नीयाव नी तलवार
1 यहोवा नो आहयो बोल मारीन्तां पुग्यो: 2 "ए माणेह नी अवल्यात," तारु मोडु यरुसलेम भणीन कर अने चोखला जागाम नी भणीन बोल ह़मळाव, ईस्रायल देस ना बारा मे भगवान वगे गेथी वात कर अने तीने के, 3 मालीक यहोवा आसम केय: देख, में तारा वीरोद मे से, अने मारी तलवार ने मीयान मे गेथी नीकाळीन तारी मे गेथा धरमी अने अधरमी बेम ने खत्तम करही। 4 आनीन करते के में तारी मे गेथा धरमी अने अधरमी आखा ने खत्तम करवा वाळो से, करीन मारी तलवार मीयान मे गेथी नीकाळीन दखणाव गेथी धुराव तक आखा जीवु ना वीरोद मे चलाड़ही; 5 ता आखा जीव जाण लेहे के यहोवा मीयान मे गेथी आह़फा नी तलवार नीकाळलो से; अने तीने मीयान मे अळतेण नी मेके।
6 "करीन ए माणेह नी अवल्यात, तु कंजार, घणो दुखी हय, अने भागलु केड़्या लीन माणहु अगळ कंजार। 7 जत्यार तीहया तने पुछे, ‘तु ह़ुका कंजारे?’ ता केजे, खबर ना कारण। काहाके एवी वात आव्वा वाळी से के आखा ना मन काप उठहे, अने आखा ना हात ढीला पड़ जहे, आखा नी आत्मा मजबुर अने आखा ना घोटणा कमजोर हय जहे। देखो, आवीत वात आव्वा वाळी से, अने तीहयी पक्की पुरी हयहे," भगवान यहोवा आसमेत केय।
8 अळतेण यहोवा नो आहयो बोल मारीन्तां पुग्यो, 9 ए माणेह नी अवल्यात, भगवान वगे गेथी वात करीन के, भगवान यहोवा आसम केय:
देख, पंजावली तलवार, अने चमकावली तलवार!
10 तीने आनीन करते पंजायी के तीनी वेर मारी सके,
अने आनीन करते चमकाड़्या के तीहयी वीजळीन तेम चमके!
ता ह़ु आमु खुसी मनावया?
तीहयी ते यहोवा ना सोरा नो राज डंड से अने आखा झाड़ु ने हेटा जाणवा वाळो से।
11 तीहयी चमकाड़वा आनीन करते
आपली के हात मे लेय,
तीने आनीन करते पंजायी अने चमकाड़ी के
खत्तम करवा वाळा ना हात मे आपे।
12 ए माणेह नी अवल्यात आड़,
अने छाती ठोकीन रड़, अने दुख मनाव!
काहाके तीहयी मारात माणहु ना वीरोद मे चालवा हींडे,
तीहयी ईस्रायल ना आखा मुख्या ना वीरोद मे चालवा हींडे;
मारा माणहु नी ह़ाते तीहया बी तलवार ना अदीकार मे आय लागला से।
करीन तु तारी छाती ठोकीन रड़।
13 काहाके ह़ाचलीन तीनी जाच हयली से,
अने कदीम तीने हेटो जाणवा वाळो राज डंड बी नी रेय,
ता ह़ु? भगवान यहोवा आसमेत केय।
14 "करीन ए माणेह नी अवल्यात, भगवान वगे गेथी वात कर, ने थापड़्या ठोक, अने तीन काव तलवार नो जोर डबल करे; तीहयी ते मारवा वाळी तलवार मतलब मोट्ला सी मोट्ला ने मारवा नी तलवार से, जीनी सी मोहट्या मे बी ह़ताय्न कोय बची नी सके। 15 में तीमने मारवा वाळी तलवार ने तीमना आखा झापला ना वीरोद मे आनीन करते चलाड़लो से, के माणहु नु मन बीक ना कारण सी काप टुटे, अने तीहया घणा ठोकर खाय। गरा आय पड़े! गरा आय पड़े! तीहयी ते वीजळीन तेवी बणावली से, अने मारवा करीन पंजावली से। 16 जमणी अने डाखरी ह़ोड़ तोड़, ए पंजावली तलवार! जंय वळे तंय तोड़। 17 में बी थापड़्या बगाड़ही अने मारी रीह ने टाडी करही, मे यहोवा आसम केदलो से।"
बेलीलोन ना राजा नी तलवार
18 अळतेण यहोवा नो आहयो बोल मारीन्तां पुग्यो: 19 "ए माणेह नी अवल्यात," बे वाट ठेराय ले के "बेबीलोन ना राजा नी तलवार आवे; बेम वाट एकीत देस मे गेथी नीकळे। अळतेण एक सेलाणी बणाव, मतलब ह़ेर नी वाट जां गेथी सुरु हयहे तां एक सेलाणी बणाव। 20 एक वाट बणाव के तलवार अम्मोनीम ना रब्बा ह़ेर पोर, अने यहुदा देस ना कीला वाळा ह़ेर यरुसलेम पोर बी चाले। 21 काहाके बेबीलोन नो राजो चोवरायो मतलब बेम वाट ना नीकळवा ना जागा पोर अगी हयवा वाळी वात जाणवा करीन उबो हय र्यो, तीहयो बीलखा ने हीलाय देदो, अने घोर ना देवताम नी पांह जपाप कर्यो, अने काळजु ने बी देख्यो। 22 तीना जमणा हात मे ‘यरुसलेम’ नु नाम से के तीनी भणीन झुमायवा नु ह़मान ने लगाड़े, अने गळु फाड़ीन मारवा नो हुकम आपे अने उचा बोल सी कुर्राटे, झापला भणीन झुमायवा नु ह़मान ने लगाड़े अने हालर बांदे अने कोट बणावे। 23 पण यरुसलेम ना रेवा वाळा ने आहयो सुक झुटो मालम पड़ र्यो। तीहया जे ह़ाम खादला से; करीन तीहयो तीमना अधरम नी फोम करावीन तीमने धर लेहे। 24 करीन मालीक यहोवा आसम केय: आनीन करते के तमारो अधरम जे फोम करलो से, अने तमारा गुना जे उजन्तां हय जेला से, काहाके तमारा कामु मे पापेत पाप देखाव पड़लो से, अने तमने आहयु आखु नी फोम आय जेली से, करीन तमु आमनीत सी धराय जहु।
25 "ए ईस्रायल वीटळ्ळा मुख्या, तारो दाड़ो आय जेलो से; अधरम नी खत्तम हयवा नी टेम आय लागली से। 26 तारा बारा मे भगवान यहोवा आसम केय: पागड़ी उतार, अने मुकुट बी उतार दे; तीहयो जेवो से तेवो नी रेय; जे नीचो से तीने उचो कर अने जे उचो से तीने नीचो कर। 27 में तीमने उथलाय देही अने उथलाय्न गबड़ाय देही; होव उथलाय देही अने जत्यार तक तीनो अदीकारी नी आवे तांह तक तीहयु उथलावलु रेहे; अने मालीक आवहे ता में तीने आप देही।
अम्मोनीम ना वीरोद मे तलवार
28 "अळतेण ए माणेह नी अवल्यात, भगवान वगे गेथी वात कीन के, के मालीक यहोवा अम्मोनी अने तीमना काडला वाक ना बारा मे आसम केय; तु आसम के: नीकाळली तलवार से, तीहयी तलवार मारवा करीन चमकाड़ली से के मारे अने वीजळीन तेम रेय।
29 जत्यार तक के तीहया तारा बारा मे झुटा दरसन देखे, अने झुटा दरसन देखवा वाळा तने देखाड़े के तु वीटळ्ळा घाव लागला ना बोचा पोर पड़े जीमनो दाड़ो आय जेलो से, अने जीमना अधरम नी खत्तम हयवा नी टेम आय लागली से।
30 "‘तीने मीयान मे पासी मेक। जे जागा मे तने बणायी अने जे देस मे तु पयदा हयी, तीनीत मे, में तारो नीयाव करही। 31 में तारी पोर मारी रीह नीकाळही अने तारी पोर मारु खुद नु आक्ठु फुक देही; अने तने जानवर ने तेम माणहु ना हात मे कर देही जे मारवा वाळा वारु ह़ीकला से। 32 तु आक्ठु नी कोर बणही; तारु लोय देस मे वयाड़हे, अने तने कोय फोम बी नी करे’" काहाके में यहोवात आसम केदलो से।