1 याकूब अपनो सब कुछ समटेई और बेर्सेबा कै गौ, जहाँ बौ अपने दऊवा इसहाक को परमेस्वर कै बलि चढ़ाई। 2 रात कै परमेस्वर दर्सन मै बासे बात करी, और पुकारकै कही, "याकूब, याकूब!"

"हाँ, मैं हिंयाँ हौं," बौ जबाब दई।

3 बौ कही, "मैं परमेस्वर हौं, और तुमरे दऊवा को परमेस्वर हौं।" "मिस्र मै जान से मत डराबौ; मैं तुमरे वंस कै हुँआँ एक महान रास्टृ बनांगो। 4 मैं तुमरे संग मिस्र जांगो, और तुमरे वंस कै जौ देस मै बापस लै आंगो। जब तैं मरैगो तौ यूसुफ तेरे संग मै होगो।"

5 याकूब बेर्सेबा से चलो। बाके लौड़ा दऊवा कै, अपने छोटे बालकन संग, और अपनी बईंय्यरैं कै मिस्र के राजा के जरिया जो लड़िया लान कै पनारी रहै बे उनमैं बैठकै चल दईं। 6 बे अपने पले जानवर और कनान मै जुरो धन-दौलत कै लैकै मिस्र चले गै। याकूब अपने सब वंस कै अपने संग ले चले गौ: 7 बाके लौड़ा, बाके नतिया-नतनिया, बाकी लौड़िया, अपने संग मिस्र लै गौ।

8 याकूब के परिवार के जो सदस्य बाके संग मिस्र गै रहैं, बौ बाको सबसे बड़ो लौड़ा रूबेन रहै। 9 और रूबेन को लौड़ा: हनोक, पल्लू, हेस्रोन, और कर्मी रहै। 10 सिमौन और बाके लौड़ा: यमूएल, यामीन, ओहद, याकीन, सोहर, और एक कनानी बईय्यर को लौड़ा साऊल। 11 लेवी और बाके लौड़ा: गेर्सोन, कहात और मरारी। 12 यहूदा और बाके लौड़ा: एर, ओनन, सेला, पेरेस, और जेरह रहैं। पर एर और ओनन, कनान देस मै मर गै रहैं। पेरेज के लौड़ा हेस्रोन और हामुल रहैं। 13 इस्साकार और बाके लौड़ा: तोला, पूआ, यासूब और सिम्रोन। 14 जबूलून और बाके लौड़ा: सेरेद, एलोन, और यहलेल। 15 मेसोपोटामिया के पद्दन-अराम मैं याकूब से लिआ के जेईं लौड़ा पैदा भै, और एक बाकी लौड़िया दीना भी। लिआ के जरिया बाके बंस की गिनती कुल मिलाएकै तैंतीस भई।

16 गाद और बाके लौड़ा: सपोन, हाग्गी, सूनी, एस्बोन, एरी, अरोदी, और अरेली। 17 आसेर और बाके लौड़ा: यिम्ना, इस्वा, इसवी, बरीआ, और उनकी बहेनिया सेरह। बरीआ के लौड़ा हेबेर और मल्कीएल रहै। 18 जिल्पा नाओं की दासी से, जोकै लाबान अपनी लौड़िया लिआ कै दई होथै। जे कुल सोलह जनी याकूब से पैदा भै रहैं।

19 याकूब की बईय्यर राहेल से बाके दुई लौड़ा पैदा भै: यूसुफ और बिन्यामीन। 20 यूसुफ कै मिस्र देस मैं मनस्से और एप्रेम नाओं के लौड़ा पैदा भै। उनकै ओन नगर के एक पुजारी पोतीपर की लौड़िया आसनत जन्माई रहै। 21 बिन्यामीन के लौड़ा बेला, बेकर, असबेल, गेरा, नामान, एही, रोस, मुप्पीम, हुप्पीम और अर्द रहैं। 22 जे चौदह राहेल के जरिया याकूब के बंसज हैं।

23 दान को लौड़ा हूसीम रहै। 24 नप्ताली के लौड़ा: यहसएल, गूनी, सेसेर, और सिल्लेम। 25 जे सातौ बिल्हा नाओं की दासी से याकूब के बंसज हैं, जोकै लाबान अपनी लौड़िया राहेल कै दई रहै।

26 याकूब के बंस के सब प्राड़ी, जो उनके संग मिस्र मैं आए रहैं, याकूब की बहुअन कै छोड़कै, कुछ छियासठ आदमी रहैं। 27 यूसुफ के दुई लौड़ा, जो बाकै मिस्र देस मैं पैदा भै रहैं, ऐसे करकै हुँआँ जान बारे याकूब के परिवार की कुल संख्या सत्तर ही गई।

28 याकूब यहूदा कै यूसुफ से गोसेन प्रदेस मै मिलन कै कहन ताहीं अग्गु पनारी। जब बे गोसेन प्रदेस मैं पहोंचे, 29 यूसुफ अपने रथ मै चढ़थै और अपने दऊवा इस्राएल से मिलन के ताहीं गोसेन प्रदेस कै गै। जब बे मिले, तौ यूसुफ अपने दऊवा के गले मै अपनी बाँहे डार कै भौत देर ले रोत रहो। 30 याकूब यूसुफ से कही, मैं मरन बारो हौं, काहैकि मैं तोए देख लौ हौं और जासे खुस हौं कि तैं हबैले जिंदो है।

31 फिर यूसुफ अपने सब भईय्या और अपने दऊवा के परिवार के बाकी के लोगन से कही, "मोए जाएकै राजा कै बतानो चाहिए कि मेरे भईय्या और मेरे दऊवा को पूरो परिवार, जो कनान मै रहत रहैं, मेरे झोने आएगै। 32 मैं बासे कहमंगो, कि तुम बरदिया हौ और जानवरन की देख-रेख करथौं, और तुम अपनी भेड़-बकरिया, गईंय्या-बरधा, और जो कुछ तुमरो है बौ सब लै आए हौ। 33 जब राजा तुम्हैं बुलाए कै पूँछी कि तुमरो कारोबार का है, 34 बाकै जरूर बतामैं कि तुम जिन्दगी भर जानवरन की देख-रेख करे हौ, जैसे तुमरे पुरखा करी रहैं। तभई बौ तुम्हैं गोसेन प्रदेस की सीमा मै रहन देगो।" यूसुफ जौ जहेमारे कही कि मिस्री लोगन बरदियन से कोई मतलब ना पड़ै।