1 प्रभु सारा से जो कही रहै बैसिये करी और सारा कै आसीस दैकै अपनो वादा कै पूरो करी, 2 सारा अब्राहम से गर्भवती भई, बौ बहे निर्धारित समय मैं, जोके बारे मैं परमेस्वर कही रहै, अब्राहम से बाके बुढ़ापे मैं लौड़ा कै जनम दई। 3 अब्राहम अपने लौड़ा को नाओं जो सारा से पैदा भौ रहै, इसहाक रखी, 4 और जब अब्राहम लौड़ा इसहाक आठ दिन को भौ, तौ बौ परमेस्वर की आग्या के जरिया बाको खतना करी। 5 जब अब्राहम को लौड़ा इसहाक पैदा भौ रहै तौ बाकी उम्र सौ साल की रहै। 6 और सारा कहथै, "परमेस्वर मोकै हसाई है, तौ सब सुननबारे भी मेरे संग हसंगे।" 7 फिर सारा जौ भी कहथै, "कौन अब्राहम से कह सकथै, कि सारा बालकन कै दूध पिबागी। फिर भी देखौ मैं अब्राहम के बुढ़ापा मै एक लौड़ा कै जनम दौ।" 8 और बौ बालका बड़ो भौ, और बाको दूध छुड़ाओ गौ; जिस दिन इसहाक को दूध छुटाओ गौ, बहे दिन अब्राहम एक बड़ो भोज दई।

9 एक दिन सारा मिस्री हाजिरा के लौड़ा कै, जोकै हाजिरा अब्राहम से पैदा करी रहै, अपने लौड़ा इसहाक के मजाक करत देखी। 10 जौ बजह से बौ अब्राहम से कहथै, "जौ दासी को लौड़ा सहित निकार दे; काहैकि जौ दासी को लौड़ा मेरे लौड़ा इसहाक के संग भागीदार न होगो।" 11 अपने लौड़ा इस्माएल के बारे मैं ऐसी बात अब्राहम कै भौत बुरी लगी। 12 तौ परमेस्वर अब्राहम से कहथै, "तैं बालक और अपनी दासी के बजह से बुरो मत मान। जो बात सारा तोसे कहथै, उनकै सुन। काहैकि इसहाक के जरिये तेरो वंसजन मैं तेरो नाओं बनो रहगो। 13 मैं दासी के लौड़ा से भी एक रास्ट्र पैदा करंगो; काहैकि बौ तेरी औलाद है।"

14 अब्राहम तड़के सुबेरे उठकै रोटी और पानी से भरी चमड़ा की थैलिया हाजिरा कै दई, और बाके कंधा मै रखी, और बाके लौड़ा संग बाकै बिदा कर दई। हाजिरा चले जाथै, और बेर्सेबा के जंगल मैं भटकन लगी। 15 जब थैलिया को पानी खतम ही गौ, तौ बौ अपने लौड़ा कै एक झोंगड़ के नीचे छोड़ दई। 16 बौ बालका के सामने सौ मीटर की दूरी मैं बैठ गई; काहैकि बौ सोचत रहै, मैं अपने बालका की मौत अपनी आँखिन से नाय देख सकथौं। जब बौ बाके सामने से दूर बैठी तौ बालक चीख मार-मारकै रोन लगो।

17 परमेस्वर बौ लौड़ा की रोन की अबाज सुनी, और परमेस्वर स्वर्गदूत स्वर्ग से हाजिरा कै पुकारकै कहथैं, हाजिरा, तोकै का भौ है? मत डराबै; जहाँ तेरो लौड़ा पड़ो है हूँना से परमेस्वर बाकी अबाज सुनी है। 18 उठ अपने लौड़ा कै उठा और अपने हात मै पकड़। काहैकि मैं बाके जरिया एक बड़ो रास्ट्र बनामंगो। 19 तौ परमेस्वर बाकी आँखी खोल दई, और बाकै एक कुआँ दिखाई दई; तौ बौ जाएकै मसक कै पानी से भरकै अपने लौड़ा कै पिबाई। 20 और परमेस्वर बौ लौड़ा के संग रहो; जब बौ बड़ो भौ तौ जंगल मै रहत-रहत एक अच्छो धनुस धारी बन गौ। 21 जब बे पारन के जंगल मैं रहत रहैं। तौ बाकी अईय्या बाके ताहीं एक लौड़िया ढूँड़ी जो मिस्र देस की रहन बारी रहै, और बाके संग बाको बिहा कर दई।

22 बेईं दिनन मै एसो भौ कि अबीमेलेक अपने सेनापति पीकोल कै संग लैकै अब्राहम से कहन लगो, "जो कछू तू करथै बामै परमेस्वर की आसीस होथै। 23 तौ अब मोकै हिंयाँ जौ बारे मै परमेस्वर की कसम खा, कि तैं ना मोसे, ना मेरे बालकन और ना मेरे वंस से छल-कपट करैगो, लेकिन जैसी कृपा मैं तेरे ऊपर करो हौं, बैसिये तैं मेरे और मेरे देस के संग, जहाँ तैं रहथै, बैसिये व्यवहार करिये।"

24 अब्राहम कही, "मैं कसम खाथौं।"

25 और अब्राहम अबीमेलेक कै एक कुआँ के बारे मैं जो अबीमेलेक के दास अपनी ताकत से कब्जा कर लईं रहैं, सिकायत करी। 26 तौ अबीमेलेक कही, "मैं नाय जानथौं कि कौन जौ काम करी है; और तू भी मोकै ना बताओ, ले मैं जाके बारे मैं सुनो।" 27 अब्राहम भेंड़-बकरिया और गईंय्या-बरधा अबीमेलेक कै दई और बे दोनो आपस मै वाचा बाँधी। 28 अब्राहम सात मादा मेम्ना कै झुंग से अलग करकै रखी। 29 तौ अबीमेलेक अब्राहम से पूँछी, "जे सात मेम्ना के बच्चन कै अलग करो है बाको का मतलब है?"

30 अब्राहम कहथै, तू जे सात मेम्ना कै जौ बात के ताहीं गभा जानकै मेरे हात से ले, कि मैं जौ कुआँ खोदो हौं। 31 और बे दोनो बौ जघा मै कसम खाथैं, जौ बजह से बाको नाओं बेर्सेबा पड़ो। 32 जब बे बेर्सेबा मैं वाचा भाँदी तौ अबीमेलेक और बाको सेनापति पीकोल उठकै पलिस्तिन के देस मै लौट गौ। 33 फिर अब्राहम बेर्सेबा मै झाऊ को एक पेंड़ लगाई, और हूँना प्रभु से जो अन्नंत परमेस्वर है, प्रार्थना करी। 34 अब्राहम पलिस्तिन के लोगन के देस मै भौत दिन ले रहो।