीरोन भणीन करीन तीनी अने आखा मीस्र ना वीरोद मे भगवान वगे गेथी वात के; 3 आहयु के, भगवान यहोवा आसम केय: ए मीस्र ना राजा फीरोन, में तारा वीरोद मे से, से मोटु पण, तु जे तारी नंदीम नी वच मे पड़ रेय, जे केदलो से, मारी नंदी मारी खुद नी से, अने मेंत तीने मारी जुगु बणावलो से। 4 में तारा जबाड़ा मे हेकड़ा घालही, अने तारा नंद्या ना माछला ने तारी खाल मे चीपकाड़ही, अने तारी खाल मे चीपकला तारा नंद्या ना आखा माछला भेळ तने तारा नंद्या मे गेथो नीकाळही। 5 ता में तने तारा नंद्या ना आखा माछला भेळ जंगल मे नीकाळही, अने तु मेदान मे पड़ रेही; कानी बी भाते तारी ह़ला नी लेय। में तने जंगल ना जानवर अने वादळा मे ना चड़ा नु खाणु बणाय देदलो से। 6 ता मीस्र ना आखा रेवा वाळा जाण लेहे के में यहोवा से। तीहयो ते ईस्रायल ना घोराणा जुगु मानो कमजोर लाकड़ी ठेरलो।29:6 यसाया 36:6 7 जत्यार तीहया तारी पोर हात नी ताखत लगाड़्या ता तु टुट ज्यो अने तीमना खबा उपकी ज्या, अने जत्यार तीहया तने टेको लगाड़्या, ता तु टुट ज्यो, अने तीमना केड़्ये ना आखा नेहटा हपकाय ज्या। 8 आहया कारण सी मालीक यहोवा आसम केय: देख, में तारी पोर तलवार चलाड़ीन, तारा माणहु अने जानवरु, आखा ने खत्तम करही। 9 ता आखु मीस्र देस उजाड़ेत उजाड़ हय जहे; अने तीहया जाण लेहे के में यहोवा से। "तु केदलो से, ‘मारी नील नंदी मारी खुद नीत से, अने मेंत तीने बणावलो से।’ 10 आहया कारण सी देख, में तारी अने तारा नंद्या ना वीरोद मे से अने मीस्र देस ने मीगदोल ह़ेर गेथु लगाड़ीन सवेने ह़ेर तक मतलब कुस देस नी काकड़ तक उजाड़ेत उजाड़ कर देही। 11 चाळीह साल तक तीनी मे माणेह नीता जानवरु नो पोग तक नी पड़े; अने नी तीनी मे कोय वहे। 12 चाळीह साल तक में मीस्र देस ने उजड़ला देसु नी वच मे उजाड़ीन राखही; अने तीना ह़ेर उजड़ला ह़ेरु नी वच मे उजड़लात रेहे। में मीस्री मे रेवा वाळा ने राज्य-राज्य मे खोळवी देही, अने देस-देस मे रीवण्या-तीवण्या कर देही।"
13 "भगवान यहोवा आसम केय: चाळीह साल वीतवान अळतेण में मीस्री माणहु ने तीहयी जातीम नी वच मे गेथा एक्ठा करही, जीमनी मे तीहया रीवण्या-तीवण्या हय जेला; 14 अने में मीस्री माणहु ने गुलामी मे गेथा छोड़ावीन पत्रोस देस मे, जां तीहया पयदा हयला से, पासो पुगाड़ही; अने तां तीमनु नान्लु राज्य हय जहे। 15 तीहयु आखा राज्य मे नानु रेहे, अने बीजा राज्य नी अगळ आह़फा नु मुंडु उचु नी कर सके; काहाके में मीस्री माणहु ने आसम कम करही के तीहया राज्य-राज्य पोर अळतेण कारु बी राज नी कर सके। 16 तीहया अळतेण ईस्रायल ना घोराणा ना भरहा नो कारण नी बणे, काहाके जत्यार तीहया तीमनी भणीन फीरीन तीमने देखहे, ता तीहया तीमना अधरम ने फोम करहे, ता तीहया जाण लेहे के में भगवान यहोवा से।"
राजो नबुकदनेस्सर मीस्र देस ने हरावहे
17 अळतेण सत्तावीसवा साल ना पेल्ला मयना ना पेल्ला दाड़े यहोवा नो आहयो बोल मारीन्तां पुग्यो: 18 "ए माणेह नी अवल्यात," बेबीलोन नो राजो नबुकदनेस्सर सोर ह़ेर ने घेरव्वा मे आह़फा नी सेना ने घणी मेहनत करायो; एक-एक नु मुंडु टकलु हय ज्यु, अने एक-एक जणा ना खबा नी चामड़ी छोलाय जी; ते बी तीमने सोर ह़ेर मे गेथी नी ते आहयु काठु काम नी कंय दाड़की जड़ी अने नी तीनी सेना ने। 19 आहया कारण सी भगवान यहोवा आसम केय: देख, में बेबीलोन ना राजा नबुकदनेस्सर ने मीस्र देस आपही, अने तीहयो तीनी भीड़ ने ली जहे, अने तीनु धन-दवल्यत ने लुटीन कब्जा मे कर लेहे; अने आहयीत दाड़की तीनी सेना ने जड़हे। 20 में तीनी मेहनत ना बदला मे तीने मीस्र देस आनीन करते आप्यो के तीहया माणहु मारी जुगु काम करला हता, भगवान यहोवा आसमेत केय। 21 "तीहयीत टेमे में ईस्रायल नु घोराणु मे एक ह़ींगड़ु उगाड़ही, अने तीमनी वच मे तारु मोडु उगाड़ देही। ता तीहया जाण लेहे के में यहोवा से।"