उत्पत्ति 13

अब्राम और लूत को अलग होनो

1 अब्राम अपनी बईय्यर और अपनी पूरी जायदाद समेत मिस्र देस छोड़ कै अगार घाँईं से आए कै कनान देस के तरहाएँ के हिस्सा मैं नेगेब जघा मैं गै, और लूत भी बाके संग गौ। 2 अब्राम अपने जानवर भेड़-बकरिया और मवेसिन और सोनो-चाँदी के बजह से भौत सेठ हुई गौ। 3 फिर बौ नेगेब से चले गौ, और बेतेल नगर घाँईं से एक जघा से दुसरे जघा मैं चले गौ। बौ बेतेल और ए नगर के बीच बहे जघा मैं पहोंचो जहाँ बौ अग्गु डेरा डारी रहै। 4 और जहाँ पहली बार बेदी बनाई रहै। अब्राम हूँनै प्रभु के नाओं से आराधना करी।

5 लूत के झोने भी जो अब्राहम को सहकर्मी रहै भेड़-बकरिया, गईंय्या-बरधा, और बाको अपनो परिवार और नौकर-नौकरानी रहैं। 6 जे दोनों के एक संग रहन के ताहीं, उनके हिसाब के मुताबिक चुगा-चुगान की जघा नाय रहै, काहैकि इनके झोने भौत जाधे जानवर रहैं। 7 तौ जो लोग अब्राम के जानवर और लूत के जानवरन की देखरेख करत रहैं, उनके बीच मैं लड़ाई होन लगी। बौ समय कनानी और परिज्जी हबै भी जौ देस मैं रहत रहैं।

8 फिर अब्राहम लूत से कही, आपन हितुआ हैं, और तेरे बर्दियन और मेरे बर्दियन के बीच लड़ाई ना होनी चाहिए। 9 देख, पूरो देस तुम्हारे सामने है, तुम मोसे अलग हुई जाबौ। अगर तुम बाँए घाँईं जागो तौ मैं दहने घाँईं जांगो। अगर तैं दहने जागो तौ मैं बाँए घाँईं जांगो।

10 लूत चारौ घाँईं नजर करकै देखी, बौ देखी कि, पूरी यरदन नदिया मै, सोअर सहर ले भौत एक पानी है। प्रभु की वाटिका या मिस्र देस के तराहनी भौत जाधे पानी है। जौ तौ की बात है जब प्रभु सदोम और गमोरा के नगर कै नास कर दई रहै। 11 फिर लूत पूरी घाटी कै अपने ताहीं यरदन चुन लई और अगार दिसा मैं चले गौ। और ऐसिये करकै बे एक दुसरे से अलग ही गै। 12 अब्राहम कनान देस मैं बस गौ, और लूत तराई के सहरन मैं बसो, बौ सदोम नगर के झोने अपनो डेरा डारी, 13 प्रभु की नजर मैं सदोम नगर के लोग भौत दुस्ट और पापी रहैं।

अब्राहम हेब्रोन सहर कै जाथै

14 लूत के जान के बाद प्रभु अब्राहम से कही, "तैं जहाँ है, हूँनै से अपनी नजर चारौ घाँईं घुमा और ध्यान से देख। 15 काहैकि मैं तोकै और तेरे बंस कै बौ सब जमीन जो तू देखथै, देन जाए रौ हौं, और बौ हमेसा तुमरी रैहगी। 16 मैं तेरे वंसज कै पृथ्वी के कनकी के समान करंगो, हिंयाँ तक कि जो कोई पृथ्वी के धूधर की कनकी कै गिन सकैगो बहे तेरे बंस कै भी गिन सकैगो! 17 उठ, जौ पूरे देस मैं घूम-फिर; काहैकि मैं जौ देस तोकै दुंगो।" 18 फिर अब्राम अपनो डेरा हटाएकै हेब्रोन के ममरे के पवित्र पेंड़ के झोने बस गौ, और हूँना बौ प्रभु के ताहीं एक बेदी बनाई।