उत्पत्ति 49

याकूब के आखरी सब्द

1 याकूब अपने लौड़न कै बुलाएकै कही, अब जुराए जाबौ, और मैं तुम्हैं बतांगो कि भविस्य मै तुमरे संग का होगो:

2 "याकूब के सब लौड़ा, आबौ और सुनौ।

अपने दऊवा इस्राएल की सुनौ।"

3 "रूबेन, मेरी पहली औलाद, तुम मेरी ताकत हौ

और मेरी सक्ति को पहलो बच्चा,

मेरे सब लौड़न मै सबसे गौरबसाली और ताकतबर है।"

4 तुम भयानक बाढ़ की तराहनी हौ,

लेकिन तुम सबसे खास नाय होगे,

काहैकि तू मेरी प्रेमिका के संग सोए।

काहैकि तू मेरे दऊवा के बिछौना को अपवित्र करो।

5 "सिमौन और लेवी भईय्या हैं।

बे हिंसा करन के ताहीं अपने हथियारन को इस्तमाल करथैं।"

6 मैं उनकी गुप्त बातन मै सामिल नाय होंगो,

ना मैं उनकी बैठक मै हिस्सा लुंगो,

काहैकि बे क्रोध मै आए कै लोगन कै मार डारीं

और बे अपनी इच्छा के ताहीं बरधन कै अपंग बनाए दईं।

7 उनके क्रोध ऊपर स्राप होबै, काहैकि याकूब भौत गुस्सा बारो है,

और उनके क्रोध मै, काहैकि जौ भौत भयानक है।

मैं उन्हैं इस्राएल के सब देस मै तितर-बितर कर दुंगो।

मैं उन्हैं हुँआँ के लोगन के बीच तितर-बितर कर दुंगो।

8 "यहूदा, तेरे भईय्या तेरी स्तुति करंगे।

तू अपने दुस्मन की घेंट पकड़कै धरैगो।

तेरे भईय्या तुमरे सामने झुकंगे।"

9 यहूदा बक्टा के तराहनी है,

अपने सिकार कै मारकै अपनी मांद मै लौट आओ,

पैर फैलाएकै बैठ गौ;

कोई भी बाकै परेसान करन की हिम्मत नाय करैगो।

10 जब तक सीलो नाय आबै

यहूदा राजदंड को डंडा पकड़ैगो।

वास्तविक सासक के आन से पहले खतम ना होगो।

सब जाति बाकी आग्या को पालन करैगी।

11 बौ अपने ज्वान गधा कै अंगूर की लार से भाँदैगो,

और बढ़िया लार मै गधन के बच्चा कै भाँदैगो।

बौ अपने लत्ता दाखरस मै धोथै।

12 दाखरस पीन से बाकी आँखी लाल ही गई हैं,

बाके दाँत दूद पीन से सफेद ही गै।

13 "जबूलून समुंदर के घाट मैं रहगो।

बाको बन्दरगाह जहाजन के ताहीं स्वर्ग को रस्ता होगो।

बाकी राज्य हद सीदोन देस ले पहोंचैगी।"

14 "इस्साकार एक ताकतबर गधा है; जो भेंड़ की सार के बीच लेटथै।"

15 लेकिन बौ देखथै कि आराम करन की जघा अच्छी है

और देखथै कि जमीन भौत सुगड़ है।

लेकिन बौ बोझ उठान के ताहीं अपनी पिट्ठा झुकाथै

और गुलाम की तराहनी काम करन के ताहीं मजबूर करो जाथै।

16 "दान, इस्राएल के कुलन मैं एक कुल,

अपने कुल के लोगन को न्याय करैगो।"

17 दान सड़क के किनारे को साँप होगो,

रस्ता के किनारे एक बिस बारो साँप,

बौ घोड़ा की ऐंड़ी मै हमला करथै,

जोसे सवार पच्छू के घाँईं गिर जाथै।

18 हे प्रभु, मैं तेरे उद्धार के ताहीं इंतजार करथौं।

19 "गाद मै चुट्टा को एक दल हमला करैगो,

लेकिन बौ पल्टैगो और उनको पीछा करैगो।"

20 "आसेर की जमीन से भरपूर अन्न उपजैगो।

बौ राजा के ताहीं काबिल अन्न बंदोबस्त करैगो।"

21 नप्ताली एक हिरन है जो आजाद हुईकै दौड़थै,

बाकी बोली बालकन के हानी मीठी है।

22 "यूसुफ फलवन्त हँगईय्या है,

झरना के किनारे लगी फलवन्त हँगईय्या,

बाकी हँगईय्या दीवार मैं फैली है।"

23 धनुर्धारी बाके ऊपर भयानक हमला करीं;

बाके ऊपर तीर छोड़ीं; बाकै गजब सताईं।

24 लेकिन बाको धनुस ठौंड़ रहो,

और बाकी भुजा मजबूत ही जाथैं

याकूब कै सक्तिसाली परमेस्वर की ताकत से,

बरदिया के जरिया, इस्राएल को रखबरिया।

25 तेरे दऊवा को परमेस्वर ही तेरी मदत करथै

सर्वसक्तिमान परमेस्वर जो तोकै आसीस देथै

ऊपर से बारिस कै आसीस के संग

और पृथ्वी के नीचे गहरे पानी की आसीस,

अनगिनत स्तन और गर्भासय की आसीस देगो।

26 तेरे दऊवा के आसीर्वाद,

हमेसा पर्वतन के आसिर्वादन के अपेक्छा,

सनातन पहाड़ियन के वरदानन से जाधा महान हुई गै हैं।

बे यूसुफ के मुड़िया मैं ठहरैं, और बाके मुकुट मैं ठहरैं,

जो अपने भईय्यन से बिछड़ गौ रहै।

27 "बिन्यामीन एक खतरनाक भेड़िया के तराहनी है।

बौ संजा-सुबेरे घात करैगो और खा जागो।"

28 जे इस्राएल के बारह कुल हैं, और इनको दऊवा जो-जो वचन से आसीर्वाद दई रहै जे बेईं हैं और एक-एक कै इनके काबिल के हिसाब से आसीर्वाद दई।

याकूब की मौत और दफनानो

29 फिर याकूब अपने लौड़न कै आग्या दई, कि अब मैं अपने लोगन के संग मरन मै हौं, जहे ताहीं मोकै हित्ती एप्रोन के खेत की गुफा मै मेरे पुरखन झोने मट्टी दियो। 30 मोकै बौ गुफा मैं गाड़िये जो कनान देस मैं ममरे के अगार की दिसा मैं मकपेला की हमीन मैं है, जोकै अब्राहम निजी कब्रिस्तान बनान के ताहीं हित्ती जाति के एप्रोन से जमीन सुंदा मोल लई रहै। 31 हूँनै पर अब्राहम और बाकी बईय्यर सारा कै दफनाओ गौ रहै; "हूँनै इसहाक और बाकी बईय्यर रिबका कै दफनाओ गौ रहै; और हूँनै पर मैं लिआ कै दफनाओ। 32 बौ खेत और बहे मै की गुफा हित्तियन से धन दैकै मोल लई गई रहै। मोकै हूँनै दफनाए दियो।" 33 जब याकूब अपने लौड़न कै सूचना दै चुको, तभई बौ खटिया मै अपने पाँव पसारी और अपनी ज्यान छोड़ दई।