उत्पत्ति 42

यूसुफ के भईय्यन को मिस्र मैं आनो

1 जब याकूब कै पता चलो कि मिस्र मैं अनाज है, तौ बौ अपने लौड़न से कही, "तुम कुछ काहे न करथौ? 2 मैं सुनो हौं, कि मिस्र देस मैं अनाज है। तुम हुँआँ जाबौ, और आपन ताहीं अनाज मोल लै आबौ, जोसे आपन भूँख से मरैं नाय बल्किन जिंदे रहमैं।" 3 जौ बजह से यूसुफ के दस सौतेलो भईय्या मिस्र मैं अनाज मोल लेन कै गै। 4 पर यूसुफ के भईय्या बिन्यामीन कै याकूब जौ सोचकै बाके भईय्यन के संग ना भेजी, काहैकि बाकै डर रहै कि कहीं बाकै कुछ ही ना जाबै।

5 याकूब को लौड़ा और भी लोगन के संग अनाज मोल लेन कै आओ रहै, काहैकि कनान देस मैं अकाल पड़ो रहै। 6 यूसुफ, मिस्र देस को राज्यपाल रहै, बौ दुनिया भर के लोगन कै अनाज बेंचत होथै। तौ यूसुफ के भईय्या आए, और जमीन मैं मोहो के बल गिरकै बाके अग्गु नमस्कार करीं। 7 जब यूसुफ अपने भईय्यन कै देखी, तौ बौ उन्हैं पहचान लई, लेकिन उनके संग ऐसो बर्ताव करी कि बौ उन्हैं नाय जानथै। बौ उनसे कर्रो दिल करकै पूँछी, "तुम कहाँ से आए हौ?" बे जबाब दईं, "हम कनान से अजान खरीदन आए हैं।"

8 जहाँ पर यूसुफ अपने भईय्यन कै पहचान लेथै, लेकिन बे बाकै नाय पहचान पाथैं। 9 *42:9 उत्प 37:5,10यूसुफ कै बहे सपनो याद आथै जो बौ उनके बारे मैं देखी रहै और कही, "तुम मुखबिर हौ; तुम जौ पता लगान कै आए हौ कि हमरो देस कहाँ से कमजोर है।"

10 "बे बासे कहीं नाय, स्वामी," जबाब मै दईं। "हम तेरे सेवक अनाज मोल लेन आए हैं। 11 हम सबै एकै दऊवा के लौड़ा हैं। हम मुखबिर नाय हैं स्वामी, हम इमानदार आदमी हैं।"

12 यूसुफ उनसे कही, "न! तुम जौ पता लगान आए हौ कि हमरो देस कहाँ से कमजोर है।"

13 बे कहीं, "स्वामी, हम सब बारह भईय्या रहैं, और कनान देस मैं एकै आदमी के लौड़ा हैं। हमरो एक भईय्या मर चुको है, और हबै अब सबसे छोटो भईय्या हमरे दऊवा के झोने है।"

14 यूसुफ उन्हैं जबाब दई, "मैं तुम्हैं अग्गु से ही बताए दौ रहौं कि तुम मुखबिर हौ।" 15 अब तुमरो इम्तिहान होगो: मैं राजा फिरौन की कसम खाएकै कहथौं कि जब ले तुमरो सबसे छोटो भईय्या हिंयाँ नाय आए जाथै, तुम हिंयाँ से न जाए सकथौ। 16 तुम मैं से कोई एक जाएकै बाकै लै आबौ। बाकी तुम सब बचे लोगन कि निगरानी, तौ ले रखी जागी जबले कि जो तुम बताए बाकी सच्चाई की जाँच न ही जाबै। न तौ, राजा फिरौन की जिन्दगी की कसम तुम मुखबिर हौ। 17 और बौ उनकै तीन दिन के ताहीं कैदखाना मैं डार दई।

18 तिसरे दिन यूसुफ उनसे कही, "मैं परमेस्वर को डर मानन बारो आदमी हौं, और एक सर्त मैं तुमरी ज्यान बच सकथै। 19 जौ साबित करन के ताहीं कि तुम इमानदार हौ, तुम मैं से एक कै बहे कैदखाना मैं रहन होगो जहाँ तुम हौ; तुम मैं से बाकी लोग जाए सकथौ और जो अनाज तुम खरीदे हौ बाकै अपने भूंके परिवार के झोने लैजाए सकथौ। 20 फिर तुम्हैं अपने सबसे छोटो भईय्या कै मेरे झोने लानो होगो। जासे साबित ही जागो कि तुम सच बोलरै हौ, और मैं तुम्हैं मौत की सजा नाय दुंगो।" तौ बे बैसोई करीं। 21 और एक दुसरे से कहन लगे, हाँ, सचमुच जो कछु हम अपने भईय्या के संग करे, बाको फल अब हम भुगत रै हैं; हम देखे कि बौ कित्ती बड़ी मुसीबत मैं रहै, जब बौ दया की भीख माँगी, तौ आपन बाकी एक नाय सुने। जौ बजह से आपन अब जौ मुसीबत मैं हैं।

22 रूबेन कही, "मैं तुमसे कहो रहो कि लौड़ा कै नुकसान मत पहोंचाबौ, लेकिन तुम नाय सुने। और अब हमैं बाकी मौत को बदला चुकान पड़रौ है।" 23 यूसुफ समझ गौ कि बे का कहरै हैं, लेकिन बे नाय जानत रहैं, काहैकि बे अनुवादक के जरिया बासे बात करत रहैं। 24 यूसुफ उनके झोने से चले जाथै और रोन लगथै। बौ फिर दुबारा से उनसे बातचीत करन कै आथै, और सिमौन कै चुनथै, और बौ बाकै उनके सामने भाँद दई।

यूसुफ के भईय्यन को मिस्र देस मैं लौटनो

25 यूसुफ आदेस दई कि बाके भईय्यन की बोरी अनाज से भर दियैं, और सबन कै चाँदी के पैसन से भरी बोरी दई जामैं, और सफर के ताहीं उन्हैं खान बारी जरूरत की चीज दौ जाबै। उनके ताहीं ऐसो ही करो गौ। 26 सब भईय्या अपने गधन मैं बे अनाज कै लादीं जो बे खरीदी रहैं, और फिर बे चले गै। 27 जो जघा मैं बे रात गुजारीं, उनमैं से एक अपने गधा कै खबान के ताहीं जैसिये अपनी बोरी खोली, तौ बौ बोरी के मोहों के ऊपर चाँदी के पैसा रखे भै देखी। 28 तौ बौ अपने भईय्यन से कही, "मेरो धन मोकै लौटाय दौ गौ है।" "देखौ जौ हिंयाँ मेरी बोरी मैं है!" तौ उन्हैं बड़ा अचम्मो भौ, और डर के मारे बे एक दुसरे से पूँछन लागे, "परमेस्वर हमरे संग जौ का करी?"

29 जब बे कनान देस मैं अपने दऊवा याकूब के झोने आथैं, तौ उनके ऊपर जो कछु बीतो रहै, बाकै सब बात बताईं: 30 "कि मिस्र को राज्यपाल हमसे कर्रे मन से बात करी और हमरे ऊपर अपने देस के खिलाप मुखबरी करन को आरोप लगाई। 31 हम मुखबिर नाय हैं, हम जबाब दै, ‘हम इमानदार आदमी हैं। 32 हम कुल मिलाएकै बारह भईय्या हैं, और एकै दऊवा के लौड़ा हैं। हमरो एक भईय्या मर चुको है, और सबसे छोटो हबै भी हमरे दऊवा के संग कनान देस मैं है।’ 33 तौ बौ देस को स्वामी जबाब दई, ‘ऐसे करकै मैं पता लगांगो कि तुम इमानदार लोग हौ: तुम मैं से एक मेरे संग रहगो; बाकी लोग तुमरे भूंके परिवार के ताहीं अनाज लैकै जामंगे। 34 अपनो सबसे छोटो भईय्या मेरे झोने लाबौ। तभई मैं जान लुंगो कि तुम मुखबिर नाय हौ, बल्कि इमानदार आदमी हौ; मैं तेरे सब भईय्या तुम्हैं लौटाय दुंगो, और तुम हिंयाँ रहकै कारोबार कर सकथौ।’"

35 बे अनाज की बोरी खोलीं तौ देखी कि हर एक आदमी की चाँदी के पैसन की थैलिया उनके बोरन मैं हैं। जब बे और उनको दऊवा याकूब जौ सब देखी, तौ बे डराए गै। 36 तौ उनको दऊवा याकूब उनसे कहीं, "का तुम मेरे सब बालकन कै खोए देनो चाहथौ? यूसुफ भी चले गौ; सिमौन चले गौ है; और अब तुम बिन्यामीन कै छीन लेनो चाहथौ। महीं हौं जो बिपत्ति मेरे ऊपर आई!" 37 रूबेन अपने दऊवा से कही, "अगर मैं बिन्यामीन कै तेरे झोने लौटार कै न लाए पामौ, तौ तू मेरे दोनों लौड़न कै मार डारिये। बाकै मेरे देखरेख मैं छोड़ दे, और मैं बाकै बापस लैकै आमंगो।"

38 लेकिन याकूब कही, "मैं अपने लौड़ा कै तेरे संग नाय जान देंगो; बाको भईय्या मर चुको है, और बौ इकल्लो है। राह मैं बाके संग कछु भी ही सकथै। मैं एक बूढ़ो आदमी हौं, और जो दुख तुम मेरे जिंदगी मैं देगे, बौ दुख मोकै मार डारैगो।"