उत्पत्ति 17

खतना और वाचा को चिन्ह

1 जब अब्राम निन्यानबै साल को भौ, तभई प्रभु बाकै दर्सन मैं कही, "मैं सर्वसक्तिमान परमेस्वर हौं, मेरी मौजूदगी मैं चल और निर्दोस आचरड़ को ही जा। 2 मैं तेरे संग वाचा बाँधंगो, और तेरे वंस कै भौत बढ़ांगो।" 3 तौ अब्राम लोहोक्कै परमेस्वर कै प्रड़ाम करी, और परमेस्वर बासे बात करी, 4 देख, मैं तेरे संग वाचा बाँधे रहेंगो: तैं सब रास्ट्रन को मूलपिता कहो जागो। 5 जौ बजह से अब से तेरो नाओं अब्राम न रहेगो लेकिन तेरो नाओं अब्राहम होगो; काहैकि मैं तोए सब रास्ट्रन को मूलपिता ठहराए दौ हौं। 6 मैं तोए भौत फलवन्त करंगो, और तोकै सब रास्ट्रन को मूल बनाए दुँगो, और तेरे वंस मैं तमान राजा जनम लेंगे।

7 "और मैं तेरे संग और तेरे बाद पीढ़ी-पीढ़ी ले, तेरे वंस के संग हमेसा ताहीं वाचा बाँधथौं, कि मैं तेरो और तेरे बाद को भी परमेस्वर रहेंगो। 8 और मैं तोकै और तेरे बाद तेरे वंस कै भी, जौ सारो कनान देस, जोमैं तू परदेसी हीकै रहथै, तोकै हमेसा के ताहीं जौ जमीन दुंगो, और मैं बे सबन को परमेस्वर रहंगो।"

9 फिर परमेस्वर अब्राहम से कही, मेरे संग बाँधी भई वाचा को पालन करिये, तैं और तेरे बाद को वंस भी मेरी वाचा को पालन पीढ़ी दर पीढ़ी करत रहबै। 10 मेरे संग बाँधी भई वाचा जोको पालन तोकै और तेरे वंस कै करने पड़ैगो बौ जौ है तुम मैं से हर एक खतना करो जाबै। 11 तुम अपनो-अपनो खतना करबाए लिओ, जो वाचा मेरे और तुमरे बीच मैं है, बाको जहे चिन्ह होगो। 12 तुमरे हर एक बालका को खतना बाके जनम के आठवें दिन करो जाबै। और हर एक पीढ़ी के आदमी को खतना होनो चाहिए, चाहे बौ तुमरे घर मै जन्में भै नौकर होमैं, मतलब विदेसी से रुपईया दैकै खरीदे गै होमैं, जो तेरे बंस के ना होमैं। 13 जो तेरे घर मैं पैदा होमैं, या तेरे रुपईया से मोल लौ जाबै, बाको खतना जरूरी है; जौ मेरी वाचा जोको निसान तुमरी सरीर मै होगो, बौ हमेसा-हमेसा रहबैगो। 14 जो आदमी बिन खतना को होगो, मतलब जोकी खाल को खतना न होगो, बौ इंसान अपने लोगन मै से नास करो जाबै, काहैकि बौ मेरे संग बाँधी भई वाचा कै तोड़ दई।

15 फिर परमेस्वर अब्राहम से कही, "तेरी जो बईय्यर सारै है; बाकै तैं अब सारै मत कहिये, अब से बाको नाओं सारा होगो।*17:15 सारा को मतलब "राजकुमारी।" 16 मैं बाकै आसीस दुँगो, और तोकै बाके जरिया एक लौड़ा दुँगो। और मैं बाकै ऐसी आसीस दुँगो कि बौ रास्ट्रन की मूलअईय्या बन जागी; और बाके वंस मैं राज्य-राज्य के राजा जनम लेंगे।"

17 तौ अब्राहम मोहों के बल गिरकै हँस पड़ो, और मन ही मन कहन लगो, "का सौ साल के आदमी से बालक पैदा होगो और का सारा जो नब्बे साल की है बौ बालकन कै जनम देगी?" 18 अब्राहम परमेस्वर से कहथै, इस्माएल तेरी निगाह मैं बनो रहबै जहे भौत है। 19 तौ परमेस्वर कही, जरूर तेरी बईय्यर सारा को तोसे एक बालका पैदा होगो; और तू बाको नाओं इसहाक रखिये; और मैं बाके संग ऐसी वाचा बाँधंगो जो बाके बाद बाके वंस के संग हमेसा-हमेसा की वाचा होगी। 20 मैं इस्माएल की प्रार्थना कै सुनो हौं, देख, मैं बहो कै भी आसीस दुँगो, और बाकै फलवन्त करंगो बासे बारह सासक पैदा होंगे, और मैं बासे एक महान रास्ट्र बनांगो। 21 लेकिन मैं अपनी वाचा इसहाक के संग बाँधंगो जो सारा से अगले साल जहे समय मै पैदा होगो। 22 जब परमेस्वर अब्राहम से बात कर चुको, तौ बौ अब्राहम के झोने से ऊपर चले गौ।

23 तौ अब्राहम अपने लौड़ा इस्माएल कै लई और बाके घर मैं जित्ते पैदा भै रहैं, और जित्ते बाके रुपईया से मोल लै भै दासन को, मतलब बाके घर मैं जित्ते लोग रहैं, बे सबन को बहे दिन खतना करी कैसे परमेस्वर बासे कही रहै। 24 जब अब्राहम को खतना भौ, तौ बौ निन्यानबै साल को रहै। 25 और जब बाके लौड़ा इस्माएल को खतना भौ, तौ बौ तेरह साल को रहै। 26 अब्राहम और बाके लौड़ा इस्माएल दोनो को खतना एकै संग और एकै दिन कै भौ। 27 और बाके घर मै जित्ते आदमी रहैं जो घर मैं पैदा भै, जो इनकै विदेसी के हात से रुपईया दैकै मोल लै गै रहैं जे सबन को खतना बाके संगै भौ।