अब्राम की बुलाहट
1 प्रभु अब्राम से कही, "अपने देस, रिस्तेदार, और अपने दऊवा को घरबार छोड़कै बौ देस की जमीन मैं चले जा, जो मैं दिखांगो। 2 मैं तोसे एक बड़ो रास्ट्र बनांगो, मैं तोकै आसीस दुंगो, और तेरे नाओं कै महान बनांगो कि तू इंसानियत जाति के ताहीं आसीस को जरिया बे।
3 और जो तोकै आसीस देंगे, उनकै मैं आसीस दुंगो,
और जो तोकै स्राप देंगे मैं उन्हैं स्राप दुंगो।
और तेरे जरिया सब पृथ्वी के लोग आसीस पामंगे।"
4 जब अब्राम पचहत्तर साल को भौ, तौ प्रभु के कहने मैं बौ हारान देस कै चल पड़ो; और संग मैं लूत भी बाके संग चल पड़ो। 5 अब्राहम अपनी बईय्यर सारा, और भतीजो लूत, और जो बे धन कमाई रहैं इकट्ठो करकै, और अपने सबै नौकर कै लैकै बे हारान देस के घाँईं चल पड़े। जब बे कनान देस मैं पहोंचे, 6 तौ अब्राम पूरे देस मैं फिरत रहो और जितै ममरे को पवित्र पेंड़ रहै, बौ हूँनै पहोंचो, जो सेकेम नाओं की पवित्र जघा रहै। बौ समय कनानी लोग बौ जघा मैं रहत रहैं। 7 प्रभु अब्राहम कै दर्सन दैकै कहथै, "जौ बौ देस है जो मैं तेरे बंस कै दुंगो।" फिर अब्राहम हूँना प्रभु के ताहीं जो बाकै दर्सन दई रहै, एक बेदी बनाई। 8 जाके बाद बौ तरिहाँए घाँईं, बेतेल सहर के अगार घाँईं के पहाड़ी प्रदेस घाँईं चलो गौ। और पछार दिसा मैं बेतेल और अगार मैं ए के बीच मैं बौ अपनो डेरा रखी। और हूँना बौ एक बेदी बनाई और प्रभु की आराधना करी। 9 अब्राम यात्रा करत रहो, बौ नेगेब कनान के तरिहाँए के घाँईं बढ़त भै एक जघा से दुसरे जघा मैं चले गौ।
मिस्र देस मैं अब्राम
10 जब कनान के देस मैं सूखा पड़ो, और बौ इत्तो भयानक रहै कि अब्राम थोड़ी समय बितान के ताहीं तरिहाँए कै मिस्र देस मैं चले गौ। 11 जब बौ मिस्र की सरहद पार करन बारो रहै, तौ बौ अपनी बईय्यर सारा से कही, "तू एक सुगड़ बईय्यर है। 12 और जब मिस्री लोग तोकै देखंगे, तौ समझ जांगे कि तू मेरी बईय्यर है, और बे मोकै मार डारंगे, और तोकै जिंदो छोड़ देंगे। 13 लेकिन तैं उनसे जौ कहिये कि मैं जाकी बहेनिया हौं; तौ जौ बजह से मोकै जिंदो छोड़ देंगे और मेरे संग अच्छो बर्ताव करंगे।" 14 फिर जब अब्राहम मिस्र की सरहद पार करी, तौ मिस्री लोग देखीं कि बाकी बईय्यर भौत सुगड़ है। 15 जब मिस्र के अधिकारी बाकै देखीं तौ बे फिरौन राजा के सामने बाकी बड़ाँईं करीं; और सारा कै राजा के महल मैं पहोंचाओ गौ। 16 और बाकी बजह से राजा अब्राम के संग अच्छो बर्ताव करी, बाकै निरे जानवर भेड़-बकरिया, गईंय्या-बरधा, गधा-गधईया, नौकर-नौकरानी और निरे ऊँट दई। 17 काहैकि अब्राहम के बदले राजा सारा कै रख लई रहै, और जौ बजह से प्रभु फिरौन राजा के ऊपर और बाके घर के लोगन ऊपर भयानक बिमारी पनारी। 18 तौ फिरौन अब्राहम कै बुलबाई और बासे पूँछी, "तैं मेरे संग का करो है? तैं मोकै जौ काहे ना बताओ कि बौ तेरी बईय्यर है? 19 तैं जौ काहे कहो कि बौ मेरी बहेनिया है, और मोकै जाकै अपनी बईय्यर बनान दौ? जौ तौ तेरी बईय्यर है; जाकै लै जा और हिंयाँ से चले जा!" 20 फिरौन अपने आदमिन कै हुकम दई, और बे अब्राम कै पकड़ लईं और बाकी बईय्यर और बाकी पूरी जायदाद समेत बौ देस से बिदाई कर दईं।