1 याकूब कनान देस मै रहत रहै जितै बाको दऊवा रहत रहै। 2 जौ याकूब की वंसावली को लेखा-जोखा है। यूसुफ सत्रै साल को रहै। बौ अपने भईय्या के संग भेड़-बकरिया चुगात रहै। बौ ज्वान रहै। बौ अपने दऊवा की दूसरी बईंय्यरन, बिल्हा और जिल्पा के लौड़न के संग रहत रहै। बौ अपने बे भईय्यन की बुरी बातन की खबर अपने दऊवा के झोने लाए करत रहै।

3 याकूब अपने सब लौड़न से जाधे यूसुफ से प्यार रखत रहै, काहैकि बौ बाके बूढ़ो के समय मैं पैदा भौ रहै। और बौ बाके ताहीं रंग बिरंगो पूरी बाँह बारो एक लम्बो अंगरखा बनबाई। 4 जब यूसुफ के भईय्या देखीं कि बाको दऊवा यूसुफ कै उनसे जाधे प्यार करथै, तौ बे अपने भईय्या से इत्ती बैर करन लगे, कि बासे ढंग से बात भी नाय करत रहैं।

5 एक बार यूसुफ सपनो देखी, और जब बौ अपने भईय्यन कै जाके बारे मैं बताई, तौ बे बासे और भी जाधे नफरत करन लगे। 6 बौ फिर कहथै, "मैं जो सपनो देखा रहौं बाकै तुम सुनौ। 7 हम सब खेत मैं गेहूँ के पुरा बाँधत होथैं, तभई मेरो पूरा उठकै सीध ठाड़ गौ। और तुमरे चारौ घाँईं से एक घेरा बनो और बाके अग्गु झुक गौ।"

8 बाके भईय्या यूसुफ से कहीं, "का तैं हमरे ऊपर सासन करैगो? का तैं सई मैं हमरे ऊपर राज्य करैगो?" जौ बजह से बे यूसुफ के सपनो और बाकी बातन की बजह से बासे और जाधे नफरत करन लगे।

9 तौ यूसुफ एक और सपनो देखी, और अपने भईय्यन से कही, मैं आज एक और सपनो देखो हौं, सूरज, जोनी और ग्यारह तारा लोहोक्कै मोकै नमस्कार कर रै हैं।

10 जब बौ अपनो सपनो अपने दऊवा और भईय्यन कै जौ सपनो बताई। तौ बाको दऊवा बाकै झुकाई और बासे कही, "जो सपनो तैं देखो है, बाको मतलब का है? का सचमुच मैं और तेरी अईय्या और तेरे भईय्या तेरे झोने ठाड़ंगे और जमीन के घाँईं लोहोक्कै तोसे नमस्कार करंगे।" 11 यूसुफ के भईय्या बासे जलन करन लगे, लेकिन बाको दऊवा जे बातन कै याद रखी।

12 एक दिन यूसुफ के भईय्या अपने दऊवा की भेंड़-बकरिया चुगान के ताहीं सेकेम नगर कै गै। 13 याकूब यूसुफ से कही, तेरे भईय्या सेकेम नगर के मैदान मैं भेंड़-बकरिया चुगाए रै हैं। आ, मैं तोकै उनके पास भेजंगो। यूसुफ अपने दऊवा से कही, मैं तैयार हौं।

14 बौ यूसुफ से कही, "जाएकै देख कि तेरे भईय्या और भेड़-बकरिया ठीक-ठाक हैं की नाय।" उनकी खबर मेरे झोने लईये। याकूब बाकै हेब्रोन की घाटी से भेज दई। जब यूसुफ सेकेम नगर मैं आओ, 15 एक आदमी बाकै मैदान मैं भटकत भई पाई। बौ आदमी यूसुफ से पूँछी, तैं का ढूँड़ रौ है?

16 यूसुफ जबाब दई, "मैं अपने भईय्यन की ढूँड़ रौ हौं, जो अपनी भेंड़-बकरियन कै चुगाए रै हैं।" "का तैं मोकै बताए सकथै कि बे कहाँ हैं?"

17 बौ आदमी कही, "बे तौ पहलिये हिंयाँ से जाए चुके हैं। मैं उन्हैं जौ कहत सुनो रहौं कि बे दोतान जाए रहै हैं।" तौ यूसुफ अपने भईय्यन के पिच्छू गौ और उन्हैं दोतान मैं पाई।

18 भईय्या बाकै दूर से देखी, और जासे पहले कि बौ उनके झोने ले पहोंच पातो, बे बाके खिलाप साजिस बनाई और बाकै मार डारन को मन बनाईं। 19 बे एक दुसरे से कहीं, "बौ सपनो कै देखन बारो हिंयाँ आएरौ है। 20 अब आबौ, हम बाकै मारकै कोई गड्डा मैं फेंक देमैं। हम घर जाएकै कह देंगे कि बाकै जंगली जानवर खाएगौ। तौ हम देखंगे कि बाके सपनो भविस्य मैं कैसे पूरे होथैं।"

21 रूबेन जब उनकी बात सुनी तौ बौ यूसुफ कै बचान की कोसिस करथै। बौ उनसे कहथैं, "आबौ आपन बाकै ना मारैं।" 22 "रूबेन उनसे कही, खून मत बहाबौ, पर बाकै निर्जन प्रदेस के जौ गड्डा मैं फेंक दियौ। बाकै चोट मत पहुचाबौ।" बौ उनके हाथ से यूसुफ कै छुड़ाएकै दऊवा के झोने पहुचानो चात रहै। 23 जब यूसुफ अपने भईय्यन के झोने पहोंचो, तौ बे बाको रंग बिरंगे पूरी बाँह को लम्बो चोंगा फाड़ दईं। 24 तौ बे बाकै लै जाएकै सूखे कुआँ मैं फेंक दईं।

25 जब बे खानु खान कै बैठे, जब बे अपनी आँखी ऊपर उठाईं तौ उनकै इस्माएली को एक झुंग दिखाई दई, जो गिलाद के घाँईं से आत रहै। बे अपने ऊँटन मैं मसाला, बाम और गंधरस लदे भै मिस्र देस मैं जात रहैं। 26 यहूदा अपने भईय्यन से कही, "अगर आपन अपने भईय्या कै मार डारैं, और बाकी हत्या कै लुकामैं, तौ हमैं का फायदा होगो? 27 आबौ, आपन जाकै जे इस्माएली लोगन कै बेंच देथैं। तौ आपन कै बाकै चोट पहोंचान ना पड़ैगो; काहैकि, बौ हमरो भईय्या है, हमारो अपनो माँस है।" तौ बाके भईय्या जौ बात मैं राजी ही गै। 28 और जब कुछ मिद्दानी ब्यापारी हूँना आथैं, तौ बाके भईय्या यूसुफ कै कुआँ से बाहर निकारीं और बाकै इस्माएली कै बीस चाँदी के सिक्का मैं बेंच देथैं, जो फिर बाकै बे मिस्र मैं लै चले जाथैं।*

29 जब रूबेन कुआँ के झोने बापस आओ और देखी कि यूसुफ हूँना नाय है, तौ बाकै भौत दुख होथै और जहे बजह से बौ अपने लत्ता फाड़थै। 30 रूबेन अपने भईय्यन के झोने लौटौ। और उनसे कही, "लौड़ा तौ हूँना नाय है! मैं अब कहाँ जामौं?"

31 तौ बे एक बकरा कै मारकै और बाके खून मैं यूसुफ के लत्ता डुबोईं। 32 बाके बाद, बे जौ रंग बिरंगे चोंगा कै अपने दऊवा के झोने भेजीं और कहीं, "हमैं जौ मिलो। का जौ तेरे लौड़ा को तौ नाय है?"

33 बौ जे लत्ता कै पहचान लई और कही, "हाँ, जौ बहे को है!" कोई जंगली जानवर बाकै मार डारी है, और मेरे लौड़ा यूसुफ के टुकड़ा- टुकड़ा कर दई होगो! 34 याकूब अपने लत्ता फाड़ी, और बौ कमर मैं चमड़ा को लत्ता लपेटी, और भौत दिल ले अपने लौड़ा के ताहीं सोक मनाई। 35 बाके सब लौड़ा और लौड़िया बाकै दिलासा देन की कोसिस करथैं, लेकिन उनके दिलासा देन से भी बाको मन सांत नाय होथै और उनसे कहथै, "मैं अपने लौड़ा के ताहीं सोक करत भै मरे लोगन की दुनिया मैं चले जांगो।" और तौ बौ अपने लौड़ा यूसुफ के ताहीं सोक करत रहथै।

36 उतै, मिस्र मैं मिद्दानी ब्यापारी यूसुफ कै मिस्र देस मैं राजा फिरौन पोतीपर नाओं के एक अधिकारी कै बेंच दई, पोतीपर अंगरक्छकन को सरदार रहै।