उत्पत्ति 44

हरानो भौ प्यालो

1 यूसुफ अपने घर के अधिकारिन कै आदेस दई, "जे आदमिन कै बोरी मैं इतनो अनाज भर दियौ जितनो बे लै जाए सकथैं। हर आदमी के चाँदी के पैसन कै भी बाके बोरी के मोहों मैं रख दियौ। 2 मेरे चाँदी के कटोरा के उनके अनाज के पैसन के संग सबसे छोटे भईय्या की बोरी के ऊपर रख दियौ।" बौ बैसिये करी जैसो यूसुफ बासे कही रहै। 3 तड़के भोर भईय्यन कै उनके गधन के संग बिदा करो गौ। 4 जब बे सहर से थोड़ी दूर पुग पाईं, तौ यूसुफ अपने घर के रखबरिया से कही, बे आदमिन के पच्छू जल्दी जाबौ। जब तुम उनसे भेंटा करौ, तौ उनसे पूँछियो, "तुम भलाई के बदले बुराई काहे करे? 5 तुम मेरे मालिक को चाँदी को प्याला काहे चुराए? जौ बहे है जो से बौ पीथै, और जहे से बौ भविस्यवाड़ीं करथै। तुम गंभीर अपराध करे हौ!"

6 जब सेवक उनकै पकड़ लईं, तौ बे जौ बात दोहराईं। 7 बे बाकै जबाब दईं, "हे स्वामी, काहे तैं ऐसी बात कहरौ है? तेरे सेवकन से ऐसो काम दूरै रहबै। 8 तुम जानथौ, कि जो पैसा हमकै हमारे बोरी मै मिलो, बौ हम कनान देस से तुमरे झोने बापस लै आए हैं। फिर हम तेरे मालिक के घर से चाँदी और सोनो काहे चुरांगे? 9 हे स्वामी, अगर हम मैं से कोई के झोने बौ मिलै तौ बाकै मौत की सजा दौ जाबौ, और हम मैं से बाकी लोग तेरे स्वामी के दास बन जांगे।"

10 बौ कही, "मैं राजी हौं; लेकिन जो कटोरा लई है बस बहे मेरो दास बनैगो, और तुम मै से बाकी लोग आजाद ही कै जाए सकंगे।" 11 जौ बजह से बे तुरन्त अपनी बोरी जमीन मै उतार दईं, और हर एक आदमी अपनी बोरी खोलीं। 12 यूसुफ को दास बड़े से लैकै छोटे तक खूब अच्छे से बोरन मैं ढूँडी, और कटोरा बिन्यामीन के बोरी मै मिलो। 13 सब भईय्या दुख के मारे अपने-अपने लत्ता फाड़ी, और अपने गधा मैं बोरा लादकै, और अपने सहर कै लौटगै।

14 जब यहूदा और बाके भईय्या यूसुफ के घरै आथैं, तौ भी बौ हूँनै होथै। तौ बे बाके अग्गु झुके, 15 और यूसुफ उनसे कही, "तुम कैसो काम करे? का तुम नाय जानत रहौ कि मेरो दर्जा देखकै कोई भी आदमी करकै तुमरो विचार करकै पता लगाए सकथै?"

16 यहूदा जबाब दई, "हम तोसे का कह सकथैं स्वामी?" हम कैसे बहस कर सकथैं? और हम खुदकै कैसे निर्दोस कर सकथैं? परमेस्वर हमरे अपराध और पाप कै उजागर कर दई है। अब हम सब तेरे दास हैं, सिरफ बाकै छोड़कै जोके झोने प्यालो मिलो रहै।

17 यूसुफ उनसे कही, "अरे, नाय! मैं ऐसो कहुए नाय करंगो! सिरफ बहे मेरो दास होगो जोके झोने प्यालो है। तुम मैं से बाकी लोग कुसल और अच्छे हुई कै अपने दऊवा के झोने बापस जाए सकथौ।"

यहूदा बिन्यामीन के ताहीं प्रार्थना करी

18 यहूदा यूसुफ के झोने गौ और कही, "स्वामी, महरबानी करकै मोकै तेरे अग्गु खुलकै बात करन की इजाजत दे। मोसे गुस्सा मत करिये; तैं तौ खुद राजा फिरौन के तराहनी है।" 19 स्वामी, तैं हमसे पूंँछो, का तेरो दऊवा या और दुसरो कोई भईय्या है? 20 हम अपने स्वामी कै जबाब दै, हमरो एक बूढ़ो दऊवा है और एक छोटो भईय्या है, और बौ हमरे दऊवा के बुढ़ापो मै जनम भौ रहै। और बौ भईय्या अब मर चुको है, मैं अपनी अईय्या को इकल्लो लौड़ा रह गौ; और मेरो दऊवा मोसे भौत प्यार करथै। 21 तौ तैं हमैं अपने सेवक कै, आदेस दौ रहै, "बाकै मेरे झोने लाबौ जोसे कि मैं अपनी आँखिन से बाकै देख सकौं।" 22 और हे स्वामी हम तोकै जबाब दै रहैं, कि लौड़ा अपने दऊवा कै नाय छोड़ सकथै; अगर बौ ऐसो करी तौ बाको दऊवा मर जागो। 23 तैं हमसे दुबारा से कहो, कि जब तक तुमरो सबसे छोटो भईय्या तुमरे संग न आबै, तुम्हैं मेरे सामने आन न दौ जागो।

24 "हे स्वामी जब हम अपने दऊवा के झोने बापस गै, तौ हम बाकै बताए कि तैं का कहो रहै। 25 फिर बौ हमकै बापस लौटन और थोड़ी सो अनाज मोल लान के ताहीं कही। 26 हम जबाब मै दै, ‘हम ऐसे नाय जा सकथैं; जबले हमरो सबसे छोटो भईय्या हमरे संग ना होगो, हमैं बौ आदमी की मौजूदगी मैं घुसन नाय मिलैगो। हम तभई जाए सकथैं जब हमरो सबसे छोटो भईय्या भी हमरे संग जाबै।’ 27 तेरो दास हमरो दऊवा हमसे कही है, तैं जानत भी है, कि मेरी बईय्यर राहेल से मोसे दुई लौड़ा पैदा भै। 28 उनमैं से एक मोए पहलिये छोड़ चुको है। बाकै जंगली जानवर टुकड़ा-टुकड़ा कर डारी होंगे, काहैकि बाके जान के बाद से, मैं बाकै कहुए नाय देखो। 29 अगर तैं हबइ जाकै मोसे लै लेगो, और जाकै कुछ ही जाबै तौ जो दुख तैं देगो, बौ मेरे बुढ़ापो मै सोक को दुख मोए मार डारैगो।

30 अब अगर मैं अपने दऊवा, तेरे सेवक, के झोने जामौं और लौड़ा हमरे संग नाय होबै, और बौ देखै कि लौड़ा हमरे संग नाय है, तौ बौ मर जाबैगो; 31 काहैकि बाकी जान तौ लौड़ा मैं अटकी है। और हम अपने बूढ़े दऊवा को दुख अधोलोक दसा मैं पहुँचाए देंगे। 32 जासे भी जाधा करकै, मैं लौड़ा के ताहीं अपने दऊवा कै अपनी जिंदगी गिरमी रख दौ। मैं बासे कहो कि अगर मैं तेरे लौड़ा कै तेरे झोने बापस नाय लाए पांगो, तौ मैं पूरी जिंदगी भर जाको दोस झेलत रहेंगो। 33 इसलै अब कृप्या इजाजत दे, कि जौ लौड़ा की जघा मैं तेरो जौ सेवक अपने स्वामी को गुलाम बनकै रहबै, और लौड़ा अपने भईय्यन के संग लौट जाबै। 34 काहैकि लौड़ा के बगैर मैं कैसे अपने दऊवा के झोने बापस जाए सकथौं? मैं अपने दऊवा ऊपर जौ दुख आत भै नाय देख सकथौं।"