Ишая 12

Құтқарылғандардың Жаратқан Иені мадақтау жыры

1 Сол кезде мынадай ән-жыр айтатын боласың:

«Уа, Жаратқан Ием, Сені мадақтаймын!

Маған ашуланған едің, ал сосын

Қаһарыңды басып, мені жұбаттың.

2 Сөз жоқ, тек Құдай менің Құтқарушым!

Оған сеніп, қорықпаймын да енді,

Жаратқан Ие — күш-қуатымның көзі,

Айтатын жырым Тәңір Ием жайлы,

Ол адал Құтқарушым болып келеді!»

3 Құтқарылудың қайнар көздерінен

Су ала бересіңдер қуанышпен.*12:3 Яки: Шөлдегенге таза судың ләззәт әкелетініндей, сендер Құдайдың өздеріңді құтқарып, қолдап-қорғап жүргеніне керемет шаттанасыңдар (12:2; Жыр 50:14).

4 Сол кезде былай дейтін боласыңдар:

«Жаратқан Иеге шүкірлік етіп,

Есімін атап Оған сиыныңдар,

Әділ істерін ұлттарға білдіріп,

Есімінің ұлылығын хабарлаңдар!

5 Жаратқан Иеге арнап ән шырқаңдар,

Ол ұлы кереметтерді істеді,

Осыны білсін жер жүзінің бәрі!

6 Уа, Сионның халқы, масаттаныңдар,

Дауыстап қалықтата ән салыңдар:

Исраил сиынған Киелі Құдай

Енді өздеріңнің араларыңда

Бөленеді салтанатты ұлылыққа!»*12:6 Яки: Исраил сиынған Киелі Құдай шексіз ұлы! Оның жер бетіндегі тұрағы (киелі үйі) сендердің араларыңда.