नूह के संग परमेस्वर की वाचा
1 फिर परमेस्वर नूह और बाके लौड़न कै आसीस देत भै कही, "फूलौ-फलौ और पूरी पृथ्वी मैं भर जाबौ। 2 पृथ्वी के सब जानवर, आसमान के पक्छी, जमीन मैं नेंगन बारे जन्तु, और समुद्र की मच्छी, बे सब के सब तुमसे डरांगे। बे सब तुमरे बस मैं रहंगे, मैं उनकै तुमरे हाथ मैं सौपथौं। 3 अब से सब जीव- जन्तु तुमरो आहार होगो। खाए सकथौ, संग मैं हरे छोटे पौधन कै भी; मैं बे सब तुम्हैं खान कै देथौं। 4 लेकिन एक चीज मत खईयो मतलब खून लगो भौ मास; मैं जाकै खान से मना करो हौं काहैकि खून मैं ज्यान होथै, 5 काहैकि मैं पक्का तुमरे खून को बदला लुंगो। मैं हर एक जानवर से, हर एक इंसान से बाको प्रतिसोध लुंगो। मैं हर एक इंसान से बाके भईय्या-बहेनिया के खून को बदला लुंगो। 6 जो कोई इंसान को खून बहागो, बहो को खून इंसान के जरिये बहाओ जागो; काहैकि परमेस्वर इंसान कै अपने स्वरूप बनाई है।9:6 लैव्यवस्था 24:17 7 तुम फूलौ-फलौ, और पृथ्वी मैं गजब बढ़ जाबौ और असंख्य हुई जाबौ।"
8 फिर परमेस्वर नूह और बाके लौड़न से कहथै, 9 मैं तुमरे और तुमरे बाद होन बारे औलादन के संग वाचा, 10 और तुमरे झोने के हर एक जिंदे प्राड़ी मतलब पक्छि, पालतू जानवर, पृथ्वी के सब बन- जानवर और जहाज से बाहर निकरन बारे सब जीव- जन्तुअन के संग अपनी वाचा बाँधथौं। 11 जे सब्दन के संग मैं तुमरे संग वाचा बाँधथौं: मैं वादा करथौं कि फिर कहूवे जिंदे प्राड़ी बाढ़ से नास ना होंगे; और फिर कहू पृथ्वी कै बाढ़ नास नाय करैगी। 12 परमेस्वर फिर एक बार कही, मैं तुमरे संग और सबै जिंदे प्राड़िन के संग युगानायुग की पीढ़ी के ताहीं एक वाचा बाँधथौं, बाको जौ चिन्ह है, 13 मैं बादर मैं अपनी धनुस रखथौं। जौ मेरे और पृथ्वी के बीच करे गै वाचा को चिन्ह होगो। 14 और जब मैं आसमान कै बादर से तोप लेथौं तौ मेघधनुस दिखाई देगो, 15 मैं तुमसे और सब जानवरन से करो वाचा याद रखंगो, कि बाढ़ फिर कहुए सबै जिंदे प्राड़िन कै नास नाय करैगी। 16 जब बादर मैं इंद्र-धनुस दिखाई देगो, तौ मैं बाकै देखकै पृथ्वी मैं सब जिंदे प्राड़िन के बीच परमेस्वर की चिरस्थायी वाचा कै याद करंगो। 17 तौ परमेस्वर नूह से कही, जो वाचा मैं अपने और पृथ्वी के सब प्राड़ियन के बीच मैं करो हौं, बाको जहे चिन्ह है।
नूह और बाके लौड़ा
18 नूह के लौड़ा जो जहाज से दुआरे निकरे बे सेम, हाम और येपेत रहैं। हाम कनान को दऊवा बनो। 19 जेईं तीन नूह के लौड़ा रहैं, और उनके जरिये पृथ्वी इंसानन से भर गई।
20 नूह, जो एक किसान बनो, और खेती करनो सुरू करी और बौ दाख की बारी लगाई। 21 जब बौ जरासो दाखरस पी लई, तौ बाकै इतने मैं नसा चढ़ गई, और खुद के लत्ता उतारकै अपने तम्बू मैं बिना लत्ता लेट गौ। 22 जब कनान को दऊवा हाम देखी कि बाको दऊवा बिना लत्ता के है, तौ बौ दुआरे गौ और अपने दोनों भईय्यन कै बताई। 23 फिर सेम और येपेत एक लत्ता लईं, और बाके अपने कंधा मैं धरकै उल्टे पाँव नेंगकै तम्बू भीतर गै और अपने दऊवा के बिना लत्ता सरीर कै तोप दईं। बे अपनो मोहों पच्छू करे पड़े रहैं। ताकि बे बाके सरीर कै बिना लत्ता के न देख पामैं। 24 जब नूह की नसा उतरी और बाकै पता चलो कि बाको सबसे छोटो लौड़ा बाके संग का करी है, 25 नूह बाकै स्राप दई,
"कनान स्रापित होबै!
बौ अपने भईय्यन को दास होगो।
26 नूह फिर से कही, सेम को प्रभु परमेस्वर धन्य है!
कनान सेम को दास होगो।
27 परमेस्वर येपेत कै बढ़ाबै!
और याफत सेम के तम्बुन मैं वास करै,
और कनान येपेत को दास बने।"
28 बाढ़ के बाद नूह तीन सौ पचास साल और जिंदो रहो 29 ऐसे करकै नूह की नौ सौ पचास साल की उमर मैं बाकी मौत ही गई।