Juízes 3

O sudija o Ehud

12 E Izraelcurja palem počnisardine te ćeren okova so si bilačhe ande GOSPODEŠĆE jakha. Askal o GOSPOD zurjarda e Eglone, e moavsko caro, protiv e Izraelcurja, zato kaj ćerenas okova so si bilačhe ande GOSPODEŠĆE jakha. 13 O Eglon udružisarda piri snaga e Amonconenca thaj e Amalečanenca, pa avilo, pobedisardas e Izraelcen thaj osvojisarda o Jerihon. 14 E Izraelcurja gajda dešuohto brš služinas e moavske carošće e Eglonošće.

15 Ali kana e Izraelcurja zavapisardine e GOSPODEŠĆE, vo vazdas lenđe spasitelje savo akhardolas Ehud. Vo sas čhavo e Geraresko andar e Venijaminesko pleme. O Ehud sas levako. E Izraelcurja bičaldine les te inđarel o porez e moavske carošće e Eglonošće. 16 O Ehud čerda cikno mačo duj oštricenca, čhuta les pešće pe desno butina tale drze, 17 pa inđarda o porez e Eglonošće, savo sas but thulo manuš. 18 Kana predajisardas o porez, o Ehud mukla e manušen save inđarenas o porez te džantar. 19 Thaj ke barune idolurja save sas paše ko Gilgal bolda pe thaj đelo palpale ko caro Eglon.

Phendas lešće: "Si man pale tute jek tajno poruka, carona."

O caro phendas: "Tišina!" Thaj savora save sas leste ande soba inkljistine avri.

20 O caro bešelas korkoro opre andre šudri soba ande piri palata. O Ehud avilo paše ko caro thaj phendas lešće: "Si man poruka pale tute katar o Del."

Dok o Ehud uštelas katar o prestolje, 21 o Ehud teljarda e levo vastesa thaj lija o mačo katar piri e desno butina thaj pusada les ando ođi. 22 Čak vi e drška katar mačo dijas lešće ando ođi zajedno e oštricasa. A sar o Ehud či crdas avri o mačo andar e Eglonesko ođi, lesko salo učharda mačo. Andar o caro inkljisto lesko melalipe. 23 Askal o Ehud inkljisto po tremo thaj pala peste phandada o vudar katar e opruni soba pe ćija.

24 Kana vo đelotar, avile e Eglonošće sluge thaj dikhline kaj si o vudar katar e opruni soba phandado pe ćija, pa phendine: "Sigurno đelo te loćarel pe avri."

25 Ažućardine but vrjama, ali sar o Eglon či putrelas o vudar, rodine e ćija te putren o vudar. Kana putardine, dikhline pire gospodares sar pašljol tele mulo. 26 A dok von ažućarenas, o Ehud našlo pale godoja vrjama. Nakhlas paše barune idolurja thaj našlo ando Seir. 27 Kana areslo ando Seir, phurdas ande truba savi ašundili pe saste Efremešće gore. Sa e Izraelcurja fuljistine tele katar e gore, a o Ehud džalas po čikat angla lende.

28 O Ehud phendas lenđe: "Teljaren pale mande, kaj o GOSPOD dija e Moavcen, tumare dušmajen, ande tumare vas."

Von teljaridine pala leste thaj zauzmisardine e thana kaj si o paj plitko te šaj naćhel pe e reka Jordan. karig o Moav. Khonikas či mućenas te naćhel pe okoja rig. 29 Ande godoja vrjama mudardine varekaj katar deš milje Moavcen, sa zurale thaj hrabre manušen. Ni jek či našlo lenđe. 30 Godova đes o Izrael zavladisardas pe Moavcurja, thaj ande phuv posle godova sas miro ohtovardeš brš.