1 "अळी ए माणेह नी अवल्‌यात, तु ईस्‌रायल ना बड़ा ने भगवान वगे गेथी वात कीन के, ए ईस्‌रायलु ना बड़ा, यहोवा नो बोल ह़मळो, 2 भगवान यहोवा आसम केय, दुस्‌मन ते तमारा बारा मे केदला से, ओहोय! पेल्‌ना वारा ना उचला जागा हाव अमारा अदीकार मे आय जेला से!

3 "आहया कारण सी भगवान वगे गेथी वात कीन के, भगवान यहोवा आसम केय: माणहु जे तमने उजाड़्या अने च्‌यारो-मेर गेथा जे तमने आसम गळ ज्‌या के तमु बचलु राज्‌य ना अदीकार मे हय जावो, अने लुटवा वाळा तमारी वात करे अने बीजा माणहु तमारो वाक काडे, 4 आहया कारण सी, ए ईस्‌रायल ना बड़ा, भगवान यहोवा नो बोल ह़मळो, भगवान यहोवा तमने आसम केय: मतलब बड़ा अने बड़्‌या ने, अने कोतड़ा अने घाट्‌या ने, अने उजड़ला जागा ने अने ह़ुनह़ान ह़ेरु ने जे च्‌यारो-मेर नु बचलु राज्‌य सी लुटाय ज्‌या अने तीमना हाह़वा नो कारण बण जेला से।

5 "भगवान यहोवा आसम केय: पक्‌को में मारी घण-जबर रीह मे बचला राज्‌य ना अने आखा एदोम ना वीरोद मे केदलो से के जे मारा देस ने आह़फाम ना मन ना पुरा आनन्‌द अने घमंड सी आह़फाम ना अदीकार मे करला से के तीहया पारका हय्‌न लुटाय जाय।

6 "आहया कारण सी ईस्‌रायल ना देस ना बारा मे भगवान वगे गेथी वात कीन बड़ा, बड़्‌या, कोतड़ा अने घाट्‌या ने के, भगवान यहोवा आसम केय: देखो, राज्‌य तमारो वाक काड्‌यु तीने तमु वेठला से, करीन में घण-जबर खीजवाय्‌न केदलो से। 7 भगवान यहोवा आसम केय: में आहयु ह़ाम खादलो से के सण्‌का कर्‌या वगर तमारी च्‌यारो-मेर जे आखु राज्‌य से, तीमने आह़फाम नो वाक खुदेत वेठवा पड़हे। 8 पण ए ईस्‌रायल ना बड़ा, तमारी पोर नवला-नवला डाळ्‌या फुटहे अने तीमना फोळ मारा माणहु ईस्‌रायल जुगु फालहे; काहाके तीमनु पासु आवणु ह़ाते से। 9 देखो, में तमारी ह़ोड़ से, अने तमारी भणीन दया नी नींगा नाखही, अने तमु खेती-वाड़ी करहु। 10 अने में तमारी पोर घणा माणहु ने मतलब ईस्‌रायल ना आखा घोराणा ने वहाड़ही; अने ह़ेर ने अळी वहाड़हे अने उजाड़ी जागा ने अळी बणावहे। 11 में तमारी पोर माणहु अने जानवरु बेम जणा ने घणो बड़ावही, अने तीहया बड़हे अने फुलहे-फालहे, अने में तमने पेल्‌ना वारामनान तेम वहाड़ही, अने पेले गेथो जादा तमारी भलाय करही। ता तमु जाण लेहु के में यहोवा से। 12 में आसम करही के माणहु मतलब मारा माणहु ईस्‌रायल तमारी पोर चालहे-फीरहे, अने तीहया तारा मालीक बणहे, अने तमु तीमनो वाटो रेहु, अने तीहया अळी तमारा कारण अवल्‌यात वगर ना नी रेय।

13 "भगवान यहोवा आसम केय, जे माणहु तमु ने कीया करे, तु माणहु ने खावा वाळु से, अने तारी पोर वहला राज्‌य ने अवल्‌यात वगर नो कर देय। 14 करीन हाव तु माणहु ने नी खाय, अने नी आह़फु पोर वहला राज्‌य ने वण अवल्‌यात नो करे, भगवान यहोवा आसमेत केय। 15 में अळतेण राज्‌य-राज्‌य ना माणहु सी तारो वाक नी ह़मळावु, अने तने राज्‌य-राज्‌य भणी गेथु अळी नामबद्‌दी नी वेठवा पड़े, अने तारी पोर वहलु राज्‌य ने तु ठोकर नी खवाड़े, भगवान यहोवा आसमेत केय।"

16 अळतेण यहोवा नो आहयो बोल मारीन्‌तां पुग्‌यो, 17 "ए माणेह नी अवल्‌यात," "जत्‌यार ईस्‌रायल नु घोराणु आह़फाम ना देस मे रेतु हतु, ता आह़फाम नी चाल-चलण अने कामु नी लारे तीहया तीने वीटाळ देता हता; तीमनी चाल-चलण मने मयनो आवली बयर नु वीटळ्‌ळुन तेवी मालम पड़ती हती। 18 करीन जे हत्‌या तीहया देस मे कर्‌या, अने देस ने मुरत्‌या नी लारे वीटाळ देदा, आहया कारण सी तीमनी पोर में मारी रीह नीकाळलो हतो। 19 में तीमने राज्‌य-राज्‌य मे रीवण्‌या-तीवण्‌या कर्‌यो, अने तीहया देस-देस मे खोळवाय ज्‌या; तीमनी चाल-चलण अने कामु नी अनसारे में तीमने डंड आप्‌यो। 20 पण जत्‌यार तीहया ते राज्‌य मे पुग्‌या, जीमनी मे तीमनी मे पुगाड़्‌या, ता तीहया मारा चोखला नाम ने वीटळ्‌ळु ठेराया, काहाके माणहु तीमना बारा मे आहयु केवा बाज ज्‌या, ‘आहया यहोवा ना माणहु से, पण तीना देस मे गेथा नीकाळ देदला से।’ 21 पण में मारा चोखला नाम नी फोम कर्‌यो, जे ईस्‌रायल ना घोराणा तीहया राज्‌य नी वच मे वीटळ्‌ळु ठेरावला हता, जां तीहया जेला हता।

22 "आहया कारण सी तु ईस्‌रायल ना घोराणा ने के, भगवान यहोवा आसम केय ए ईस्‌रायल ना घोराणा, में आहयु काम तमारा कारण सी नी, पण मारा चोखला नाम नी जुगु करु जीने तमु तीहया राज्‌य मे वीटळ्‌ळु ठेराया जां तमु जेला हता। 23 में मारु मोटु नाम ने चोखलु ठेरावही, जे राज्‌य मे वीटळ्‌ळु ठेरावला से, जीने तमु तीमनी वच मे वीटाळला; अने जत्‌यार में तीमनी नींगा मे तमारी वच मे चोखलो ठेरही, ता तीहया राज्‌य जाण लेहे के में यहोवा से, भगवान यहोवा आसमेत केय। 24 में तमु ने राज्‌य मे गेथा नीकाळ लेही, अने आखा देसु मे गेथा एक्‌ठा करही; अने तमु ने तमारा आह़फाम ना देस मे पुगाड़ देही। 25 में तमारी पोर चोखलु पाणी छाटही, अने तमु चोखा हय जहु; अने में तमने तमारी आखी वीटळ अने मुरत्‌या सी चोखो करही। 26 में तमने नवलु मन आपही, अने तमारी मोय नवली आत्‌मा पयदा करही, अने तमारा डील मे गेथु दगड़ा नु दील नीकाळीन तमने मांह नु दील आपही।✝ 27 में मारी आत्‌मा तमारी मे आपीन आसम करही के तमु मारी रीती पोर चालहु अने मारा नेमु ने मानीन तीमनी अनसारे करहु। 28 तमु तीहया देस मे वहहु जे में तमारा बाहु ने आपलो हतो; अने तमु मारा माणहु ठेरहु, अने में तमारो भगवान ठेरही। 29 में तमने तमारी आखी वीटळ सी छोड़ावही, अने अन उगवा नो हुकम आपही, तीने बड़ावही अने तमारी वच मे काळ नी पड़वा देम। 30 में झाड़ु ना फोळ अने खेतर नी मेर बड़ावही, के राज्‌य मे काळ ना कारण सी अळी तमारु नामबद्‌दी नी हये। 31 ता तमु आह़फाम नी बुरी चाल-चलण अने आह़फाम ना कामु ने जे वारला नी हता, फोम करीन आह़फाम ना अधरम अने गलत कामु ना कारण सी आह़फाम नी सी ह़ीगी करहु। 32 भगवान यहोवा आसमेत केय, तमु जाण लेहु के में आने तमारी जुगु नी करतो। ए ईस्‌रायल ना घोराणा आह़फा नी चाल-चलण ना बारा मे लाजे पड़ो अने तमारो मुख काळो हय जाय।"

33 भगवान यहोवा आसम केय, "जत्‌यार में तमने तमारा आखा अधरम ना कामु सी चोखा करही, ता तमारा ह़ेरु ने वहाड़ही; अने तमारा उजाड़ी जागा ने पासा बणावहे। 34 तमारु देस जे आखा आव्‌वा-जवा वाळा नी अगळ उजाड़ से, तीहयु उजाड़ हयवा ना बदले जोपहे-वेरहे। 35 माणहु कीया करहे, आहयु देस जे उजाड़ हतु, तीहयु अदन बगीचान तेवु हय ज्‌यु, अने जे ह़ेरु ह़ुनह़ान अने उजाड़ हय जेला अने ओदर जेला हता, तीहया कीला वाळा बण्‌या, अने वहाड़ला से। 36 ता जे राज्‌य तमारी आड़े-धेड़े बचला रेहे, तीहयी जाण लेहे के में यहोवा ओदारलु ने अळी बणायो, अने उजाड़ मे झाड़का रोपला से, में यहोवा आहयु केदो, अने आसमेत करही।"

37 भगवान यहोवा आसम केय, "ईस्‌रायल ना घोराणा मे अळी मारी पांह वीन्‌ती करहे के में तीमनी जुगु आहयु करु; मतलब में तीमनी मे माणहु नी गीनती गाडरा-बोकड़ान तेम बड़ावु। 38 जेम चोखली टेम ना गाडरा-बोकड़ा, मतलब टाकला तीवार नी टेम पोर यरुसलेम मे ना गाडरा-बोकड़ा गीणाय नी एतरा रेय तेमेत जे ह़ेर हाव उजाड़ से तीहया गीणाय नी एतरा माणहु ना टोळा सी भराय जहे। ता तीहया जाण लेहे के में यहोवा से।"