1 इसहाक अब बूढ़ो ही गौ रहै, और बाकी आँखी इतनी धुंधरी हुई गई रहैं कि बौ देख नाय सकत रहै, तौ बौ अपने बड़े लौड़ा एसाव कै बुलाई और बासे कही, "मेरे लौड़ा एसाव!" बौ जबाब दई "हाँ मैं इतै हौं।"

2 इसहाक कही, "तैं देखरौ है, कि मैं बुढ्ढो ही गौ हौं, और जल्दिये मर सकथौं।" 3 अपनो धनुस-तीर और हथियार लैकै जंगल कै जा, हुँआँ से तैं मेरे ताहीं जानवर मार कै ला। 4 जो स्वादिस्ट खानू मोए पसंद है, बामै से कुछ पकाए कै मेरे झोने लै आ। जाकै खान के बाद, मेरे मरन से पहले मैं तोकै आसीर्वाद दुंगो।

5 जब इसहाक एसाव से बात करत रहै, तौ रिबका सुनत रहै। जब एसाव सिकार करन कै जंगल मैं निकरो, 6 रिबका अपने लौड़ा याकूब से कही, मैं तेरे दऊवा कै एसाव से जौ कहत सुनो हौं, 7 मेरे ताहीं एक जानवर मारकै ला और बाकै मेरे ताहीं स्वादिस्ट खानु पका। जाकै खान के बाद, मैं मरन से पहले प्रभु की हजूरी मैं तोकै आसीर्वाद दुंगो। 8 रिबका कहथै, "मेरे लौड़ा" अब मेरी बात सुन और जो मैं कहमौं बहे कर। 9 तैं बकरियन के बीच मैं से दुई मोटे-मोटे अच्छे बच्चा लैआ, मैं उनसे तेरे दऊवा के ताहीं बाकी पसंद के हिसाब से स्वादिस्ट खानु पकांगो। 10 तौ तैं जाकै खान के ताहीं अपने दऊवा के झोने लै जईये, और बौ जाकै खाएकै मरन से पहले तोकै अपनो आसीर्वाद देगो।

11 लेकिन याकूब अपनी अईय्या रिबका से कहथै, "तू जानथै कि एसाव तौ बार बारो आदमी है, लेकिन मेरी खाल मुलायम है। 12 कतई मेरो दऊवा मोए छुई कै जान जागो, तौ मैं बाकी नजर मैं बाके अंधेपन को मजाक उड़ानबारो ठहरंगो, और ऐसे करकै, मैं आसीर्वाद के बजाय अपने ऊपर स्राप पांगो।"

13 बाकी अईय्या जबाब दई, मेरे लौड़ा, तेरो जो भी स्राप होबै बौ मेरे ऊपर पड़ै; जैसी मैं कहथौं, बैसिये तैं कर, और जाएकै मेरे ताहीं बकरिया लै आ। 14 तौ बौ उन्हैं लेन गौ और उन्हैं अपनी अईय्या झोने लै आई, और बौ खानू बनाथै, जो बाके दऊवा के पसंद को रहै। 15 तौ रिबका जेठे लौड़ा एसाव के सब अच्छे लत्ता लई जो बौ घर मैं रखी रहै, लैकै याकूब को पहनाई। 16 बौ बकरियन के बच्चन की खाल बाकी बाँह मैं और बाकी घेंट के चिकने हिस्सा मैं लपेट दई। 17 और बौ बाकै स्वादिस्ट खानू, और अपनी पकाई भई रोटी भी अपने लौड़ा याकूब के हाथ मैं दै दई।

18 तौ याकूब अपने दऊवा के झोने गौ और कही, "दऊवा!" बौ जबाब दई, "हाँ, तैं मेरो कौन सो लौड़ा है?"

19 याकूब जबाब दई, "मैं तेरो बड़ो लौड़ा एसाव हौं; जैसे तैं मोसे कहो रहै, मैं बैसिये ही करो हौं। तैं बैठ और जो माँस मैं तेरे ताहीं लाओ हौं, बामै से कुछ खा, ताकि तू मोकै आसीस देबै।"

20 इसहाक अपने लौड़ा से कही, "मेरे लौड़ा, तोए जौ इत्ती जल्दी कैसे मिलगौ?" याकूब जबाब दई, "तेरो परमेस्वर प्रभु जाकै ढूँड़न मैं मेरी मदद करी।"

21 इसहाक याकूब से कही, "जरा मेरे झोने तौ आ ताकि मैं तोए टपटोर सकौं। का तैं सचमुच मैं एसावै है?" 22 याकूब अपने दऊवा इसहाक के झोने आथै, और बौ बाकै महसूस करकै कही, "तेरी आबाज याकूब की आबाज जैसिये लगथै, लेकिन तेरे हात एसाव की हाथ के जैसी लगथैं।" 23 बौ याकूब कै नाय पहचान पाथै, काहैकि बाके बाँह एसाव के तराहानी बार बारे रहैं। बौ बाकै अपनो आसीर्वाद देनबारोई रहै, 24 फिर पूँछथै, "का तू सचमुच एसाव है?"

बौ जबाब देथै, "हाँ, मैं हौं।"

25 इसहाक कही, तौ मेरे ताहीं खानु परस ला। मैं अपने लौड़ा के खानु कै खांगो, जोसे मैं अपनी आत्मा से तोकै आसीर्वाद दुंगो। बौ खानु परसी। इसहाक खानु खाई। बौ बाके ताहीं अंगूर को रस भी लाई, और बौ बाकै पी। 26 तौ बाको दऊवा इसहाक से कही, "मेरे लौड़ा, झोने आएकै मोए चूम।" 27 *जैसिये बौ बाकै चूमन के ताहीं अग्गु आओ, इसहाक बाके लत्तन कै सूँघी - तौ बौ बाकै आसीर्वाद दई। बौ कही, "मेरे लौड़ा की सुखद गंध बौ खेत की गंध के तराहनी है जोकै परमेस्वर आसीर्वाद दई है। 28 परमेस्वर तोए स्वर्ग से ओस देबै और तेरे खेत कै खूब उपजाऊ बनाबै! बौ तोकै खूबै अन्न और अंगूर की फसल देबै! 29 जाति-जाति के लोग तेरे दास बनै, और देस-देस के लोग तेरे अग्गु झुकैं। तू अपने सब भईय्यन को स्वामी बनै, और तेरी अईय्या के वंस तेरे अग्गु झुकैं। जो तोकै स्राप देमैं बे स्रापित होमैं, और जो तोकै आसीर्वाद देथैं, बे आसीस पामैं।"

30 इसहाक याकूब कै आसीर्वाद दै चुको, और जैसिये याकूब चले जाथै, बाको भईय्या एसाव सिकार से भीतर आए जाथै। 31 बौ कुछ स्वादिस्ट खानू बनाई और अपने दऊवा के झोने लै जाथै। बौ कही, "दऊवा, उठकै बैठ और जो मास मैं तेरे ताहीं लाओ हौं, बामै से कुछ खा, ताकि तैं मोए आसीर्वाद दै सकै।"

32 बाको दऊवा इसहाक बासे पूँछी, "तैं कौन है?"

एसाव जबाब दई, "मैं तेरो लौड़ा, तेरो बड़ो लौड़ा एसाव हौं।"

33 इसहाक काँपत भै और थरथरात भै बासे पूँछी, "तौ बौ कौन रहै, जो मेरे झोने सिकार लाई रहै? मैं तेरे आन से पहले बाको परसो भौ खानु खाओ, और बाकै आसीर्वाद दौ, अब बहे आसिर्वाद बाके ऊपर बनो रहगो।"

34 जब एसाव जौ सुनी, तौ बौ ऊँची अबाज से और बड़ा दुखी हीकै चिल्लाएकै कही, "दऊवा, महूँ कै भी अपनो आसीर्वाद दे!"

35 इसहाक जबाब दई, "तेरो भईय्या आएकै मोए धोखा दई। बौ तेरो आसीर्वाद छीन लई है।"

36 एसाव कही, "बाको नाओं याकूब ठीकै रखो गौ रहै। बौ दुई बार मोकै धोखा दई है। पहले तौ मेरो जेठो लौड़ा हो को अधिकार लै लई, और अब मेरो आसीर्वाद भी छीन लई। एसाव पूँछी, का तैं मेरे ताहीं कोई आसीर्वाद नाय बचाएकै रखो है?"

37 इसहाक एसाव कै जबाब दई, "मैं बाकै तेरो स्वामी बनाओ हौं। मैं बाके सब भईय्यन कै बाको सेवक बनन के ताहीं दै दौ हौं। मैं अनाज और अंगूर से बाकै सम्पन्न बनाए दौ हौ। अब मेरे लौड़ा, मैं तेरे ताहीं का कर सकथौं?"

38 एसाव अपने दऊवा से विनती करत रहो: "मेरे दऊवा, का तेरे झोने सिरफ एकै आसीर्वाद है? मोकै भी आसीर्वाद दे!" बौ फूट-फूट कै रोन लागो।*

39 तौ इसहाक बासे कही,

"तेरे ताहीं स्वर्ग से ओस नाय है,

तेरे ताहीं उपजाऊ खेत नाय है,*

40 तैं अपनी तलवार के बल से जिंदो रहेगो,

लेकिन अपने भईय्या को दास बनो रहेगो।

फिर भी जब तू खिलाफत करथै,

तौ तैं बाके काबू से दूर ही जागो।"*

41 एसाव अपने भईय्या से बाके दऊवा के दै भै आसीर्वाद के बजह से बैर रखन लगो। बौ सोची, "मेरे दऊवा की मौत मैं सोक मनान को समय झोने आए गौ है; फिर मैं अपने भईय्या याकूब कै मार डारंगो।"

42 लेकिन जब रिबका कै बाके बड़े लौड़ा एसाव की जे बात बताई गई, "तौ बौ सेवक कै भेजकै अपने छोटे लौड़ा याकूब कै बुलाई। रिबका बासे कही, देख, तेरो भईय्या एसाव तोकै मार डारन की योजना बनाए रौ है। 43 अब मेरे लौड़ा, मेरी बात सुन। तैं मेरे भईय्या, लाबान के झोने हारान नगर मैं चलो जा। 44 और कुछ दिन बाके झोने रहा, जब तक तेरे भईय्या को गुस्सा सांत ना ही जाबै 45 और बौ भूल जाबै कि तू बाके संग का करो है। तौ मैं तोकै वापस लान के ताहीं कोई कै भेजंगो। मोए अपने दोनों लौड़ा कै एकै दिन मैं काहे खोने है?"

46 तौ रिबका इसहाक से कही, "हित्ती जाति की बहुअन के बजह से जिंदगी से ऊब गौ हौं। अगर याकूब भी जे बहुअन के हानी जौ देस की कोई हित्ती जाति की लौड़िया से बिहा कर लेगो तौ मोकै अपनी जिंदगी से का फायदा? मैं मर जांगो।"