उत्पत्ति 26

इसहाक गरार मैं रहथै

1 अब्राहम के समय अकाल के अलावा देस मैं एक और अलग अकाल पड़ो। इसहाक गरार मैं पलिस्तियन को राजा अबीमेलेक के झोने गौ। 2 प्रभु इसहाक कै दर्सन दैकै कही, "मिस्र मैं मत जइये; जौ देस मैं रहा, जहाँ मैं तोसे रहन कै कहमौं, बहे देस मैं तू रहिये। 3 हीनै रहिये, और मैं तेरे संग रहेंगो और तोए आसीस दुंगो। मैं जौ पूरो प्रदेस तोकै और तेरे वंस कै देथौं। मैं तेरे पिता अब्राहम से करो भौ वादा निभांगो।*26:3 उत्पत्ति 22.16-18 4 मैं तेरे वंस कै आसमान के तारन के तराहनी असंख्य बनांगो, और उन्हैं जे सब देस दुंगो। पृथ्वी के सब रास्ट्र तेरे वंस के जरिये मोसे आसीस पांगे। 5 काहैकि अब्राहम मेरी बात सुनी और बौ मेरी आग्यन, मेरी विधियन और व्यवस्था को पालन करी।"

6 तौ इसहाक गरार नगर मैं रहन लगो। 7 जब बौ जघा के लोग बाकी बईय्यर रिबका के बारे मैं बासे पूँछी तौ बौ कही, जौ मेरी बहेनिया है। इसहाक मेरी बईय्यर कहन से डरात रहै। बौ सोचत रहै: ऐसो ना होबै कि रिबका के बजह से जौ जघा के लोग मोकै मार डारैं, काहैकि रिबका देखन मैं बड़ा सुगड़ रहै।*26:7 उत्पत्ति 12.13 उत्पत्ति 20.2 8 जब इसहाक कै हूँना कुछ समय हुई गौ, तौ एक दिन पलिस्तियन को राजा अबीमेलेक खिड़की से झाँक कै देखी, कि इसहाक और रिबका दोनों प्यार कर रै हैं। 9 अबीमेलेक इसहाक कै बुलबाई और बासे कहथै, "सचमुच बौ तेरी बईय्यर है! तू ऐसे काहे बताओ कि बौ तेरी बहेनिया रहै?" बौ जबाब दई, "मोकै लगो कि अगर मैं कहंगो कि बौ मेरी बईय्यर है तौ जौ बजह से मोकै मार दौ जागो।"

10 अबीमेलेक कही, "तैं हमरे संग जौ का करो? हम लोगन मैं से कोई भी आदमी तेरी बईय्यर के संग कूकर्म कर सकत रहै और तैं हमरे ऊपर दोस मढ़तो।" 11 अबीमेलेक सब लोगन कै आग्या दई: "जो कोई जौ आदमी और बाकी बईय्यर के संग बुरो बर्ताव करैगो, बाकै मार दौ जाएगो।"

12 इसहाक बौ देस मैं जमीन जोतकै बीज बोई, और बौ साल जित्तो बौ बोई रहै, बासे सौ गुना फसल पाई, काहैकि प्रभु बाकै आसीस दई। 13 बौ लगातार तरक्की मैं बढ़त गौ और भौत सेठ आदमी बन गौ। 14 काहैकि बाके झोने भेंड़-बकरिया और जानवरन के भौत से झुंग और निरे नौकर-चाकर रहैं, तौ पलिस्तियन कै बासे जलन होन लगी। 15 तौ बे हूँना के सब कुआँ कै पलिस्ती मट्टी से पाट दईं जो बाके पिता अब्राहम के सेवक अब्राहम के जिन्दे रहते खोदी रहैं।

16 तौ अबीमेलेक इसहाक से कही, "हमरे देस से निकर जा। तैं हमसे भी जाधे ताकतवर ही गौ है।" 17 तौ इसहाक हूँना से चले जाथै और गरार की घाटी मैं अपनो डेरा डारथै, जहाँ बौ कुछ समय ले रहथै। 18 फिर बौ बे कुआँ कै एक बार फिर से खोदथै जो अब्राहम के समय मैं खोदे गै रहैं, और जिन्हैं पलिस्ती के लोग अब्राहम की मौत के बाद बंद कर दईं रहैं। इसहाक बे सब कुआँ कै बहे नाओं देथै जो बाके पिता उन्हैं दई रहै।

19 इसहाक के सेवक घाटी मैं एक कुआँ खोदीं और हूँना उन्हैं एक पानी को सोता मिलो। 20 तौ गरार के बरदिया इसहाक के बरदियन से लड़ाई करन लगे, और बे कह लगे, जौ पानी हमरो है। जौ बजह से इसहाक बौ कुआँ को नाओं "एसक" रख दई। काहैकि बे इसहाक से लड़ाई करी रहैं।

21 इसहाक के सेवक एक और कुआँ खोदीं, और बाके ऊपर भी लड़ाई भई, जौ बजह से इसहाक बाको नाओं "सिटना" रखी। मतलब दुस्मन। 22 फिर बौ हूँना से चले गौ और दुसरो कुआँ खुदबाई। जाके ऊपर कोई लड़ाई ना भई और जौ बजह से बौ बाको नाओं "रहोबोत" रख दई। फिर बौ कही, "अब प्रभु हमैं खुली जघा दई है, और हम जहे जमीन मैं फूलंगे-फलंगे।"

23 इसहाक हूँना से बेर्सेबा कै चले गौ। 24 प्रभु बहे रात बाकै दर्सन दैकै कही, मैं तेरे पिता अब्राहम को परमेस्वर हौं। मत डराबै, काहैकि मैं तेरे संग हौं। मैं तोकै आसीस दुंगो, और अपने सेवक अब्राहम के बजह से तेरे वंस की असंख्य बढ़ांगो। 25 इसहाक हूँना एक वेदी बनाई और प्रभु की आराधना करी। तौ बौ हूँनै अपनो डेरा खड़ो करी, और बाके सेवक हूनौं एक कुआँ खोदीं।

इसहाक और अबीमेलेक के बीच समझौता

26 अबीमेलेक अपने सलाहकार अहुज्जत और अपने सेनापति पीकोल के संग इसहाक से मिलन के ताहीं गरार नगर से आओ। 27 इसहाक उनसे कही, "तुम लोग मेरे झोने काहे आए हौ? तैं तौ मोकै अपनो दुस्मन मानथै। तैं तौ मोकै अपने देस से निकार दौ रहै।"

28 बे जबाब दईं, "अब हम जान गै हैं, कि प्रभु तुमरे संग है, और हम सोचथैं कि हमरे बीच एक वाचा होनी चाहिए। हम चाहथैं कि तैं एक वचन दे 29 कि जैसे हम तोकै कोई नुकसान नाय पहोंचाए, बैसिये तैं भी हमैं कोई नुकसान नाय पहोंचागो। हम तुमरे ताहीं दयालु रहैं और तुमकै सांति से जान दै। अब जौ साफ ही गौ है, कि प्रभु तुम्हैं आसीस दई है।" 30 तौ इसहाक उनके ताहीं खास भोज को परबंध करी, और बे फिर खाईं-पीं। 31 बे सुबेरे उठे, बे आपस मैं वादा करीं, जाके बाद इसहाक उनकै बिदा करी। बे उनके झोने से सांति से चले गै।

32 बहे दिन इसहाक के सेवक आथैं, और बे बौ कुआँ के बारे मैं बताथैं, जो बे पहले खोदी रहैं। बे कहथैं, "हमैं पानी मिल गौ है।" 33 तौ इसहाक बौ कुआँ को नाओं "सिबा" रखीं, मतलब वादा। इसलै बौ सहर को नाओं बेर्सेबा पड़ गौ।

एसाव की परदेसी बईंय्यरैं

34 जब एसाव चालीस साल को भौ, तौ बौ दुई हित्ती जाति की बईंय्यरन से, मतलब बेरी की लौड़िया यहूदीत, और एलोन की लौड़िया बसमत से बिहा करी। 35 दोनों बहुअन की बजह से इसहाक और रिबका के मन कै ठेस लगी।