1 जब राहेल देखी कि बाके और याकूब से कोई बालका नाय हुई रै हैं, तौ बाकै अपनी बहेनिया से जलन होन लगी। तौ बौ याकूब से कही, "मोकै औलाद दे, ना तौ मैं मर जांगो।"

2 याकूब राहेल ऊपर गुस्सा भौ और कही, "का मैं परमेस्वर की जघा मैं हौं, जो तोए बालका पैदा करन से रोक दौ हौं?"

3 तौ राहेल बासे कही, "हिंयाँ मेरी दासी बिल्हा है। बाके संग सो ताकी बौ मेरे ताहीं बालका पैदा कर सकै, और मैं भी बाके जरिया एक परिवार खड़ो कर सकौं।"

4 तौ बौ बाकै अपनी दासी बिल्हा कै बईय्यर होन के ताहीं दै दई। याकूब बाके संग सारीरिक संबंध रखी, 5 और बिल्हा याकूब से पेट से भई और बासे एक लौड़ा पैदा भौ। 6 तौ राहेल कहथै, परमेस्वर मेरे पक्छ मैं न्याय करी है; बौ मेरी प्रार्थना सुनी और मोए एक लौड़ा दई। जौ बजह से बौ बाको नाओं दान रखी। 7 राहेल की सेविका बिल्हा फिर से पेट से भई और याकूब से बाको दूसरो लौड़ा पैदा भौ। 8 राहेल कहथै, मैं अपनी बहेनिया के संग कड़ी लड़ाई लड़ो हौं, लेकिन मैं जीत गौ हौं; जौ बजह प्रभु बाको नाओं नप्ताली रखी।

9 जब लिआ कै एहसास भौ कि बाके बालका अब ना ही सकथैं, तौ बौ अपनी दासी जिल्पा कै याकूब की बईय्यर होन ताहीं दई। 10 फिर लिआ की दासी जिल्पा भी याकूब से एक लौड़ा कै जनम दई। 11 लिआ कहथै, "मैं भाग्यवान हौं" जौ बजह से बौ बाको नाओं गाद रखी। 12 फिर लिआ की दासी जिल्पा से याकूब को एक और लौड़ा को जनम भौ, 13 और लिआ कहथै, "मैं भौत खुस हौं! अब बईय्यरैं मोकै खुसनसीब कहमंगी" जौ बजह से बौ बाको नाओं आसेर रखी।

14 गेहूँ की कटाई के दिनन मैं रूबेन खेत मैं गौ, और बाकै दूदाफल मिले, जिनकै बौ अपनी अईय्या लिआ के झोने लै जाथै। राहेल लिआ से कही, "महरबानी करकै अपने लौड़ा के दूदाफल मैं से कुछ मोए दे।"

15 लिआ जबाब दई, "का जौ काफी नाय है कि तैं मेरे आदमी कै छीन लौ है? अब तैं मेरे लौड़ा के दूदाफल भी छीनन की कोसिस कर रई है।" राहेल कहथै, "अगर तैं मोकै अपने लौड़ा से दूदाफल दिबागी, तौ तैं आज रात याकूब के संग सोए सकथै।"

16 संजाखिन कै जब याकूब खेत से आथै, तौ लिआ बासे भेंट करन कै निकरथै, लिआ कहथै, तोकै मेरे झोने आज रात आनेई होगो, काहैकि मैं तेरे लौड़ा के दूदाफल से तेरी कीमत भर दौ हौं। फिर बौ बहे रात बाके संग संबंध बनाई।

17 परमेस्वर लिआ की प्रार्थना सुनी, और बौ गर्भवती भई और याकूब से पाँचमें लौड़ा कै जनम दई। 18 लिआ कहथै, "मैं अपनी दासी कै अपने आदमी कै दौ, जौ बजह से परमेस्वर मोकै बाको इनाम दई है" जौ बजह से बौ अपने लौड़ा को नाओं इस्साकार रखी। 19 लिआ फिर पेट से भई और याकूब से छटमों लौड़ा पैदा भौ। 20 लिआ कहथै, "परमेस्वर मोकै एक और अच्छो इनाम दई है। अब मेरो आदमी मोकै अपनाय लेगो, काहैकि मोसे बाके छै लौड़ा पैदा भै हैं।" जौ बजह से बौ बाको नाओं जबूलून रखी। 21 बाद मैं बाकी एक लौड़िया भई, जोको नाओं बौ दीना रखी।

22 तौ परमेस्वर राहेल कै याद करी; बौ बाकी प्रार्थना को जबाब दई और बाकी कोक खोली। 23 बौ पेट से भई और बौ एक लौड़ा कै जनम दई। बौ कही, "परमेस्वर मोए एक लौड़ा दैकै मेरी निंदा दूर कर दई। 24 प्रभु मोकै एक और लौड़ा दे" जौ बजह से बौ बाको नाओं यूसुफ रखी।

25 जब राहेल से यूसुफ के जनम के बाद याकूब लाबान से कही, "मोकै बिदा करदे, कि मैं अपने घर अपने देस लौट जामौं। 26 मोकै मेरी बईय्यर और बालका दै दियौ, जो मैं तेरे ताहीं काम करकै कमाओ हौं, और मैं चले जांगो। तैं जानथै कि मैं तेरी कित्ती अच्छी सेवा करो हौं।"

27 लाबान बासे कही, "अगर तैं मेरो कृपा करथै तौ मोकै जौ कहन दे। मोकै अनुभव से पता चलो है कि प्रभु तेरे बजह से मोए आसीस दई है। 28 अपनी मजदूरी बता, मैं बाकै चुकांगो।"

29 याकूब जबाब दई, "तैं जानथै कि मैं तेरे ताहीं कैसे काम करो हौं, और तेरे जानवर तेरी भेड़-बकरिया मेरी देखरेख मै कैसे फली-फूली हैं। 30 मेरे आन से पहले तेरे पास थोड़ी सी सम्पत्ति रहै, पर अब बौ कितनी बढ़ गई! जहाँ-जहाँ मेरे पैर पड़े, प्रभु तोकै आसीस दई। पर मैं अपनी घर-गृहस्थी के ताहीं कब काम करंगो?"

31 लाबान बासे पूँछथै, "मैं तोकै का भुगतान करौं?" याकूब जबाब दई, "मोए कोई मजदूरी नाय चाहिए। अगर तैं जौ सुझाव से सहमत है तौ मैं तेरे झुंग की देखरेख करत रहेंगो: 32 आज मोकै तेरी सब भेड़-बकरियन के बीच से जान दे, मैं हर एक चित्तीदार भेंड़ और कारे मेमना कै और भेंड़-बकरियन मैं से सब चित्तीदार बकरियन कै अलग करंगो। जहे मेरी मजदूरी है। 33 आनबारे समय मैं, तैं आसानी से पता लगाए लेगो कि मैं इमानदार हौं कि नाय। जब तैं मेरी मजदूरी देखन आगो, और अगर मेरे झोने कोई बकरिया होमैं जो धब्बेदार या चित्तीदार न होमैं, या कोई भेंड़ होमैं जो कारी न होमैं, तौ तैं जान लेगो कि बौ चोरी की हैं।"

34 लाबान जबाब दई, "तेरो कहनो सई है।" तैं जैसो सुझाव देगो हम बैसिये करंगे। 35 लेकिन बौ दिन लाबान, जित्ते नर बकरा मैं लकीर या धब्बा रहैं, और जित्ती मादा बकरियन मैं धब्बा और या जिनके सरीर मैं सफेदी रहैं, सबन कै अलग कर दई; बौ सब कारी भेंड़न कै भी हटाए दई। और बौ अपने लौड़न कै उनको अधिकारी बनाई, 36 और लाबान भेंड़-बकरियन कै लैकै याकूब के झोने से तीन दिन के सफर के अंतर की दूरी करकै दूर चले गौ। याकूब लाबान की बची भेंड़-बकरियन की देखरेख करी।

37 याकूब चिनार, बादाम और अमोन के पेंड़ की हरी हंगइया लई। और कुछ की छाल उतार दई, ताकि हंगईयन मैं सेती लकीर दिखाई देमैं। 38 बौ जे हंगईयन कै भेंड़-बकरियन के अग्गु पानी पीन की जघा मै रख दई। और जब बे पानी पीन के ताहीं आईं तौ गाभन हुई गई। 39 जौ बजह से जब बकरिया हंगईया के झोने बच्चा पैदा करतीं, तौ बे लकीरबारे, कारेकबरे, और चितकबरे बच्चा पैदा करत रहैं।

40 याकूब भेंड़न कै बकरियन से अलग रखी और उनको मोहों लाबान के झुंग के चितकबरे और कारे बच्चन के घाँईं कर दई। ऐसो करकै बौ अपनो झुंग बनाई और इनकै लाबान के झुंग से अलग रखी।

41 जब हस्टपुस्ट भेड़-बकरिया गाभन होत रहैं, तौ याकूब हंगईयन कै उनके अग्गु पीन बारे नाँदन मैं रख देत रहै, ताकि बे हंगईया के बीच मैं बच्चा पैदा करैं। 42 लेकिन जब कमजोर भेड़-बकरिया गाभन होत रहैं, तौ बौ हंगईयन कै उनके अग्गु नाय रखत रहै। जल्दिये लाबान के झोने सब कमजोर-कमजोर भेड़-बकरिया ही गईं, और याकूब के झोने सब हस्टपुस्ट हुई गईं। 43 और ऐसिये करकै याकूब भौत फलवंत ही गौ। बाके भौत भेड़-बकरिया, दास, ऊँट और गधा ही गै।