1 जे चार राजा, बेबीलोन को राजा अम्रापेल, एल्लासार को राजा अर्योक, और एलाम को राजा कदार्लाओमर, और गोयीम को राजा तिदाल, सिनार के जे राजा जौ समय मैं सासन करत रहैं, 2 जे पाँच और दुसरेन राजा से लड़ाई करन गै: सदोम को बेरा, गमोरा को बिरसा, और अदमा को राजा सिनाब, और सबोयीम को राजा सेमेबेर, और बेला (सोअर) को राजा। 3 जे राजा मिलकै एक गठजोड़ करीं और सिद्दीम की घाटी मतलब मृतसागर मैं जुराने। 4 बे बाहरै साल ले कदार्लाओमर के काबू मैं रहे, लेकिन तेरहमों साल मैं जे बाके खिलाफ बगावत कर दईं। 5 चौहदमें साल मैं कदार्लाओमर और बाके संग के राजा अपनी सेना के संग मिलकै अस्तारोत्कनम मैं रापाईन कै, और हाम मैं जूजिन कै, और किर्यातैम के मैदान मैं एमियन कै हराईं। 6 और एदोम के पहाड़ ले होरी लोग बंजर जमीन के किनारे एल्पारान ले उनको पीछा करत गै। 7 फिर बे लौटे और कादेस मैं बापिस आए गै (जौ एन्मिसपात के नाओं से जानो जात रहै)। बे अमालेकियन की सब जमीन जघा कै जीत लईं और हसासोरन्तामार मैं रहन बारे एमोरियन कै भी हराए दईं।

8 तौ सदोम, गमोरा, अदमा, सबोयीम, सोअर और बेला के निरे राजा सिद्दीम की घाटी मैं लड़ाई के ताहीं अपनी सेना जोरीं, और लड़ीं। 9 अम्रापेल, एलाम, कदार्लाओमर, गोयीम, बेबीलोन और अर्योक, तिदाल, एल्लासार जे सिनार के राजन के खिलाफ बे पाँचौ राजा, चारौ घाँईं से घेरा बनाईं। 10 घाटी कोलतार के गड्डन से भर गईं रहैं, और जब सदोम और गमोरा के राजा लड़ाई के मैदान से भाजन की कोसिस करीं, तौ बे बेईं गड्डन मैं गिर गै; लेकिन तीन राजा बचकै पहाड़ मैं भाज गै। 11 चारौ राजा सदोम और गमोरा मैं खानबारी चीज समेत सब कछु लूटकै चले गै। 12 लूत, अब्राहम को भतीजो, सदोम मैं रहत रहै, और बाकी पूरी सम्पत्ति समेत बहो कै लै गै।

13 एक इंसान, जो भाजकै बचगौ रहै, इब्रानी जाति के अब्राम के झोने आओ, और उन्हैं जौ खबर दई। अब्राम ममरे पेंड़ के जंगल मैं रहथै, जौ जंगल एमोरी जाति के ममरे नाओं के आदमी को रहै। और बे बासे वाचा बाँधी रहैं, बौ एसकोल और आनेर को भईय्या रहै। जे तीनौं अब्राम के बड़ा गहरे दिलबर रहैं। 14 जब अब्राम सुनी कि बाके भतीजे लोट कै पकड़ लईं हैं, तौ बौ अपने संग के सब लड़ाकू सिपईय्यन कै लैकै, जो कुल मिलाएकै तीन सौ अट्ठारह होंगे, उनकै समेटी और दान नगर ले बे चारौ राजा को पीछा करी। 15 बौ अपने आदमिन कै अलग-अलग हिस्सा मैं बाँट दई, और रात मैं दुस्मन ऊपर हमला करी और उन्हैं हराए दई। और दमिस्क नगर के सीरे की दिसा मैं होबा सहर ले उनको पीछा करी, 16 और उनको लूटो भौ माल जप्त कर लई। बौ अपने भतीजो लूत और बाकी संपत्ति, बईय्यरैं और सब कैदियन कै भी बापिस लै आई।

17 जब अब्राम कदार्लाओमर और दुसरे राजा के ऊपर जीत हासिल करकै बापिस लौटत रहैं, तौ सदोम को राजा सावे नाओं की घाटी जोकै राजा की घाटी भी कहत रहैं, मैं बासे मिलन के ताहीं आओ। 18 और सालेम को राजा मलिकिसिदेक अब्राहम के झोने रोटी और दाखरस लै आओ, बौ परमप्रधान परमेस्वर को पुजारी रहै। 19 और अब्राम कै जौ कहकै आसिर्वाद दई, "परमप्रधान परमेस्वर, स्वर्ग और पृथ्वी को रचना करन बारो, अब्राम कै आसीस देबै! 20 परमप्रधान परमेस्वर, जो तुमकै आसीस करकै तुमरे दुस्मन ऊपर जीत दिबाई, बाकी स्तुति करौ!" और फिर अब्राम मलकीसेदेक कै सारे लूट के धन मैं से दसमों हिस्सा दई जो बौ लूटी रहै।

21 सदोम को राजा अब्राम से कही, "लूट को धन तैं अपने झोने रख ले, लेकिन मेरे सब लोगन कै मोकै लौटार दे।" 22 अब्राहम सदोम के राजा कै जबाब दई, मैं स्वर्ग और पृथ्वी को रचन बारो परमप्रधान परमेस्वर प्रभु की हाथ उठाएकै कसम खाएकै कहथौं, 23 कि मैं तेरो कछु नाय रखंगो, हिंयाँ तक कि एक सूत डोरा और चप्पल को पट्टा भी नाय। तौ तुम जौ भी नाय कह पागे, कि मेरे बजह से अब्राम सेठ भौ है। 24 पर जो कछु जे आदमी खाई हैं, और जो आदमी मेरे संग गै रहैं, उनके हिस्सा के अलावा, मैं कछु ना लुंगो। लेकिन मेरे गहरे दिलबर-आनेर एसकोल और ममरे अपनो-अपनो हिस्सा लै लियैं।